ShYMKENT. 6 naýryz. Ońtústik Qazaqstan oblystyq qylmystyq ister jónindegi mamandandyrylǵan aýdanaralyq soty «Saryaǵash oqıǵasyna» qatysty qozǵalǵan qylmystyq isti qaıta tergeýge jiberýge uıǵarym jasady. Bul týraly oblystyq sot baspasóz qyzmetiniń deregine súıengen egemen.kz tilshisi habarlady.
«Eger bul qaýlyǵa eshkim shaǵym túsirmese, 15 kúnniń ishinde isti Ońtústik Qazaqstan oblystyq prokýratýrasyna jiberemiz», - dedi osyǵan oraı oblystyq qylmystyq ister jónindegi mamandandyrylǵan aýdanaralyq sottyń sýdıasy Ábınur Qarabaev. Sýdıa sonymen birge osy qylmystyq iske baılanysty tabylǵan jańa aıǵaq – qaza tapqan adam avtokóliginiń beınetirkegish quraly iske tirkeletinin aıtty.
«Polıseıler aıǵaq zatty qylmystyq is sotqa ketken soń tapqan. Ony marqumnyń kóliginen urlap, laqtyryp jibergeni anyqtalǵan. Biz ony kórdik, tekserdik, iske mańyzy bar aıǵaq zat ekenine kózimiz jetti», - dedi sýdıa.
Eske sala keteıik, 4 aqpan kúni saǵat 1:40 shamasynda Saryaǵash aýdany Jartytóbe aýyldyq okrýgi Bostandyq aýylynyń janynan aǵyp ótetin Keles ózeninen batysqa qaraı 500 metr qashyqtyqta óziniń «Mersedes-Gelınvagen» markaly m/b KZ 606 KLA avtokóliginiń artqy oryndyǵynan 1985 jyly týǵan Baqytjan Artyqov degen azamattyń óli denesi tabylǵan. Kúdikti – Bostandyq eldi mekeniniń turǵyny Pavmadın Narmetov arada úsh ótkennen keıin kórshi О́zbekstan jerinde qolǵa tústi. Qandy oqıǵanyń sońy jappaı tártipsizdikke ulasty. Yntymaq jáne Bostandyq aýyldarynda aqpannyń 5-i men 6-sy kúnderi jergilikti tájik turǵyndarynyń menshigindegi birneshe turǵyn úı men avtokólikter órtengen.
Baqtııar Taıjan.
Derek, foto: Ońtústik Qazaqstan oblystyq qylmystyq ister jónindegi mamandandyrylǵan aýdanaralyq soty.