Eńbek jáne halyqty áleýmettik qorǵaý mınıstrligi zeınetaqy jınaqtaryn merziminen buryn paıdalanýǵa arnalǵan eń tómengi jetkiliktilik shekteriniń ósýine qatysty resmı málimdeme jasady. Vedomstvonyń túsindirýinshe, bul qadam el azamattarynyń bolashaq zeınetaqysyn qorǵaýǵa baǵyttalǵan, dep habarlaıdy Egemen.kz.
О́zgerister salymshynyń qazirgi jasyn ǵana emes, onyń zeınetkerlik jasqa deıingi kezeńin, bolashaq zeınetaqy tólemderin, ınvestısııalyq kiristi jáne ózge de uzaq merzimdi faktorlardy eskeretin neǵurlym dál esepteý ádistemesin engizýge baılanysty qabyldandy.
Mınıstrlik zeınetaqy jınaqtarynyń qarapaıym depozıt nemese kúndelikti shyǵyndarǵa jumsalatyn qarjy kózi emes ekenin eskertedi. Onyń basty mindeti – azamattardy zeınet jasynda turaqty tabyspen qamtamasyz etý.
Búgin jınaqty merziminen buryn paıdalaný erteńgi zeınetaqy tólemderiniń kólemine tikeleı áser etýi múmkin.
Zeınetaqy jınaǵynyń bir bóligin senimgerlik basqarýǵa berý qanshalyqty tıimdi?
Jetkiliktilik shekteri sońǵy úsh jyl ishinde qaıta qaralmaǵan. Sondyqtan olardy jańartý zeınetaqy júıesiniń uzaq merzimdi turaqtylyǵyn qamtamasyz etý úshin qajet boldy.
Zeınetaqy jınaqtarynyń bir bóligin balama maqsattarǵa (turǵyn úı men emdelý) paıdalaný múmkindigi tolyq joıylǵan joq, ol áli de saqtalady.
Zeınetaqy mólsheri burynǵy tabysynyń keminde 40%-yn quraıtyn zeınetkerler turǵyn úı men emdelý qajettilikteri úshin jınaqtarynyń 50%-yna deıin paıdalana alady.
Memleketten eńbek sińirgen jyldary úshin zeınetaqy tólemderin alatyn azamattar zeınetaqy shotyndaǵy qalǵan qarajatty tolyq kólemde paıdalaný quqyǵyna ıe.
Eske sala keteıik, búgin zeınetaqy jınaǵyn alýdyń jańa jetkiliktilik shekteri jarııalandy.