Demeýshi

El ishinde kásipker kóbeıdi. Olardyń árqaısysy ár saladan ártúrli tabys tabady. Ara­synda eldiń ónerin qoldaýǵa qaltasynan qarjy shyǵaratyny neken-saıaq. Desek te, jyl saıyn sýretshilerdi jańa týyndylar jasaýǵa yntalandyratyn ká­sipkerdiń biri – Nurbergen Dáý­le­tov. Onyń qomaqty tabys túsiretin zaýyty da, sehy da joq. Nurbergenniń negizgi kásibi – «Aq jelken» shyǵarmashylyq ortalyǵy arqyly quralady. Sol ortalyqta qolóner sheberleriniń kórmesin jıi ótkizedi. Qolóner sheberleriniń týyndylaryn nasıhattaıtyn «Altyn qaıyq» atty gazet shyǵarady. Árıne, budan qomaqty tabys túsirý múmkin bola qoımas. Degenmen, ol 2011 jyldan beri qolóner sheberleriniń arasynan tańdalǵan eń úzdik týyndyǵa «Altyn qaıyq» syılyǵyn berip keledi. Byltyr bir top áriptesteri arasynan úzdik týyndysymen daralanǵan batysqazaqstandyq Erǵalı Bekeshovke «Altyn qaıyq» statýetkasymen birge 1 mıllıon teńge qarjylaı syıaqy berdi. «Altyn qaıyq» atalymynyń bas júldesi qaıyq ústindegi qyz beınelengen altyn statýetka. Onyń salmaǵy – 976 gramdy quraıdy jáne 24 karat taza altynmen  jalatylǵan. Osy statý­etkanyń ıdeıasy «Jeruıyq» máde­nıet ortalyǵy» qoǵamdyq qorynyń dırektory Nurbergen Dáýletov pen ónertanýshy Nurlan Bermaǵambettiń ortaq pikirinen týyndapty. Statýetkanyń belgili músinshi Serik Mátenııazovtyń qolynan shyqqan. Nurbergenniń aıtýynsha, «Altyn qaıyq» syıly­ǵyn  berýdegi basty maqsat – beıneleý óneri men qolóner sheberleriniń sheberligin arttyrý. О́ıtkeni, «Táýelsiz elimizdiń tarıhy men  mádenıetin álemdik deńgeıde tanytýǵa laıyqty úles qosatyndardyń biri – sýretshiler men qolóner sheberleri. Demek, olardy úzdik týyndylar jasaýǵa yntalandyrýymyz qajet qoı», deıdi Nurbergen Dáýletov. Ulttyq ónerdiń janashyry­na aınalǵan Nurbergen Dáýletov jaqynda taǵy da  bir top sýretshiler men qolóner sheberiniń basyn qosyp, «Altyn qaıyq» júldesin tapsyrý rásimin ótkizdi. Osy sharaǵa oraı qaltasynan 1 mıllıon teńge shyǵaryp, atyraýlyq Ádilqaıyr Jantasovqa «Úzdik keskindemeshi», batysqazaqstandyq Ashat Ábdeshovke «Úzdik grafıka», batysqazaqstandyq Tólepbergen Sarmanbekovke «Úzdik zergerlik buıym», batysqazaqstandyq Erǵalı Bekeshovke «Úzdik músin», atyraýlyq Nursultan Qalıevqa «Úzdik qolóner» atalymyna, sonymen birge, «Jyl jańalyǵy» júldesine ıe bolǵan Ádilqaıyr Jantasovqa arnaıy dıplom men árqaısysyna 120 000 teńgeniń   sertıfıkatyn tabystady. Al bas júlde – «Altyn qaıyq»   statýetka men 280 000 teńgelik qarjylaı syıaqyǵa batysqazaqstandyq zerger Tólepbergen  Sarmanbekov laıyq dep tabyldy. Ol bul kon­kýrsqa altyn jalatylǵan sáýke­leni usynǵan eken. «Men buǵan deıin osy konkýrsqa eki ret qatysqan edim. Endi, mine, úshin­shi jyly «Altyn qaıyq» júlde­sin aldym. Eńbegim jandy», dep óz qýanyshymen bólisti zerger T.Sarmanbekov. Nurbergen Dáýletovtiń ónerdi qoldaýy munymen shektelmeıdi. Budan úsh jyldaı  buryn «Saraıshyqtan Astanaǵa deıin» dep atalatyn shara ótkizýge muryndyq boldy. Sol shara aıasynda Atyraýdaǵy jeti aýdannan 140-qa jýyq qolóner sheberleriniń buıymdary jınalǵan edi. Sol sheberlerdiń qazaqtyń kúndelikti turmysyna keńinen qoldanylyp kelgen tekemet, alasha, tús kıiz, qamshy, dombyra sekildi ulttyq buıymdarynyń jasalý joldaryna kóńil aýdaryldy. El ishindegi qolóner sheberleriniń buıymdary oblys ortalyǵynda ótkizilgen kórmede tanystyryldy. Endi sol qolóner sheberleriniń  qolynan shyqqan ulttyq  buıymdar týraly arnaıy kitap daıyndalyp jatyr. – Biz ulttyq qolónerimizdiń joǵalyp ketpeýin, keıingi urpaqqa jetýin qalaımyz. Ásirese, búgin­gi jahandaný dáýirinde ult­tyq  buıymdarymyzdy tek mura­jaı­lardan kórmeı, kúndelik­ti turmy­symyzda keńinen qoldanýy­myz qa­jet, – deıdi Nurbergen Dáý­letov. – Árıne, ol úshin jas­tar­dyń ara­synda ulttyq buıym­dary­myzdyń qundylyǵy jóninde keńi­nen nasıhattaýdy kózdep otyrmyz. Onyń osy maqsatta kózdegen  jobalarynyń keıbirine toqtalar bolsaq, bıyl Atyraýda  qazaqtyń ulttyq buıymdaryn jasaıtyn qolóner sheberleriniń  sheber­lik synybyn ótkizýdi oılas­ty­rypty. Máselen, Aman Muqa­ja­nov bastaǵan zergerler  zer­ger­lik buıymdardy, Jolaý­shy Tur­dyǵulov dombyrany jasaýdyń, al Ulbolsyn Dáýlenova germanııalyq tehnologııamen tekemet basýdyń qyr-syryna qanyqtyrmaq. Osynyń bárine babalardan mıras bolǵan  ulttyq ónerimizdiń joǵalmaýyn, sóıtip, búgingi dáýir urpaǵynyń qurmetin oıatýdy armandaıtyn Nurbergen Dáýletov demeýshilik jasaǵaly otyr. Joldasbek ShО́PEǴUL, «Egemen Qazaqstan». ATYRAÝ.