AQTAÝ. 19 mamyr. Mańǵystaý oblysy Jańaózen qalasynda qarýlanǵan úsh jigit býkmekerlik keńsege shabýyldady. Bul týraly lada.kz saıtyna silteme jasap, egemen.kz tilshisi habarlady.
Qylmys Jańaózen qalasyndaǵy 4-shi shaǵyn aýdanynda ornalasqan Inbet býkmekerlik keńsesinde bolǵan. Oqıǵa ornyna kelgen shuǵyl-zertteý toby maska kıip, qarýlanǵan 3 jigittiń keńsege basyp kirip, ondaǵylardy qorqytyp, kassadaǵy barlyq aqshany berýin talap etkendigin anyqtady.
Qaraqshylar 15 myń teńge kóleminde aqshany alyp ketken. Olardyń bireýi oıyn ústeli mańyndaǵy jastarǵa qaraı oq atqan. Saldarynan jaraqattanǵan 23 jáne 24 jastaǵy eki jigit Jańaózen qalalyq aýrýhanasyna jetkizildi. Búginde olar travmatologııa bóliminde em-dom qabyldaýda. Qańǵyǵan oq biriniń jambasyna tıse, ekinshisiniń qolyn jaraqattaǵan.
Qazirgi tańda bul iske qatysty naqty derekter joq. Tergeý amaldary júrgizilýde.
Gúlaıym Shyntemirqyzy.
Derek, sýret: lada.kz.