ASTANA. 20 mamyr. Memlekettik hatshy, Qazaqstan Respýblıkasy Prezıdentiniń janyndaǵy áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy Gúlshara Ábdiqalyqova men «Astana EKSPO-2017» ulttyq kompanııasy» basqarmasynyń tóraǵasy Talǵat Ermegııaev yntymaqtastyq týraly memorandýmǵa qol qoıdy. Bul týraly akorda.kz habarlady.
Ulttyq komıssııa tóraıymy atalǵan memorandýmǵa qol qoıý Qazaqstan úshin eleýli oqıǵa ekenin, sebebi, el halqynyń 52 paıyzyn áıelder quraıtynyn atap ótti. Osyǵan oraı, qazaqstandyq áıelderdiń orasan zor áleýetin, sondaı-aq, otandyq jáne halyqaralyq úkimettik emes uıymdardy, halyqaralyq áıelder uıymdaryn jan-jaqty iske qosý ulttyq komıssııanyń basty mindetteriniń biri bolyp tabylady.
Gúlshara Ábdiqalyqova Memleket basshysy tarapynan «EKSPO-2017» kórmesin daıyndaý jáne ótkizý kezinde otandyq ekonomıkanyń, ásirese shaǵyn jáne orta bıznestiń resýrstaryn barynsha paıdalaný jóninde tapsyrma berilgenine nazar aýdardy.
Atap aıtqanda, ulttyq komıssııa jasyl tehnologııalardy paıdalaný arqyly pılottyq jobalardy iske asyrý, ınnovasııalyq energııa jınaqtaýshy tehnologııalarmen aınalysatyn áıelder qoǵamdastyǵyn «EKSPO-2017» kórmesine qatysýǵa tartý jumystaryn jandandyryp otyr.
Sońynda Memlekettik hatshy memorandým jasyl ekonomıkany, áıelder kásipkerligin damytýǵa ınvestısııa tartýǵa jáne jańa jumys oryndaryn ashýǵa múmkindik týǵyzatynyn atap ótti.
Elaman Qońyr.
Derek: akorda.kz.
Sýret: inform.kz.