ShYMKENT. 6 naýryz. Ońtústik Qazaqstan oblysy Túrkistan qalasynda taıaýda órt qushaǵynda qalǵan «Qýanysh» bazarynyń saýdagerlerine qarjylaı kómek kórsetiletin boldy. Bul týraly oblystyq kásipkerler palatasy baspasóz qyzmetiniń deregine súıengen egemen.kz tilshisi habarlady.
«Kásipkerler palatasynda bas qosqan bazar basshylary 500 myń teńgeniń qarjysyn aýdarý úshin bankten esep-shot ashý týraly kelisimge keldi. Jınalǵan qarajat arnaıy komıssııanyń sheshimimen zardap shekken saýdagerlerge úlestiriledi», - delingen habarlamada.
Budan bólek, shyǵynǵa ushyraǵan árbir kásipkerge bazar basshysy 100 myń teńgeden ótemaqy tóleıtin bolady.
Kásipkerler palatasynyń ókilderi salyqtyq tólemderdi tóleýde jeńildikter jasaýǵa jáne bankten nesıe alǵan saýdagerlerge kómek kórsetýge ýáde etti.
Eske sala keteıik, Túrkistan qalasyndaǵy ortalyq bazardan naýryz aıynyń basynda órt shyǵyp, saýdagerler men kásipkerler shyǵynǵa ushyraǵan bolatyn. Ile-shala aýdan basshylyǵy zardap shekkenderdiń kómeksiz qalmaıtynyn málimdegen edi.
Baqtııar Taıjan.
Derek: Ońtústik Qazaqstan oblystyq kásipkerler palatasy.
Foto: egemen.kz.