Keshe Ortalyq kommýnıkasııalar qyzmetinde «Qazaqstan temir joly» UK» AQ-tyń Korporatıvtik damý boıynsha basqarýshy dırektor Erkin Jýsanbaev pen Transformasııalaý blogynyń jetekshisi Alma Sáýlebaeva baspasóz máslıhatyn ótkizdi.
Elimizdi eń damyǵan 30 memlekettiń qataryna qosý turǵysynda Elbasynyń bergen tapsyrmasyna oraı, ulttyq kompanııada bıznesti transformasııalaý sharasy bastalyp, onyń qalaı júrgizilip jatqany jóninde áńgimelegen basqarýshy dırektor, onyń tıimdi tustaryna toqtaldy. «Byltyr «Samuryq-Qazyna» qoryna qarasty enshiles kompanııalar – «QTJ» UK» AQ, Qazposhta, QazMunaıGaz, Qazatomprom jáne basqalarynda bıznesti transformasııalaý bastaldy. Transformasııa kompanııanyń bıznes úderisine tereń taldaý jasaıdy. Sol arqyly ónimsiz baǵyttardy alyp tastap, naryqtaǵy qajetti qyzmet túrleri men tehnologııalardy, usynystardy qabyldap, óndiriske engizedi. QTJ-da alǵashqylardyń biri bolyp tájirıbeli sarapshylardyń qatysýymen transformasııa komandasy quryldy. Búgingi tańda olar halyqaralyq tájirıbege súıenip, jańa bıznes-model men holdıngtiń úderisi kartasyn jasaýda. Sol arqyly kompanııa tıimdiliktiń jańa deńgeıi men qyzmet kórsetýdiń jańa sapalyq túrine kóshedi», dedi E.Jýsanbaev.
Adam áleýetin barynsha ashyp, talantyn shyńdaý úshin oǵan barynsha qolaıly jaǵdaı jasaý kompanııanyń bedeliniń ósýine jáne bıznes úderisiniń tıimdiligin kóterýge kómektesetinin aıtqan A.Sáýlebaeva, bul sharany temirjolshylardyń qalaı qabyldaǵany týraly da áńgimeledi. «Kompanııada bıznesti transformasııalaý sharasyn áýelgi kezde durys túsinbeı, bizge onyń ne qajeti bar degen azamattar da boldy. Bul ıgi sharanyń mán-mańyzy jóninde túsindirý jumystary júıeli júrgizilgen soń, temirjolshylar elge paıdasy mol bolatyn jobany biraýyzdan quptap jatyr», dedi.
Nurbaı ELMURATOV,
«Egemen Qazaqstan».