Jibek joly aýylyndaǵy «Jámılaǵa» bas suqpaý múmkin emes. Jámılamyz osyndaǵy jıHaz fabrıkasynyń ásem dúkeni. Zamanaýı saýda úıinde negizinen ofıstik jabdyqtar ornalasqan. «Ine-jipten» jańa shyqqan ústelder, oryndyqtar, kreslolar túr-túrimen kóz tartady. Sondaı-aq, seıfter, otqa tózimdi shkaftar, temirden ıilgen kıim ilgishter, tipti, medısınalyq qoraptar túr-túrimen tizilipti. Bir qaraǵanda bul tańsyq dúnıeler de emes. Másele atalǵan buıymdardyń Jibek jolynda jasalýynda bolyp tur.
«Jámıla» JShS dırektory Qaırat Begalınniń aıtýynsha, jeke kásiporyn ashý ıdeıasy kezdeısoq emes sııaqty. Buǵan deıin olar jıHaz jabdyqtarymen qatar plastmassa jáne teri-galantereıa buıymdaryn kóterme-bólshek saýda aınalymyna shyǵarýǵa mamandanǵan otandyq belgili «Zeta» kompanııasymen áriptestik baılanys ornatyp, birshama tájirıbe jınaqtaǵan.
Elimizdiń barlyq óńirlerinde jurtshylyq iltıpatyna ilingen almatylyq kompanııanyń ónimderi joǵary suranysqa ıe. Aqyry Qaırattyń komandasy áriptestik sheńberin keńeıtip, ónimdi ózderi shyǵarý arqyly taýarlar qunyn arzandatýdy uıǵarǵan. Sóıtip, aýmaǵy 2 myń sharshy metrlik kásiporynnyń qurylysyna 70 mıllıon teńge qarjy quıyldy. Jyl ishinde 33 mıllıon teńgeniń 157 dana dúnıesi shyǵarylýy bul qadamnyń sáttiligin aıqyndaıdy. Qazir «Jámıla» seriktestigi, «Zeta» fırmasynan jetkiziletin taýarlardy qosqanda 1,5 myńdaı ataýdaǵy múlikti saýdaǵa shyǵaryp júr. Eń bastysy, jergilikti 127 turǵyn turaqty jumys ornyn tapqan.
Aýyl jigitteriniń batyldyǵy ıgi maqsatqa jol ashqanyna súısinesiń. Mundaǵy basty tirenish – sapa kórsetkishteriniń joǵarylyǵy. Sondyqtan tapsyrys berýshiler de kóbeıe túsken. Olardyń qatarynda talǵampaz astanalyqtardyń qatary qalyńdaý ekendigin baıqadyq. «Jámıla» ónimderiniń baǵasyna kelsek, aýzymyzdan «bárekeldi» shyǵady. Qarańyz. Máselen, mektep oqýshysynyń ústeli men oryndyǵynan turatyn jıyntyq orta eseppen segiz myń teńge turady. Búgingi jıHaz dúkenderinen mundaı baǵaǵa tushymdy dúnıe taba alar ma ekensiz? Buǵan qosa, seriktestik jeke tapsyryspen de jıHazdardy qııalyńyz jetken kórkemdikpen daıyndaı beredi.
Jumys isteı bastaǵanyna bir jyl endi tolǵan aýyl kásiporny úshin bul aıta qalarlyqtaı jetistik. Fabrıka basshylyǵy aldaǵy eki jylda kásiporyndy tolyq jobalyq qýatyna qosýdy josparlap otyr. Bul degenińiz JShS jylyna 180 myń dana buıym shyǵaryp, jumyskerler sanyn 200-ge jetkizedi degen sóz.
«Aqmola-medıa ortalyǵy» uıymdastyrǵan baspasóz-týry barysynda Jibek jolyndaǵy ındýstrııalandyrýdyń ekinshi besjyldyǵy aıasynda jumys bastaǵan taǵy bir kásiporynda boldyq. «Qaz-Art» Qazaqstan kórkem kombınaty» ataýyndaǵy jaýapkershiligi shekteýli seriktestik dızaın, jobalaý, eskertkishter, bıýstter, qulpytastar daıyndaýmen aınalysady eken. Jobanyń jalpy quny – 400 mıllıon teńge. Qazir munda negizgi sehtar qurylysy aıaqtalyp, jabdyqtar ornalastyrylýda.
Údemeli ındýstrııalyq-ınnovasııalyq damý baǵdarlamasyndaǵy jańa kásiporyn jylyna 400 tonna quıma buıymdaryn daıyndaıdy, deıdi «QazArttyń» bas dırektory Sapar Shaımardanov. Kombınattyń ashylýy kásiporynnyń joǵary sapaly kórkem buıymdar naryǵyndaǵy múmkindigin keńeıte túsedi. О́ndiristik jańa órleý aqmolalyq tapsyrys berýshilermen ǵana emes, elimizdiń ózge óńirlerindegi, TMD aýmaǵyndaǵy áriptestermen baılanysymyzdy nyǵaıtyp, jergilikti sýretshilerdiń, sáýletshilerdiń, dızaınerlerdiń shyǵarmashylyq belsendiligin arttyrady. Bizdiń jobalaýymyz boıynsha, osyndaǵy 50 adamnyń aılyq jalaqysy 100 myń teńgeden kem bolmaıdy.
Arnaıy taqtada Astana qalasynan, basqa da oblystardan tapsyrys berýshilerdiń tizimi, ony qaı merzimde daıyndaý kerektigi jazylyp qoıylypty. Osyǵan qarap kombınattyń bolashaǵyn baǵamdaýǵa bolatyndaı. Sóz arasynda, Kókshetaý qalasynda ornatylatyn Keńes Odaǵynyń Batyry, áıgili ǵalym Málik Ǵabdýllınniń 3,5 metrlik eskertkishi daıyndalyp jatqanyn jetkizgimiz keledi. Shyǵarmashylyq ujym aldyn ala ashyp aıtpaǵanymen, Qazaq handyǵynyń 550 jyldyǵyna, Uly Jeńistiń 70 jyldyǵyna, basqa da merekelik saltanattarǵa qatysty izdenis ústinde ekendigin ańǵardyq.
Baqbergen AMALBEK,
«Egemen Qazaqstan».
Aqmola oblysy,
Arshaly aýdany.