Memleket basshysy Nursultan Nazarbaev «Qazatomónerkásip» UAK» AQ basqarma tóraǵasy Nurlan Qapparovty qabyldady, dep habarlady Prezıdenttiń baspasóz qyzmeti.
N.Qapparov Memleket basshysyna kompanııanyń transformasııa baǵdarlamasy aıasynda júrgizip jatqan jumysy týraly baıandady, sondaı-aq, onyń jańartylǵan damý strategııasyn tanystyrdy.
Qazaqstan Prezıdenti ýran ónerkásibi elimizdegi negizgi salalardyń biri ekenine jáne álemdik naryqta eleýli orynǵa ıe bolyp otyrǵanyna toqtaldy.
Bul rette Nursultan Nazarbaev ýran óndirisin tıimdi baqylaýdy qamtamasyz etý qajettigine, sheteldik jetekshi kompanııalarmen ózara tıimdi yntymaqtastyq ornatýdyń jáne birlesken jobalardy júzege asyrýdyń mańyzdylyǵyna nazar aýdardy.
N.Qapparov qazirgi kezde Qazaqstan jalpy álemdik kólemdegi ýran óndirisiniń 40 paıyzyn qamtamasyz etip otyrǵanyn aıtty. Kompanııanyń aldynda turǵan negizgi mindetterdiń biri ıadrolyq otyn jetkizý salasyndaǵy kóshbasshylardyń birine aınalý bolyp otyr.
«Qazatomónerkásip» UAK» AQ basqarma tóraǵasy kompanııanyń jańartylǵan damý strategııasy halyqaralyq konsýltanttardyń atsalysýymen ázirlengenin, ınvestısııalyq jáne operasııalyq qyzmettiń tıimdiligin, sondaı-aq, eńbek ónimdiligin arttyrýdy kózdeıtinin atap ótti.
Kezdesý qorytyndysy boıynsha Memleket basshysy birqatar naqty tapsyrma berdi.