Keshe Reseı Federasııasynyń Sankt-Peterbýrg qalasynda ShYU-ǵa múshe memleketter Qorǵanys mınıstrleriniń keńesi ótti. Oǵan Qazaqstan Respýblıkasynyń Qorǵanys mınıstri Imanǵalı Tasmaǵambetov qatysty, dep habarlady QR Qorǵanys mınıstrliginiń baspasóz qyzmeti.
I.Tasmaǵambetov ShYU-ǵa qatysýshy elder arasyndaǵy ózara is-qımyl deńgeıi qanaǵattanarlyq dep atap ótti. «Biz bul uıymdy nyǵaıtý men damytýǵa, ShYU mánisin arttyrýǵa nıettimiz. Osyǵan baılanysty Astanada 2016 jyldyń mamyrynda kelesi keńesti ótkizý týraly qazaqstandyq bastamanyń qoldanylýyna úmittenemiz».
Qorǵanys mınıstrleri keńesiniń qorytyndysy boıynsha delegasııa basshylarymen usynylǵan qujattarǵa qol qoıyldy jáne bekitildi.
Sol kúni qazaqstandyq delegasııanyń QHR qorǵanys mınıstri general-polkovnık Chan Vansıýanmen ekijaqty kezdesýi ótti. Qytaı Halyq Respýblıkasymen yntymaqtastyqty nyǵaıtý jáne keńeıtý Qazaqstannyń basty strategııalyq basymdyqtarynyń biri bolyp tabylady.
– 2014 jylǵy Qytaı tarapymen uıymdastyrylǵan oqý-jattyǵý joǵary deńgeıdi jáne atalǵan oqý-jattyǵýdyń sátti ótkizilýin kórsetti. Onda bizdiń bólimsheler kúrdeli jaǵdaıda ártúrli tapsyrmalardy birlesip oryndaý elementterin pysyqtady. Sonymen qatar, aǵymdaǵy jyldyń qyrkúıek-qazan aılarynda bizdiń memleketterimizdiń aýmaǵynda lańkestikke qarsy alǵashqy ekijaqty rotalyq-taktıkalyq oqý-jattyǵýdy ótkizý qaýipsizdik qaterlerine birlesip den qoıý kezinde bólimshelerimizdiń ózara is-qımyl jáne mashyq deńgeıin arttyrady. Odan ózge, osy jyldyń maýsymynda Qazaqstannyń aýmaǵynda ótken tank bıatlony boıynsha álem chempıonatyna tank ekıpajdarynyń birlesken daıyndyǵy da mańyzdy bolyp tabylady, dedi kezdesýde Qazaqstan Respýblıkasynyń Qorǵanys mınıstri Imanǵalı Tasmaǵambetov.