Taǵy bir bel asqan qazaq qalamgeriniń halyqaralyq ataq-syılyqtaryn sanamalap shyǵýǵa qos qolyńyzdyń saýsaqtary jete qoımas. Munyń ózi Sábıt Dosanovtyń jazýshylyq abyroı-bedeliniń shekarasy barǵan saıyn keńeıe túsip otyrǵanyn aıǵaqtasa kerek ári búkil qazaq ádebıetiniń mereıi desek artyq bolmas. Al bizdiń toqtaıtynymyz – túptep kelgende, «Egemen Qazaqstan» betterinde aıtylǵan: «Kúni-búginge deıin 30 tomdaı kórkem shyǵarma jazyp-jarııalaǵan Sábıt shyǵarmashylyǵy bizdiń ulttyq ádebıetimizdiń baǵaly úlgileriniń biri» degen akademık Serik Qırabaevtyń abyz tujyrymy. Taǵdyrly jazýshynyń osynaý ádil baǵaǵa da, buǵan deıingi syıly marapattarǵa da ábden saı ekendigi keshegi keshte aıqyn kórindi.
Sábıt Aımuhanulyn sahna tórine Qazaqstan Jazýshylar odaǵy basqarma tóraǵasynyń birinshi orynbasary, aqyn Ǵalym Jaılybaı qoltyqtaı qurmettep alyp shyqqanyn halqymyzǵa tán kórgendilik belgisi dep bildik. Basqarma tóraǵasy, senator Nurlan Orazalın Prezıdent Nursultan Nazarbaevtyń mereıgerge joldaǵan quttyqtaý hatyn jarııa etip, osyndaı aq tilek arqalaǵan jedelhattardyń Parlament Senatynyń Tóraǵasy Q.Toqaevtan, Qorǵanys mınıstri I.Tasmaǵambetovten, Qazaqstannyń Reseıdegi jáne Grýzııadaǵy elshileri M.Tájın men E.Ertisbaevtan, taǵy basqalardan kelip jatqanyn habarlady. N.Orazalın aǵa qalamdastyń bar ómirin, qudaı bergen talantyn qazaqtyń kórkem sózine arnap, ádebıettegi ózine tıesili bıigin anyqtaǵanyn basa aıtyp, sonymen birge dáýirge ún qosqan kósemsózshiligine, ádebıetter arasyndaǵy altyn kópir, qazaq rýhanııatynyń elshisi ekendigine toqtaldy.
Oljas Súleımenov dosy Sábıtti týǵan kúnimen quttyqtap, qazaqtyń: «Jasa!» degen jaqsy sózine kóp maǵyna syıǵyza, uzaq ómir súrýge, shyraıly shyǵarmalar týdyrýǵa tilektestigin bildirdi. Almaty jurtshylyǵynyń iltıpatyn qala ákiminiń orynbasary Záýre Amanjolova, Memlekettik hatshy Gúlshara Ábdiqalyqovanyń quttyqtaýyn keńesshi О́tegen Oralbaev, «Nur Otan» partııasy Tóraǵasynyń birinshi orynbasary Baýyrjan Baıbektiń quttyqtaýyn osy partııanyń Almaty qalalyq fılıaly tóraǵasynyń birinshi orynbasary Kenjehan Matyjanov jetkizdi.
Sheteldik meımandar ishinen qazaq jazýshysyna tájik aqyn-jazýshylary Gýlrýhsor Safıeva men Sottor Tursyn, «Túriksoı» jáne Túrkııa Jazýshylar odaǵynyń atynan Serken Hastúrik, qyrǵyz týǵandardan Qyrǵyz Ǵylym akademııasynyń vıse-prezıdenti Abdyldajan Aqmatalıev, belgili qyrǵyz aqyny Marhabaı Aamatov, sondaı-aq Reseı Jazýshylar odaǵy basqarma tóraǵasynyń orynbasary, Máskeý Jazýshylar odaǵynyń tóraǵasy Vladımır Boıarınov, Sholohov jáne Tvardovskıı atyndaǵy syılyqtardyń laýreaty, aqyn Lıýdmıla Shıpahına, ataqty belorýs jazýshysy Oles Kojedýb, armıan jazýshysy Stanıslav Ogenıan, Reseı aqyny Nına Popova, Qazaqstan Prezıdentiniń «Rýhanııat» syılyǵynyń laýreaty, fransýzdyq meıman Albert Fıshler men Madlena Fıshler hanym, ıakýtııalyq qalamger Ilıa Petrova, ózbek jazýshysy Mehmanqul Islamqulov, ázerbaıjan aqyny Elhan Zal Qarahan aq tilekterdiń arnasyn aǵytty. Osy meımandar tarapynan Sábıt Dosanov Anton Delvıg atyndaǵy Búkilreseılik «Za vernost slový ı otechestvý» syılyǵymen, Sh.Aıtmatov qorynyń atynan Aıtmatov atyndaǵy halyqaralyq syılyqpen, sondaı-aq «Qyrǵyz ulttyq teatr akademııasynyń akademıgi» ataǵymen marapattaldy. Qazaq jazýshysy týraly maqala túriktiń bir mıllıon taralymy bar gazetinde basylǵanyn da osy arada estidik. Aq peıilmen aıtylǵan baýyrlastyq syrlarda da, shyn júrekten arnalǵan jarqyn jyrlarda da tolas bolǵan joq.
Qostanaı, Almaty, Batys Qazaqstan jáne Ońtústik Qazaqstan oblystarynan da mereıtoı ıesine arnaıy quttyqtaýlar men syı-syıapattar keshikpeı jetti. Áıgili syqaqshy Kópen Ámirbek aǵa jazýshyǵa ázil shýaǵyn syılady. Jeztańdaı ánshilerimiz Maıra Muhamedqyzy, Qabylash Ábikeı, Nurǵalı Núsipjanov pen Shahızada Sábıt aǵalaryn án qanatynda samǵatty. T.Júrgenov atyndaǵy Qazaq ulttyq óner akademııasynyń stýdentteri Sábıt Dosanov jyrlarynan shashý shashty, «Daýyl» dramasynan kórinister qoıyldy. Qurmanǵazy atyndaǵy orkestr kúıiniń áýenimen asqaqtata oryndalǵan «Kenesary hannyń sońǵy sózi» atty tolǵaý-jyry qazynaly qalamgerdiń qazaq qalybyndaǵy qasıetin molynan ańǵartty.
Qorǵanbek AMANJOL,
«Egemen Qazaqstan».
Sýretterdi túsirgen
Azamat QUSAIYNOV.
Almaty