Qazaqstan Respýblıkasy Parlamenti Senatynyń Tóraǵasy Qasym-Jomart Toqaev Kýba Respýblıkasy Syrtqy ister mınıstriniń orynbasary Rohelıo Sıerra Dıasty qabyldady, dep habarlady Senattyń baspasóz qyzmeti.
Q.Toqaevtyń aıtýynsha, bizdiń elimizdiń táýelsizdigin tanýdaǵy álemdegi alǵashqy elderdiń biri bolǵan Kýbanyń sheshimine Qazaqstanda rızashylyqpen qaraıdy. Tóraǵa 1995 jyly Syrtqy ister mınıstri retinde Gavanaǵa saparyn jáne Komandante Fıdel Kastromen kezdesýin jyly shyraımen eske aldy. Q.Toqaev ózara tıimdi yntymaqtastyqty keńeıtý úshin Qazaqstan men Kýba qatynastarynyń barlyq múmkindikterin paıdalaný, onyń ishinde parlamentaralyq baılanystardy damytý, densaýlyq saqtaý, mádenıet, bilim berý, týrızm jáne aýyl sharýashylyǵy salalary boıynsha iskerler arasyndaǵy baılanystardy údetý qajet dep sanaıdy. Parlamenttiń joǵary palatasynyń basshysy kýbalyq kompanııalardy Astanada ótetin EKSPO-2017 kórmesine qatysýǵa shaqyrdy.
Senat Tóraǵasy Qazaqstan Prezıdenti Nursultan Nazarbaevtyń aldaǵy Kýbaǵa sapary ekijaqty qatynastardaǵy tarıhı oqıǵaǵa aınalyp, oǵan eleýli serpin beretinine senim bildirdi.