ASTANA. 19 mamyr. Ispanııada kelimsekten onyń búıregin satyp almaq bolǵan 5 adam tutqyndaldy. Kúdiktiler bul saýda úshin sheteldikke 6 myń eýro tóleýge kelisken. Bul týraly Yahoo News-ge silteme jasap, lenta.ru habarlady.
Polıseılerdiń aıtýynsha, búırek – tonaýmen aınalysatyn jergilikti qylmystyq toptyń basshysyna qajet bolǵan. Ol atalǵan adam múshesin zár shyǵarý júıesi buzylǵan uly úshin satyp alǵysy kelgen.
«Medısınalyq tekseris kezinde kelimsek bul kelisimnen bas tartýǵa tyrysady. Alaıda, qylmystyq top ony urlap áketip, uryp-soqqan. Tipti kelispese óltirýden de taıynbaıtyndaryn eskertken», – deıdi Ispanııa polıseıleri. Olar bul isti Germanııa jáne Belgııa saqshylarymen birlesip tergegenin aıtty.
Aıta keteıik, Eýropalyq odaqqa múshe elder 14 naýryzda adam múshelerin satýǵa qarsy halyqaralyq kelisimshartqa qol qoıdy. Eýropalyq keńestiń málimdeýinshe, jyl saıyn osyndaı «kásipten» satýshylar 1,2 mlrd. dollar kóleminde tabys tabady eken.
Elaman Qońyr.
Derek, sýret: lenta.ru.