ASTANA. 27 naýryz. Fransııanyń tústiginde 24 naýryzda apatqa ushyraǵan Germanwings kompanııasy Airbus A-320 ushaǵynyń ekinshi pıloty Andreas Lıýbıs aýyrǵany týraly qaǵazy bolýyna baılanysty sol kúni ushýǵa shyǵýǵa tıis emes eken. Bul týraly Lenta.Ry habarlady.
Associated Press agenttiginiń habarlaýynsha, Dıýsseldorf qalasynyń prokýrory Ralf Herrenbrıýk ushqysh Andreas Lıýbıstiń páterine júrgizilgen tekserý nátıjesinde onyń 4U9525 reısi ushatyn ýaqytta aýyrǵany týraly qaǵaz boıynsha úıinde bolýy kerek ekeni anyqtalǵan. Prokýror pılotttyń osy anyqtamany jyrtyp tastaǵanyn aıtyp, onyń aýyryp júrgenin áriptesterinen jasyrǵan bolýy múmkin ekenin alǵa tartady.
Herrenbrıýk sondaı-aq páterden Lıýbıstiń qoshtasý haty da, onyń áldeqandaı bir saıası nemese dinı uıymdarǵa qatysy baryn dáleldeıtin aıǵaqtyń da tabylmaǵanyn málimdedi.
Osy aralyqta nemistiń Bild tabloıdy atalǵan ushqyshtyń psıhıatrııalyq aýrýdan emdelgenin anyqtady. Budan alty jyl buryn Lıýbıs qatty depressııaǵa ushyrap júrgenine shaǵynyp, dárigerge kórinipti. Emdelip alý úshin ol ushqyshtar mektebindegi oqýyna úzilis jarııalaýǵa májbúr bolǵan.
Naýryzdyń 26-sy kúni fransýzdyń Marsel qalasynyń prokýrory Brıs Roben apatty zertteý barysynyń aldyn ala qorytyndylaryn habarlaǵan bolatyn. Onyń aıtýynsha, Andreas Lıýbıs komandıri salonǵa shyǵyp ketken boıda kabınany ishten jaýyp alǵan. Al keıin birinshi pılot qaıtyp kelgen kezde, oǵan esikti ashpaı qoıǵan. Munyń ornyna laınerdi tómen qaraı quldyratqan. Muny baıqaǵan ekıpaj kapıtany esikti baltamen buzyp kirmekshi bolǵan. Biraq ashyp úlgere almaǵan. Osy ýaqyttaǵy segiz mınýttyń ishinde ushaq jartasqa baryp urynǵan.
Qazir Airbus A-320 ushaǵy bortynda 150 adamnyń bolǵany anyqtaldy. Olardyń 144-i jolaýshy, 6-y ekıpaj músheleri eken. Barlyǵy da sol qyrǵynda opat boldy. Qaza tapqan jolaýshylardyń arasynda Germanııa, Ispanııa, AQSh, Avstralııa, Argentına, Iran, Venesýela, Kolýmbııa, Meksıka, Japonııa, Qazaqstan, Izraıl, Danııa, Nıderlandy jáne Belgııa elderiniń azamattary bar.
Murat Aıtqoja.
Mánbe, sýret: Airbus A-320.