О́skemendegi B.Aleksandrov atyndaǵy sport saraıynda shaıbaly hokkeıden «Juldyzsha» oblystyq týrnıri jalaýyn kóterdi. Shyǵys óńiriniń oqýshylary arasynda úshinshi márte uıymdastyrylyp otyrǵan týrnır Jeńistiń 70 jyldyǵyna arnalady.
«Juldyzsha» týrnıri ilkidegi «Altyn shaıbanyń» balamasy ispetti. Týrnırdiń negizin qalaýshy – «Altyn shaıba» klýbynyń tóraǵasy, ataqty bapker Anatolıı Tarasov. «Altyn shaıba» – balalar arasyndaǵy aýqymdy týrnırdiń biri bolǵany, bastaýyn 1964 jyldyń jeltoqsanynan alatyny jankúıer qaýymǵa belgili. Insbýrgte ótken Olımpıada oıyndaryndaǵy jeńisten soń KSRO quramasynyń hokkeıshileri «Pıonerskaıa pravda» gazeti ujymynyń shaqyrtýyn qabyl alyp, redaksııaǵa keledi. Árıne, qurqol emes. Ańyzǵa aınalǵan hokkeıshi Venıamın Aleksandrov tilshilerge kanadalyqtardyń qaqpasyna soǵylǵan, Olımpıada altynyn ápergen shaıbany tartý etedi. «Altyn shaıbany» ótkizý ıdeıasy sol kezde paıda bolǵan eken. Jalpy, «Altyn shaıbaǵa» Z.Bılıaletdınov, V.Myshkın, B.Aleksandrov, V.Krýtov, V.Fetısov syndy tanymal hokkeıshiler qatysty. О́skemendik hokkeıshiler búkilodaqtyq saıystardyń júldegeri atanǵany da jankúıerlerdiń jadynda. 2000 jyly elimizdiń Bilim jáne ǵylym mınıstrligi Ulttyq deneshynyqtyrý ǵylymı-tájirıbelik ortalyǵy balalar arasyndaǵy tanymal hokkeı týrnıri «Juldyzshany» qaıta jańǵyrtty.
– Bizdiń bul týrnırdi Jeńistiń 70 jyldyǵyna arnaýymyz beker emes. Týrnırdi tamashalaýǵa kelgen ardagerler, qarııalar qazaqstandyq hokkeıdiń gúldengen kezeńiniń kýási bolǵan jandar. Olar О́skemen shaharynyń otandyq hokkeıdiń ordasy bolǵan shaǵyn kórdi. Búginde memleket, jergilikti atqarýshy bılik tarapynan hokkeıdi damytýǵa qolaıly jaǵdaı jasalýda. О́skemende 2 muz kesheni salyndy. Týra osy ispetti nysandardy jaqynda Zyrıan men Rıdder qalalarynyń sportshy jetkinshekterine syıǵa tartamyz, – dedi týrnırdiń ashylý saltanatynda oblys ákiminiń orynbasary Jaqsylyq Omar.
Dýman ANASh,
«Egemen Qazaqstan».
О́SKEMEN.