Qyzylordada shyny shyǵaratyn zaýyt salynady degeli biraz ýaqyt bolǵan edi. Tutas aımaq úshin ǵana emes, respýblıkaǵa zor paıda ákeletin jobanyń qurylysyn taǵatsyzdana kútkender kóp. Degenmen, ártúrli jaǵdaılarǵa baılanysty osy bir alyp qurylystyń bastalýy keıinge shegerile berdi. «Sabaqty ıne sátimen» deıdi ǵoı dana halqymyz. Sol aıtqandaı, shyny zaýytynyń qurylysy bıyl bastaldy.
Bul ne joba? Qandaı paıdasy bar? Endi az-kem osy jaıyna toqtala ketelik. Zaýyt iske qosylǵanda tabaqsha shynylar shyǵara bastaıdy. Onyń ónimi ártúrli bolmaq. Tipti, uıaly telefonnyń betine qoıylatyn shynyǵa deıin shyǵara alady. Nemis tehnologııasymen salynatyn zaýyt barlyq zamanaýı qural-jabdyqtarmen qamtylmaq. Zaýyttyń bir kúndik qýattylyǵy 600 tonna shyny shyǵarýǵa jetedi. Iаǵnı, bul – jylyna 197 100 tonna tabaqsha shyny shyǵady degen sóz.
Zaýyt qurylysyn iske asyratyn strategııalyq ınvestor retinde AQSh-tyń «Steward Engineers» kompanııasy tańdap alynǵan. Atalǵan kompanııa «Qazaqstannyń ınvestısııalyq qorymen» birigip qurylystyń 20 paıyzyn qarjylandyryp otyr. Al qalǵan qarajatty «Qazaqstannyń Damý banki» óteıdi. Jobanyń jalpy quny – 52,1 mıllıard teńge.
Shyny zaýytynyń qurylysy úshin Qyzylorda qalasyndaǵy ındýstrıaldy aımaqtan 50 gektar jer bólindi. Oblys bıýdjetinen onda ınfraqurylymdyq jumystar júrgizildi. Aıtalyq, gaz, sý jelisi, telefon symdary, avtomobıl joldary men káriz júıeleri tolyqtaı jasaldy. Tehnıkalyq-ekonomıkalyq negizdemesi men jobalyq-smetalyq qujattary tolyq daıyndalǵan. Memlekettik saraptama jasalyp, qajetti kelisimderge qol qoıylǵan. Zaýyttyń jobasy maquldandy. Búginde qurylys jumystary bastalyp ketti.
Kásiporyn iske qosylǵanda 300 adam jumyspen qamtylady. Al qurylys jumystary kezinde 200 adam jumysqa tartylady.
Jospar boıynsha zaýyt 2017 jyldyń qazan aıynda iske qosylmaq.
Erjan BAITILES,
«Egemen Qazaqstan».
QYZYLORDA.