AQTAÝ. 1 sáýir. Mańǵystaýda teńizdegi Qazaqstan aýmaǵyn zańsyz kesip ótip, balyq aýlaǵan sheteldik brakonerler ustaldy. Bul týraly tumba. kz habarlady.
«Taraz» shekara kemesine mingen «Jaǵalaý kúzeti» aımaqtyq basqarmasynyń shekarashylary kezekti reıd júrgizdi. Reıd barysynda Kaspıı teńizin zańsyz kesip ótip, Qazaqstan aýmaǵynan balyq aýlaǵan brakonerlerdi baıqaǵan. Zań buzýshylar bizdiń shekarashylardy kórisimen, qaıyqtarynyń jyldamdyqtaryn arttyryp, oqıǵa ornynan boı tasalaýǵa tyrysty. Qazaqstan shekarasynan shyǵyp ketýdi oılaǵan brakonerlerge shekarashylar eskertý oǵyn atýǵa májbúr bolǵan. Aspanǵa eki ret atylǵan eskertý oǵynan soń, Ázerbaıjannyń 4 azamaty qolǵa tústi. Olardy tintý barysynda, «Baıda» jeńil qaıyǵy, 28 tyıym salynǵan balyq aýlaý quraldary jáne jalpy salmaǵy 946 kg. quraıtyn 240 dana bekire tárkilendi.
Qazirgi tańda brakonerlerge qatysty memlekettik shekarany buzý jáne brakonerlik baptary boıynsha qylmystyq is qozǵalyp, tergeý amaldary júrýde. Qolǵa túsken Ázerbaıjan azamattary Aqtaý qalasyndaǵy ýaqytsha tergeý ızolıatoryna qamaldy.
Gúlaıym Shyntemirqyzy.
Derek, sýret: tumba. kz.