Men alys aýdan – Oıyldyń topyraǵynda týyp-óstim. Ákem Nıkolaı Tımofeevıch pen anam Valentına Aleksandrovna qazir de Oıylda turyp jatyr. Qazaq balalarymen taı-qulyndaı tebisip, birge óstim. Sodan bolar, qazaqsham jatyq, jerlesterimmen óz tilderinde erkin sóılesemin. Oıylda orta mektep bitirgennen keıin Aqtóbe baılanys kolledjin qyzyl dıplommen támamdap, týǵan jerime oralyp, Oıyl aýdandyq telekommýnıkasııa torabyna jumysqa turdym. Ujymdaǵy yntymaqtastyq pen ózara tatýlyq meni qanattandyryp jiberdi. Qaı iske de jaýapkershilikpen qaraýǵa daǵdylandym. Eki jyldan keıin ózim jumys isteıtin Oıyl telekommýnıkasııa toraby dırektorlyǵyna joǵarylatqanda áriptesterime degen senimim burynǵydan da nyǵaıa tústi.
Qazir bul mekemede 30-ǵa jýyq adam eńbek etedi. Olardyń bári óz isiniń bilikti mamandary. Barlyq eldi mekendermen telefon baılanysy bar. Basqa da baılanys qyzmetteri jolǵa qoıylǵan. Telehabarlar kórmeıtin eldi meken joq. Burynnan qalyptasqan ujymdyq óndiristik jáne eńbek dástúrin damyta otyryp, jańasha jumys isteýge talpyndyq. Tutynýshylardyń kóńilinen shyǵatyndaı baılanys qyzmetin usyný ońaı sharýa emes. Degenmen, mekemeniń yrǵaqty jumysyn qamtamasyz etýde áriptesterim ylǵı da qoldaý kórsetip otyrdy. «Bir jeńnen qol, bir jaǵadan bas» shyǵara eńbek etýdiń arqasynda oblys boıynsha aldyńǵy oryndarda boldyq. Munyń bári óz isin jetik biletin áriptesterimniń arqasy ekenin bek sezinemin. Áriptesterime arqa súıeı otyryp, qoǵamdyq jumystardan da qalys qalmadym.
Men bárin bylaı qoıǵanda, qazaqtyń kelinimin. Jubaıym Amangeldi Nurbaev biryńǵaı qazaq turatyn Yrǵyzdyń jigiti. Sondyqtan, úıde meılinshe qazaqy salt-dástúrdi ustanamyz. Jeti nan pisiremin, basqa da ulttyq taǵamdardy daıyndaımyn. О́z ultymnyń da ádet-ǵurpyn bilemin. Kóp bilgenniń artyqtyǵy joq.
Men bala kúnnen kóńilim unatqan kásiptiń kiltin tapqanyma qýanyshtymyn. Oıyldyqtar arasynda azdy-kópti bedelim bolsa, onyń osy ózim qalaǵan qyzmet arqyly kelgenin de sezemin. Osyndaı adal eńbegimniń óteýi bolar, ótken jyly oblystyq telekommýnıkasııa mekemesine jumysqa aýystym. Qazir osynda eńbek etýdemin, satý qyzmetimen aınalysamyn. Bul ujym da meni jyly qabyldady. Bir anadan týǵandaı tatýlyqta eńbek etip jatyrmyz. Merekege tolaǵaı tabyspen keldik. О́zimniń eńbek jolymda úırengenderimdi osy jerde de tıimdi paıdalanýǵa tyrysýdamyn.
Men qolym bosasa gúl ósirgendi janym qalaıdy. Barlyq gúldi unatamyn, alaıda, orhıdeıa janyma jaqynyraq. Sondyqtan da, búgingideı merekelik sátte áriptesterime halyqqa qaltqysyz qyzmet etip, jumystarynda tabysty bolýǵa, otbasynda baqytqa kenelýlerine tilektestik bildiremin.
Natalıa TAMBOVSEVA,
«Qaztelekom» AQ Aqtóbe oblystyq telekommýnıkasııa dıreksııasy satýdy basqarý qyzmetiniń jetekshi mamany.
Aqtóbe oblysy.