ASTANA. 6 naýryz. Qazaqstan Prezıdenti bolýǵa nıet bildirgenderdiń qataryna taǵy bir adam qosylyp, tirkelgen úmitkerlerdiń jalpy sany 10-ǵa jetti. Bul týraly Ortalyq saılaý komıssııasynyń baspasóz qyzmeti habarlady.
Komıssııanyń aqpary boıynsha, keshe, 5 naýryz kúni úmitkerlikke Almatynyń 1971 jyly týǵan turǵyny, áskerı qyzmetshi Erjan Merekeuly Serǵazın ózin-ózi usynǵan.
Sóıtip, Qazaqstan Prezıdenti saılaýyna úmitker retinde usynylǵandardyń sany 10 adamǵa jetti.
Buǵan deıin úmitkerlikke Astananyń 1959 jyly týǵan turǵyny, jeke kásipker Asqar Syrǵabaev, Astananyń 1969 jyly týǵan turǵyny, «Rýhanı qoǵam álemi» qoǵamdyq qorynyń prezıdenti Lımana Qoıshıeva, Astananyń 1977 jyly týǵan turǵyny, ınjener-qurylysshy Baqyt Ábdikárimov jáne Astananyń 1984 jyly týǵan turǵyny, júrgizýshi Sýhrab Myrzashov, Almatynyń 1958 jyly týǵan turǵyny, qoǵam qaıratkeri Esenbek О́kteshbaev, Almatynyń 1946 jyly týǵan turǵyny, zeınetker Iаkobjan Júnisbekov, Astananyń 1969 jyly týǵan turǵyny, «Astana Munaı Grýp 2007» JShS maı quıý beketiniń bastyǵy Qanat Juman ózin-ózi usynǵan edi. Alǵash bolyp usynylǵan Asqar Syrǵabaev memlekettik til emtıhanynan óte almady.
Úmitkerlikke usynylýshylar qataryna QKHP partııasy atynan úmitker Turǵyn Syzdyqov ta qosyldy. Ol 1947 jyly týǵan, memlekettik bank mekemeleri jumysshylary kásipodaǵynyń Aqmola oblystyq fılıalynyń tóraǵasy.
Eske sala keteıik, Ortalyq saılaý komıssııasy bekitken kúntizbelik josparǵa sáıkes Qazaqstan Prezıdentiniń kezekten tys saılaýyna úmitkerlerdi usyný 26 aqpan kúni bastalǵan bolatyn. Saılaý 2015 jylǵy 26 sáýirge belgilenip otyr.
Memleket basshysy Nursultan Nazarbaev ázirshe óziniń saılaýǵa qatysýy týraly sheshim qabyldaı qoıǵan joq. 8 naýryz qarsańynda Astanada qyz-kelinshektermen kezdesken ol: «Qazir saılaýaldy naýqan bastaldy. Kezekten tys saılaý ótkizý ıdeıasyn, negizinen, áıelder qoldady. Men búginde myńdaǵan hat alyp jatyrmyn. Búgin tańerteń ústelimde bir býma hat jatty, hat ıeleri menen saılaýǵa óz kandıdatýramdy usynýdy suraǵan. Meniń jeke josparym múldem basqa bolatyn, shynymdy aıtsam», - dedi.
Sáken Maılybaı.
Derek, sýret: Ortalyq saılaý komıssııasy.