ASTANA. 30 naýryz. Qyzylorda turǵyny Gúlnar Alekpaeva óziniń konstıtýsııalyq quqyǵynyń qorǵalýyna zańdyq negizde yqpal etken qala prokýroryna alǵys bildirdi. Bul týraly qalalyq prokýratýranyń baspasóz qyzmetine silteme jasap, egemen.kz tilshisi habarlady.
G.Alekpaeva: «Men jalǵyz basty, eki balaly anamyn. Eki balam da jumysta joq. Úıde jumys isteıtin men ǵana. Tek meniń aılyq tabysymmen kún kórip otyrmyz. Osylaı júrgende, «Sentrkredıt banki» 2002 jyly shyqqan atqarý paraǵy oryndalmaı qaldy dep (ol atqarý qujatyndaǵy sýmmany bank ókilderi tolyq alǵanyna qaramastan) Qyzylorda oblysy boıynsha jeke sot oryndaýshysy K.Desıatnıchenkoǵa tapsyrǵan. K.Desıatnıchenko óz kezeginde 2015 jylǵy 22 qańtar kúni meniń ústimnen zańsyz atqarýshylyq is júrgizý óndirisin qozǵap, aılyq tabysymnyń 50 paıyzyna shekteý jasap, bankiniń paıdasyna óndirý týraly qaýly qabyldap, meniń jumysyma, esep bólimine jibergen. Ol qaýly býhgalterııaǵa aqpan aıynyń aıaǵynda kelgen. Sodan býhgalterııa meniń eki aılyq aqshamnyń 50 paıyzyn sot oryndaýshyǵa aýdaramyz deıdi. Aldyńǵy qańtar aıynda aılyq bermeı keshiktirgen. О́zimiz azyq-túlik, basqa da qajetterimizge kerekti aqshany qaryzǵa alǵanbyz. Onyń ústine myna sot oryndaýshysynyń qaýlysy maǵan jaı túskendeı áser etti. Sebebi, sot oryndaýshysynyń qaýlysynda kórsetilgen somany tólep qutylý úshin 3 jyl kerek eken. Ári qaraı 2 balammen qalaı ómir súrem dep basym qatty», deıdi.
Osylaısha, áıel Qyzylorda qalalyq prokýratýrasyna júginedi. Mundaǵylar áıeldiń jaı-kúıin túsinip ári zańdyq turǵyda áreket etip, shaǵymdanýshynyń quqyǵyn qorǵap beredi. Osydan keıin baryp kóńili jaılanǵan ana qala prokýroryna: «Bank pen sot oryndaýshy meniń konstıtýsııalyq quqyǵymdy buzyp otyrǵanyn aıtyp, kómektesýlerińizdi surap 2015 jyldyń 26 aqpanynda sizge aryz jazǵanmyn. Osy aryzymnyń negizinde sizdiń qaramaǵyńyzdaǵy qyzmetkerler jedel túrde shaǵymymdy qarap, zańsyz shyǵarylǵan sot oryndaýshynyń qaýlysyn buzdyryp, aılyǵymdy ustatpaı, ózimde qaldyrýǵa járdem berdi. Joǵaryda aıtylǵandar negizinde sizden suraıtynym, meniń aryzymdy qaraǵan qyzmetkerlerińizge sheksiz alǵysymdy jáne qarapaıym halyqtyń muń-muqtajyna osylaı jedel túrde kómek bere berýlerine tilektestigimdi jetkizseńiz» dep hat jazǵan.
Joldybaı Bazar.
Derek: Qyzylorda qalalyq prokýratýrasy.
Sýret: i-news.kz.