Aqsýat aýdanynda ulttyq sportty, ónerdi, bilim men rýhanııatty bir arnaǵa toǵystyrǵan «Asyl besik – Aqsýat» aýqymdy festıvali ótip jatyr. Saltanatty sharaǵa elimizdiń túkpir-túkpirinen aǵylǵan sportshylar, ónerpazdar men mártebeli qonaqtar jınaldy, dep habarlaıdy Egemen.kz.
Dúbirli jıynnyń ashylý rásiminde aımaq basshysy Berik Ýálı arnaıy quttyqtaý sóz sóılep, bul sharanyń el ómirindegi mańyzyna erekshe toqtalyp ótti.
«Qoınaýy qutqa tolǵan, baýraıy jurtqa tolǵan Tarbaǵataıdyń eńisin jaılaǵan Aqsýat jeri – halqymyzdyń tarıhy men taǵdyrynda aıryqsha orny bar qasıetti meken. Eldiń sózin sóılep, ult rýhanııatyn baıytqan, túgin tartsa maı shyǵyp, tasyn túrtse tarıh sóıleıtin bul óńir talaı taý tulǵany dúnıege ákelgen taǵylymdy ólke. Sondyqtan búgingi bas qosýdyń dál osy qasıetti topyraqta ótýiniń ózindik máni bar. Memleket basshysy Qasym-Jomart Kemeluly Toqaev: «Biz otanshyl jáne memleketshil bolýymyz kerek. Shyn máninde, týǵan jerińdi súıýden asqan baqyt joq. Júregi Otanym, Elim, Jerim dep soqqan adam eshteńeden qaımyqpaıdy», – dep atap ótken bolatyn. Osyndaı elin súıgen, eli súıgen azamattar bizdiń ortamyzdan tabylyp otyr. Dástúrli túrde ótkizilip kele jatqan dúbirli toıdyń shashbaýyn kótergen atymtaı jomart jandarǵa, jerlesimiz Dýlat Tastekeevke jáne Qaıyrly Hasenovke barsha aýdan, oblys jurtshylyǵy atynan alǵysymdy bildiremin! Bıyl bul festıvaldiń mańyzy burynǵydan da arta tústi. О́ıtkeni, «Asyl besik – Aqsýat» festıvali respýblıkalyq deńgeıde ótkiziletin mádenı-kópshilik is-sharalar tizbesine engizilip, keń kólemde atalyp ótýde. Bul – Aqsýat óńiriniń tarıhı-rýhanı áleýetine berilgen joǵary baǵa. Festıval baǵdarlamasynyń óz bastaýyn halqymyzdyń ardaqty perzenti, eldik pen erliktiń sımvolyna aınalǵan Yrǵyzbaı ata kesenesinen alýy – ótkenge taǵzym men rýhanı sabaqtastyqtyń aıqyn belgisi. Osymen toǵyzynshy ret uıymdastyrylyp jatqan festıval ulttyq sport pen sport pen ónerdi, bilim men mádenıetti bir arnaǵa toǵystyryp otyr», dedi aımaq basshysy.
Is-shara barysynda uıymdastyrýshylar kóp balaly anaǵa páter kiltin tapsyrdy. Sondaı-aq, «Tarbaǵataı tarlany», «Asyl ana», «Asyl tas» medaldary, eki stýdentke grant berildi.
Ulytaýda respýblıkalyq etnomádenı festıval ótedi
Bıylǵy festıval aıasynda alǵash ret respýblıkalyq deńgeıdegi toǵyzqumalaq týrnıri jalaýyn jelbiretti. Sondaı-aq, qazaq kúresinen ASSYL ARLAN týrnıri, ASSYL TULPAR báıge jarystary, aýdaryspaq saıysy jáne «Artyq bilim – kitapta» oblystyq zııatkerlik baıqaýy uıymdastyrylyp jatyr.
ASSYL ARLAN týrnırinde ógiz palýan men túıe palýan anyqtalsa, ASSYL TULPAR aıasynda 25 shaqyrymdyq alaman báıge, 15 shaqyrymdyq top báıge jáne 20 shaqyrymdyq «Aqsýat arǵymaǵy» jarysy ótedi.
Úsh kún boıy úzilmeıtin festıval shymyldyǵy Yrǵyzbaı ata kesenesindegi taǵzym sharalarymen ashyldy. Budan bólek, baǵdarlamada ulttyq sport básekeleri, túrli mádenı-kópshilik sharalar men teatrlandyrylǵan qoıylymdar qarastyrylǵan. Merekelik kesh aıasynda ASSYLTAS teatrynyń «Aýyl keshi kóńildi» atty mýzykalyq týyndysy sahnalyp, shara záýlim gala-konsertke ulasady.