Qazir qaıda júrsem de meni astanalyq deıdi. Sebebi, Astana astana bolǵaly beri Astanada júrmin. Astanada azamat bolyp qalyptastym. Arý qaladaǵy eńbek jolymdy qurylysta qarapaıym jumysshydan bastap, shúkir búgin, memlekettik qyzmettiń bir tutqasyn ustaǵan qaıratkerlikke qadam basyp baramyn. Meni bul qutty qadamǵa baǵyttaǵan Elbasy Nursultan Nazarbaev. Qaımana Qazaqstan halqy tuńǵysh ret 1991 jyly óz qalaýy men tańdaýyn jasap, Nursultan Nazarbaevty Prezıdenti etip saılaǵanda, Tuńǵysh Prezıdentpen kezdesýge qatysqan tuńǵysh stýdentter qatarynda bolý baqyty buıyrdy. Kezdesýdegi Elbasynyń el týraly tolǵaǵan óreli sózderi sanamdy keskileı otyryp, jan-júregime óshpesteı bolyp kestelendi. Tuńǵysh Prezıdenttiń qoshtasarda bergen kórkem qoltańbasy arman-qııalyma qanat bitirdi. Eldiktiń mán-mańyzyn, ǵumyrdyń mazmunyn sonda uqtym. Elbasy elimizdi órkendetýdiń tetigi tek qana bilimdi jastardyń qolynda ekenin tereń uńǵyp túsindirdi. Osy ımandy jolda aıanbaı ilim-bilim jınap, elimizdi damyǵan elderdiń qataryna qosyp, memleket áleýetin kóterý úshin tynym tappaı eńbek etý kerektigin mıymyzǵa myqtap shegeledi. Sol madaqty kezdesýde júrekke qonǵan, sanaǵa sińgen qońyr áýendi sózder áli kúnge alǵa jetelep keledi, deıdi Baıtaq Tórehanov.
Qazir Astana dese búkil ǵalam nazar aýdaratyn kún de jetti. Sebebi, Astana az ǵana ýaqyttyń ishinde búkil álemdegi sony jańalyqtardy boıyna jınap, olardy saralaı kelip, tushymdy pikir bildiretin irgeli astanalar qatarynan óz ornyn alǵan qýatty qalaǵa aınalyp úlgerdi. Elimizdiń mádenı-rýhanı ordasy ǵana emes, jalpy adamzattyq máselelerdiń mánisine mánerlep taldaý jasaıtyn, álemdik tulǵalardyń bas qosatyn ortalyqtarynyń biri bolyp otyr. Adamzattyń ıgiligi úshin jasalatyn san aýlan kelisimder men tujyrymdardy túzip, memleketter ustanymynda mámilegerlikti ustyn etkizgen Astana bul deńgeıge bir demde kóterile qoıǵan joq. Qysqa, biraq mazmuny ǵalamat keń táýelsizdik tarıhyna tereńdep baryp zer sala qarasaq, Elbasymyzdyń eren kóregendiginiń kýási bolasyz. Osydan, sol «tar jol, taıǵaq keshýde» tógilgen eseli eńbekterdiń ólshemin qalaı baǵamdaımyz degen aıpara oı árdaıym tolǵandyrady.
Elbasy bireý – halqy tireý bolyp bastaǵan san alýan izgi isterdiń soqpaqtarynda myńdaǵan qarapaıym qazaqstandyqtardyń, ultjandy, ulaǵatty azamattardyń qoltańbasy menmundalap tur. Olardyń qatarynda Baıtaq Ádephanuly da júr. Onyń úsh birdeı joǵary bilimi bar. Áýeli jas jany qalaǵan Qazaq memlekettik sáýlet-qurylys akademııasynyń «О́nerkásiptik jáne azamattyq qurylys» fakýltetinde bilim aldy. Mamandyǵy boıynsha qyzmet ete júrip, Dinmuhamed Qonaev atyndaǵy ýnıversıtettiń «Zańger» bóliminde oqýyn jalǵastyrdy. Bilimge qushtar jan eki birdeı dıplomdy mise tutpaı, Qazaq qatynas joldary ýnıversıtetindegi «Tasymaldaýdy, jol qozǵalysyn uıymdastyrý jáne kólikti paıdalaný» boıynsha oqyp, úshinshi mamandyqty da meńgerip shyqty. Eńbek jolyn ádepki mamandyǵy boıynsha «Almatyqalaqurylys», «Aqmolaqalaqurylys» kompanııalarynda bastady. Ádilet organdaryndaǵy qyzmetine 2000 jyly Ádilet mınıstrligi Tirkeý qyzmeti komıtetiniń «Astana qalasy boıynsha jyljymaıtyn múlik ortalyǵy» RMK-nyń jyljymaıtyn múlikti tirkeý bóliminiń bas mamany retinde kiristi. Sodan beri ádilet salasynyń qıyn da qyzyqty qyzmetinde túrli laýazymdarda jumys istep keledi.
Bilikti maman qaıda da qajet. Dál osy memlekettik jáne qoǵamdyq qyzmetti Almaty oblysy boıynsha atqaryp otyr. Bizben syr bóliskendegi sebebi, týǵan óńirinde júrse de azamat bolyp qalyptasqan Astanany qatty saǵynypty. «Buryn qalaı baıqamaǵanmyn, azamattar aıtyp jatatyn, Almatyǵa kelip bir aı aıaldasaq, Astanany saǵyna bastaımyz dep. Jer jánnaty Jetisýǵa kelsem de Astanaǵa ańsarymnyń aýa beretini nesi!», dep qoıady Baıtaq. Azamattyń boıyndaǵy bul ińkár sezim ananyń súti, ákeniń tárbıesimen súıekke sińgen qasterli qasıet bolar bálkim. Ákesi Ádephan Tórehanuly belgili qalamger, aqyn, etnograf, ulaǵatty ustaz. Anasy Rysjan da uzaq jyl pedagogıka salasynda eńbek etken ardager. Osy izgi tálimger jandardyń tárbıesin ǵumyrlyq qaǵıdatyna aınaldyrǵan Baıtaq Astana kúnine oraı Astanaǵa degen ińkár sezimin astanalyqtarǵa joldap otyr.
Jary Ǵalııa ekeýi búginde úlgili otbasy. Olardyń shańyraq shattyqtary da Astana qalasymen tyǵyz baılanysty. Kún saıyn túlegen qalamen birge Baıtaqtyń da otbasynda dúrkin-dúrkin qýanyshtar bolyp jatady. Uldary Tolaǵaı men Tolym Astana qalasyndaǵy Jambyl atyndaǵy qazaq gımnazııasyn úzdik bitirip, búginde qoǵamymyzdyń damýyna óz úlesterin qosyp júr. Al Shuǵyla degen qyzdary Seleznev atyndaǵy Almaty horegrafııa ýchılıshesinde bilim alyp, talaı halyqaralyq baıqaýlarda baǵyn synap, ata-anasynyń kóz qýanyshyna aınalǵan. О́ner jolyndaǵy onyń alar asýlary áli alda. Arman qýǵan jastardyń baqytynyń bastaýy bolǵan Astana qazaq halqynyń ór rýhy men darqandyǵynyń sıpaty syndy. Búginde keshegi arman qýyp aýyldan attanǵan bala Baıtaq syndy san myńdaǵan qazaq jastarynyń bar maqsaty men múddeleri toǵysar núktesine aınalǵan arman qala Astana ýaqyt legimen birge asqaqtap, táýelsizdigimizdiń máńgiligin pash etip, eńselene beretini aqıqat.
Nurbaı ELMURATOV,
«Egemen Qazaqstan».