Keshe Ortalyq kommýnıkasııalar qyzmetinde Elbasy kitaphanasynyń atqarýshy dırektory Beısembaı Jumabekovtiń jáne dırektordyń orynbasary, taldaý ortalyǵynyń basshysy Tımýr Shaımergenovtiń qatysýymen «Qazaqstan Respýblıkasynyń Tuńǵysh Prezıdenti – Elbasy kitaphanasynyń qyzmeti men damý keleshegi» taqyrybynda baspasóz máslıhaty ótti.
Aıta keteıik, búgingi kúnge deıin kitaphanany 6 000 adam kelip kórdi. 150-den astam ekskýrsııa ótkizildi. Elbasy kitaphanasyna atbasyn tiregen joǵary mártebeli qonaqtardyń ishinde Qyrǵyzstan prezıdenti Almazbek Atambaev, Monako Knıazi Alber II, О́zbekstan prezıdenti Islam Karımov, Reseı Federasııasynyń prezıdenti Vladımır Pýtın, Belarýs Respýblıkasynyń prezıdenti Aleksandr Lýkashenko bar. Kitaphana qorynda bul kúnde 19 100-den asa kitap, 1 000 danadan astam merzimdik baspa ónimderi men elektrondyq basylymdar bar. Kitaphana qory jýyrda N.Á.Nazarbaevtyń «Máńgilik El. Gody, ravnye vekam. Epoha, ravnaıa stoletııam» degen jańa basylymmen tolyqty.
Bul – Qazaqstannyń Táýelsizdik jyldarynda ótken jasampaz jolyn jan-jaqty kórsetken alǵashqy kitap. Sondaı-aq, bul rýhanı ordada sırek, kolleksııalyq jáne kóne basylymdar bar, sonyń ishinde: Memleket basshysyna Mılandaǵy Ambrozıan kitaphanasy syıǵa tartqan, Leonardo da Vınchıdiń eskızderinen turatyn albom; 30 saqtaý birliginen turatyn Qasıetti Quran basylymdarynyń kolleksııasy; qazaq ǵaryshkeri T.Musabaev ǵaryshqa aparyp ákelgen Quran; erterekte orys ımperatory Aleksandr II kitaphanasynda saqtalyp kelgen Shlosserdiń búkilálemdik tarıhy; bir jarym beti Ábilhaıyr hanǵa arnalǵan, 1838 jyly jaryq kórgen ensıklopedııalyq leksıkon.
Prezıdenttiń jeke kitaphanasyn N.Á.Nazarbaevqa ár jyldary jetkizilgen basylymdar, qoltańbamen syıǵa tartylǵan kitaptar, sondaı-aq, Elbasy ózi 60-jyldardan bastap jınaǵan jeke (úı) kitaphanasy quraıdy. Qorda Nursultan Nazarbaev qoldanǵan, jumys barysynda erekshelegen, betine belgi qaldyrǵan kitaptar aıryqsha oryn alady. Kitaphanadan amerıkalyq East View Information Services, Inc kompanııalarynyń, merzimdik basylymdarynyń elektrondyq málimetter bazasy, sondaı-aq, reseılik Polpred.com málimetter bazasy qoljetimdi. Munda elektrondyq kitaptar da bar. Tolyq mátindik, anyqtama-bıblıografııalyq, referattyq jýrnaldar kolleksııalaryna qol jetkizýge barlyq jaǵdaı jasalǵan. Kitaphana qorynda búginde 400-ge jýyq eksponat bar. Bular – syılyqtar, Elbasynyń jeke zattary, óner buıymdary, tarıhı rarıtetter, túrli elderdiń Memleket basshylary men resmı ókilderiniń, halyqaralyq kompanııalar men uıymdardyń, belgili memleket, saıasat jáne qoǵam qaıratkerleriniń, belgili sportshylar men óner qaıratkerleriniń syılyqtary. Kitaphanada ekspozısııa aýmaqtaryn bezendirý, memleketimizdiń ataýly kúnderine jáne tarıhı máni bar oqıǵalaryna baılanysty taqyryptyq kórmeler daıyndaý jumystary turaqty júrgiziledi.
Elbasy kitaphanasynyń ekspozısııa-kórme qyzmeti N.Á.Nazarbaevtyń jasampaz oılary men bastamalaryn taqyryptyq turǵydan kórsetýge baǵyttalǵan. Kelýshiler ekspozısııadan Memleket basshysynyń tujyrymdamalyq oılarynyń jan-jaqty qyrlarymen, Táýelsiz Qazaqstannyń tabystarymen jáne jetistikterimen tereń tanysa alady. Taqyryptyq ekspozısııanyń eksponattary Tuńǵysh Prezıdenttiń qyzmetin aıshyqtaıdy jáne Memleket basshysynyń kóp qyrly ári biregeı tulǵasyn jan-jaqty ashyp kórsetedi.
Raýshan TÁÝIRHANQYZY,
jýrnalıst.