Áıel otbasynyń ǵana emes, Otannyń da uıytqysy

Merekelerińizben, asyl analar, aıaýly arýlar!

 8 naýryz – Halyqaralyq áıelder kúni

Keshe Memleket basshysy Nursultan Nazarbaev 8 naýryz – Halyqaralyq áıelder kúni merekesine oraı Qazaqstan áıelderi qoǵamdastyǵynyń bir top ókilderimen kezdesti. Kóktem jáne áıel-ana! Birin biri tolyqtyrǵan qandaı úılesim deseńizshi! Iá, áıelder merekesinde adam janyn ǵajaıyp sezimge bóleıtin erekshe kúı de osyndaı keremet eki uǵymnyń ushtasqandyǵynan týyndasa kerek. Endeshe, qar astynan qyltıyp báısheshek boı kótergende jer-dúnıeni býsandyrǵan kóktemniń alǵashqy habarshysyndaı bolyp analar merekesi bastalatyny da beker bolmas. Kúnniń kózi nuryn tógip, aq qar-kók muz erip, tal-shybyqtar búrlenip, dala bitken túrlenip jatqan shaqtyń qudireti de sol kóktemniń shýaqty nurynan nár alady emes pe? Keshe osynaý keremet mereke qar­sańynda Astana tórinde ótken Elba­synyń áıelder qaýymymen kezdesýi de «Kóktem shýaǵy» dep ataldy. Mundaı kezdesý analar merekesi qarsańynda Aqordada ótetin jyl saıynǵy dástúrge aınalyp keledi. Oǵan ádettegideı elimizdiń barlyq óńirlerinen kelgen, ekonomıkanyń túrli sektorlarynda, mádenı-áleýmettik salalarda jáne memlekettik qyzmette isteıtin áıel jurtynyń ókilderi qatysty. Memleket basshysy olardy kele jatqan Halyqaralyq áıelder kúnimen quttyqtap, Qazaqstannyń barsha áıelder qaýymyna baqyt, densaýlyq jáne baq-bereke tiledi. Nursultan Nazarbaev memlekettik saıasattyń basym baǵytynyń biri áıelderdiń ál-aýqatyn jaqsartý ekenin atap ótti. Táýelsizdik jyldaryn­da biz kóp nárseni eńserdik. Qazir elimizde bereke men tynyshtyq ornady. «Qazaqstan-2050» Strategııasy, «Nurly Jol» jáne basqa baǵdarlamalar osyny kózdeıdi. Áıelder otbasyn saqtaýshy retinde baq-berekeni eń aldymen balalarynan, dastarqanynan sezinedi, sol arqyly memlekettiń qam­qorlyǵyn sezinedi, dedi Qazaqstan Prezıdenti. Memleket basshysy, sondaı-aq, eldegi áıelder qaýymy ókilderiniń belsendiligi artyp kele jatqanyna toqtaldy. Búginde memlekettik qyzmettegi qyzmetkerlerdiń basym bóligin áıelder quraıdy. Den­saýlyq saqtaý salasynda olardyń úlesi 75 paıyzǵa, bilim berý salasynda 65 paıyzǵa deıin jetedi. Bıznestegi basshy­lardyń da  40 paıyzy – názik jandy arýlar, dedi Nursultan Nazarbaev. Sonymen qatar, Elbasy táýel­sizdik jyl­darynda tynyshtyq pen turaq­ty­lyqty saqtaýda áıelder qaýymynyń úlesi zor bolǵanyna nazar aýdardy. Áıel – otba­synyń uıytqysy, altyn besiktiń ıesi. El bolashaǵynyń barlyǵy áıel azamat­tarynyń qolynan ótedi. Sondyqtan, sizder arqyly barsha Qazaqstannyń áıel­derin shyn júregimmen quttyqtaǵym keledi. Esh ýaqytta júzderińizden kúlki ketpesin dedi Memleket basshysy. Elbasy sóz arasynda elimizde demo­gra­fııalyq ósý jalǵasyp kele jatqanyna, tek byltyrdyń ózinde dúnıege 400 myń sábı kelgenine nazar aýdardy. Nursultan Nazarbaev, sondaı-aq, bıyl el táýelsizdigine 24 jyl tolatynyn eske saldy. Bul ýaqyt qas-qaǵymda óte shyqty, sebebi, bárimizdiń nazarymyz jumysta boldy. Búgin sonyń nátıjesin kórip otyrmyz – biz qurǵan memleketti búkil álem tanıdy, qurmetteıdi, dedi Qazaqstan Prezıdenti. Osy rette Memleket basshysy eldegi turaqtylyqtyń arqasynda ekonomıkamyz qarqyndy damyp kele jatqanyn basa aıtty. Búginde jer betinde, BUU málimeti boıynsha, 800 mıllıon adam ashtyqtan japa shegýde. Jyl saıyn azyq tapshylyǵynyń kesirinen 6 mıllıon bala, 30 mıllıon eresek adam óledi. 400 mıllıon adam aýyzsýǵa zárýlik zardabyn tartady. Jyl saıyn planetamyzda 30 áskerı qaqtyǵys bolyp, sonyń saldarynan saǵat saıyn 40 adam qaza tabady. Sondyqtan, eldiń ishki turaqtylyǵyn kózdiń qarashyǵyndaı qorǵaýǵa tıispiz, dedi Nursultan Nazarbaev. Sondaı-aq, Elbasy búgingi jas­tar arasyndaǵy keıbir ahýal da ózin alań­datatynyn jetkizdi. Ajyrasýlar sekildi basqa da nazar aýdaratyn máseleler bar­shylyq, olar buryn da bolatyn. Qazir bári erkindeý bolyp ketti. Degenmen, qoǵamdaǵy moraldyq ahýal da, qurylym da qashanda áıelderge táýeldi, degen Prezıdent urpaq tárbıesindegi áıel­derdiń aıryqsha rólin atady. Sóz arasynda Memleket basshysy qazirgi jastar arasynda mańyzdy máseleniń biri baspanaly bolý óz sheshimin taýyp kele jatqanyna toqtaldy. Iаǵnı, turǵyn úı qurylysynyń jańa baǵdarlamasy boıynsha jalǵa beriletin baspananyń jartysy jastarǵa tıesili bolady. Árıne, baǵdarlama boıynsha baspanaǵa ıe bolatyn jastar jumys isteýleri kerek. Onda alǵashqy bastapqy jarna degen joq. Kezekpen jalǵa bas­pana alady, sosyn jalǵa alynǵan qarajatyn tóleıdi. Al bul tólem páter qunyna da kete beredi. Onsyz da páter jaldap turyp jatyr emes pe jastar? Sol se­kildi buǵan da tóleıdi, al onyń tólemi páter qunyna túsedi. Birtindep, osylaısha páter jastardyń menshigine ótetin bolady, dedi Nursultan Nazarbaev. Pre­zıdent mundaı baǵdarlamanyń eshbir elde joq ekenin, Qazaqstan ǵana osyndaı qadamǵa baryp otyrǵanyn jetkizdi. Basqa máseleler de osylaı sheshimin taýyp jatyr, birtindep taba beredi de, – dedi Nursultan Nazarbaev. Elbasy áıelder qaýymymen áńgimede qazir qyzý talqyǵa túsken elimizdegi saılaý naýqany týraly da sóz qozǵady. Qazir saılaý naýqany bastalyp ta ketti. Kezekten tys prezıdenttik saılaý týraly bastamany da negizinen áıelder qaýymy qoldady. Men kún saıyn myńdaǵan hattar alyp jatyrmyn. Búgin erteńgisin de bir qushaq hat keldi. Olardyń barlyǵy saılaýdy qoldap, menen óz kandıdatýramdy usynýdy surap jatyr, dedi Nursultan Nazarbaev. Meniń jeke josparym múldem basqa bolatyn, shynymdy aıtaıyn. Qazaqstandy jyldar boıy basqaryp kelemin, táýelsizdiktiń alǵashqy jylynan memleketti qalyptastyryp, qurdyq. Alaıda, búkilhalyqtyq tilekter, eldiń nıeti, jurttyń qalaýy bar, ony da eskerý qajet. Sondyqtan da, sizdermen aldaǵy josparymdy, qadamymdy aqyldasýǵa da bolady ǵoı dep oılaımyn, dedi Elbasy. Kezdesýge Memlekettik hatshy, Pre­zı­dent janyndaǵy Áıelderi isteri jáne otbasylyq-demografııalyq saıasat jó­nin­degi ulttyq komıssııanyń tóraıymy Gúlshara Ábdiqalyqova, Parlament Májilisiniń depýtaty Gúljan Qaraqusova, Densaýlyq saqtaý jáne áleýmettik damý mınıstri Tamara Dúısenova, Parlament Májilisiniń depýtaty Irına Aronova, Semeı qalasynyń ınnovasııalyq gýma­nıtarlyq-zań ýnıversıtetiniń rektory Shyryn Qurmanbaeva, «Qazaq arýy-2014» respýblıkalyq arýlar baıqaýynyń jeńimpazy Gúlnaz Jolanova, ártis Bıbigúl Súıinshálına, «Astana Opera» MOBT ártisi Serına Sýnagava, tennısshi Zarına Dııas, «Planeta patshaıymy-2014» ataǵynyń ıegeri Aqnur Jumabaeva, boks­tan álem chempıony Nazym Qyzaıbaı, «Qazaqstan» RTRK balalarǵa arnalǵan «Balapan» telearnasynyń dırektory Láıla Sultanqyzy, voleıbolshy Sábına Altynbekova, tanymal «Tatıanalar trıosynyń» qatysýshylary Tatıana Býrmıstrova, Tatıana Poltavskaıa jáne Tatıana Martynenko, «Turkvizion-2014» II halyqaralyq án konkýrsynyń jeńimpazy Janar Duǵalova, kópbalaly ana Mereke Aqsıeva, Qazaqstan jastarynyń arasynda «jasyl bastamalardy» ilgeriletý bastamashysy Tatıana Nemsan, áskerı qyzmetshi Dınara Rysbekova, professor, Qazaqstan ınjenerlik akademııasynyń korrespondent-múshesi Quralaı Aqqoshqarova, «Astana Solar» fotoelektrlik modýlder qurastyrý zaýytynyń tehnıgi Aınur Tashanova, jeke kásipker Aqtolqyn Qurmashova, Qostanaı oblysynan aýdandyq aýrýhananyń bas dárigeri Larısa Fınk, Q.Sátbaev atyndaǵy Ekibastuz ınjenerlik-tehnıkalyq ınstıtýtynyń dosenti Dalıda Sıvaraksha, «Astana Opera» MOBT jetekshi solısi Saltanat Ahmetova qatysty. Kezdesýge qatysýshylar jeke-jeke sóz sóılep, Memleket basshysyna ana men balaǵa qamqorlyq jasaýǵa, otbasylyq qundylyqtardy nyǵaıtýǵa baǵyttalǵan saıasat júrgizip otyrǵany úshin alǵystaryn aıtty. Sonymen qatar, halyqtyń jáne árbir qazaqstandyq otbasynyń ál-aýqatyn qamtamasyz etýge baǵyttalǵan baǵdarlamalardy júzege asyrýdy ári qaraı jalǵastyrýdyń mańyzdylyǵyn atap ótti. «Asa qurmetti Nursultan Ábishuly! Men kópbalaly anamyn. Jubaıymyz ekeýmiz Alla bergen 7 balamyzdy tárbıelep otyrmyz. Sizdiń tapsyrmańyz boıynsha qolǵa alynǵan «Balapan» baǵdarlamasy úshin analar atynan zor alǵysymdy aıtamyn. Búgingi tańda tek osy baǵdarlamanyń aıasynda 4000 balabaqsha ashyldy. Baǵdarlama «Nurly Jol» arqyly jalǵasyp, oǵan 20 mıllıard teńge qarajat bólinetinin qýana qarsy aldyq. Árbir ana men balanyń qamyn oılaıtyn Sizdeı Prezıdenti bar el baqytty. Bizdiń analar urpaǵynyń bolashaǵyna esh alańdamaıdy.Sol úshin Sizge rahmet!» – dep kópbalaly ana Mereke Aqsıeva Prezıdentke analar atynan alǵysyn aıtsa, basqalar óner, sport salalaryndaǵy Elbasynyń eren eńbegin baǵalap, aıryqsha qamqorlyǵyna rahmetin jetkizdi. Ásirese, jastar jaǵy Elbasyn úlgi tutatyndaryn aıtyp, onymen bul júzdesýlerin erekshe este saqtaıtyndyqtaryn jetkizdi. «Sizben kezdesý kópshilik úshin arman. Meniń armanym búgin ekinshi ret oryndalyp otyr. Men jaqynda «Turkvision-2014» halyqaralyq án konkýrsynda jeńimpaz atandym. «Men bul jeńisimdi Elbasyma arnaımyn» dep maqtanyshpen jar saldym. Osylaı mádenıetimizdi qoldaýdaǵy Sizdiń ólsheýsiz eńbegińizge perzenttik alǵysymdy bildirgim keldi. Biz, Qazaqstan óneriniń jas daryndary, Sizdiń qamqorlyǵyńyzben áli talaı asqar asýlardy alyp, elimizdi álemge tanyta beremiz. Rahmet Sizge!» – dedi ánshi Janar Duǵalova. Sondaı-aq, «Qazaq arýy-2014» respýblıkalyq konkýrsynyń jeńimpazy Gúlnaz Jolanova da jastar atynan sóıledi. «Men stýdentpin. О́tken jyly respýblıkalyq «Qazaq arýy-2014» baıqaýynyń jeńimpazy atandym. Bul jetistikterim ata-anamnyń tárbıesimen birge Sizdiń jas urpaqtyń jańa kelbetine aıryqsha nazar aýdarýyńyzdyń jemisi dep oılaımyn. Siz «Qazaqstan-2050» Strategııasynda «Qyzdarymyzdyń tárbıesine kóp kóńil bólýimiz kerek. Olar – bolashaq jar, bolashaq ana, shańyraqtyń shyraǵy» degen edińiz. Sizdiń sózderińiz jastardyń azamattyq tulǵasyn qalyptastyratyn shamshyraq ispetti. Men elimizdiń árbir boıjetkenine ákelik qamqorlyq jasaıtyn Sizdeı Elbasysy bar halyqtyń qyzy ekenimdi maqtan tutamyn, dedi qazaq arýy. Bul tilekti náziktigine qaramastan, ásker qatarynda qaısarlyq tanytyp júrgen mergen qyz Dınara Rys­bekova jalǵastyrdy. «Men Qarýly Kúsh­ter qatarynda mergen qyzmetin atqa­ramyn. Qazaqtyń batyr qyzy Álııa Moldaǵulovanyń izin jalǵastyrý – men úshin maqtanysh. Siz –Jańa jylda árbir ardagerdi aldaǵy Uly Jeńistiń 70 jyldyǵymen quttyqtaǵan birden-bir Prezıdentsiz. Otan qaýipsizdiginiń eń basty kúzetshisi – Sizsiz! Siz álemniń barlyq elderimen dostyq qatynas jasadyńyz. Sizdeı basshysy bar Qazaqstanǵa eshbir qaýip joq. Elimizde oq atylmaı, sarbazdardyń sheberligi tek jattyǵýda shyńdalýy – Sizdiń saıasatyńyzdyń arqasy», – dedi D.Rysbekova. Áıelder qaýymy qazirgi qoǵamda qaı salada bolmasyn jemisti eńbek etip, túrli nátıjelerge qol jetkizýde. Sońǵy kezderi Elbasy erekshe nazar aýdaryp, memleket tarapynan qamqorlyqty kúsheıtken kásipkerlik salasynda da áıel-analar az emes. Sonyń biri kásipker-ana A.Qurmasheva kezdesýde óziniń kásibi jaıynda baıandaı otyryp, Prezıdenttiń jastyq shaǵyn oıǵa oraltty. «Men jeke kásipkermin. Sharýashylyǵymyzda 29 gektar jerge aport, semerıanka, órik, shıe sııaqty jemis aǵashtaryn otyrǵyzyp, baptaýdamyz. Maǵan «Balalyq shaǵymnyń aspany» atty fılm erekshe áser qaldyrdy. Ásirese, sábı Sultan alma jegisi kelgende Ábish ata túnniń jarymyna, qystyń aıazyna qaramaı, Sizge narttaı janǵan aport taýyp ákelip beretin tusy aıryqsha áserli. Halqyńyz qalasa, aspandaǵy Aıdy da áperýge daıyn ákelik mahabbat Sizge qanmen daryǵan dep oı túıdim. Biz Ábish atanyń almasyndaı aporttar ósirip, bir kezde ataǵy jer jarǵan Almatynyń aportyn halqymyzǵa qaıtarý úshin eńbek etýdemiz. Sizdiń arqańyzda búginde aýyl qaıta túledi. Siz de baǵbansyz. Sizdiń arqańyzda Qazaqstan atty alyp báıterek urpaqtaryna máńgi jemis berip turatyn máýeli Máńgilik Elge aınaldy», – dedi ol. Qyzdar arasynda bokstan álem chempıony Nazym Qyzaıbaı da Prezıdentke óziniń aqjarma aq tilegin jetkizdi. «Qazaqstannyń Ánurany oınap, Kók baıraǵymyz kókke kóterilgende men «elim úshin, Elbasym úshin» dep turdym. Árbir otandyq sportshynyń jeńisi – el sportynyń damýyna barlyq jaǵdaıdy jasap otyrǵan Sizdiń jeńisińiz! Sizge sheksiz alǵysymdy aıtamyn jáne sharshy alańdaǵy árbir jeńisimdi Sizge arnaımyn! Sizdiń «Qazaqstan áıelderi eldiktiń júgin erlermen birdeı arqalap keledi» degen sózińiz maǵan úlken oı saldy. Boks – qyzdarǵa tán emes sport dep jatady. El shetine jaý tıgende qoldaryna naıza alyp, erlermen birge jaýǵa shapqan qazaqtyń qyzdary tarıhtan belgili. Biz – sol batyr analarymyzdyń izbasarlarymyz. Aldaǵy barlyq jarystarda týǵan elimniń týyn kókke kóterýge bar kúsh-jigerimdi salyp, eńbek etýge ýáde beremin», – degen jigerli qyzdyń jalyndy sózderi Elbasyn erekshe súısindirdi. Árıne, názikjandy, symbatty qyzdyń osyndaı sport túrinen chempıon atanýy, árıne, áıeldiń qudirettiligine taǵy bir bas ıdirgendeı. «Balapan» telearnasynyń dırektory Láıla Sultanqyzy da Elbasyna analar atynan alǵys aıtty. «Asa mártebeli Elbasy! Men – Sizdiń tikeleı tapsyrmańyzben ashylǵan «Balapan» telearnasynyń dırektorymyn. Búgingi zaman – balanyń tili úıindegi teledıdar qaı tilde sóılese sol tilde shyǵatyn zaman. Bul rette «Balapan» árbir úıdiń tórinen oryn aldy. Álemdegi eń iri anımasııalyq kompanııa – «MAJOR-Disneymen» TMD aýmaǵynda alǵashqy bolyp uzaq merzimdi kelisimshart jasadyq. Urpaqqa ulttyq tárbıe beretin otandyq ónimderimiz de efırdiń aýqymdy bóligin alady. Sizdiń urpaqtyń tárbıesine, ulttyń bolashaǵyna tym tereńnen qarap, áriden saıasat júrgizip otyrǵanyńyzdy túsinemiz, qoldaımyz, sol úshin zor alǵys bildiremiz», – dedi ol. Keshegi kezdesýde erekshe atap óterligi – tórt birdeı Tatıananyń qatysýy. Onyń úsheýi kezinde elge «Tatıanalar trıosymen» erekshe tanylǵan, qazaq ánderin júrekti shymyrlata shyrqaǵan orys qyzdary, qazirgi ardaqty ana, qadirli ájeler bolsa, tórtinshisi – Qazaqstan jastarynyń arasynda «jasyl bastamalardy» ilgeriletý bastamashysy, ustaz, mektep dırektory Tatıana Nemsan. Tatıanalardyń biri Býrmıstrova kezdesýde qolyna qazaqtyń qara dombyrasyn alyp, «Halqymyzǵa Sizdeı perzent syılaǵan Áljan anamyzǵa arnap oryndap bereıin», dep ana týraly án shyrqaýy da kóktem shýaǵymen astasqan kóńildi keshtiń kórkin qyzdyra túskendeı boldy. Ol óziniń 40 jyl buryn «Altybaqan» televızııalyq baǵdarlamasy arqyly qazaq halqyna tanymal bolǵanyn aıtyp, qazaqtyń Tatıanasyna aınalǵanyn maqtanyshpen atap ótti. «Qazaqtyń tilin, salt-dástúrin ánim men ónerim arqyly elimizdiń túkpir-túkpirine nasıhattap júrmin. Meniń jolymdy sińlilerim – ózge Tatıanalar jalǵastyrdy. Búgin úsheýmiz de osynda otyrmyz. Sizge elimizdi birlik pen berekeniń besigine aınaldyrǵan kemeńger saıasatyńyz úshin zor rızashylyǵymdy bildiremin», – dedi ol sóz kezeginde. Tatıana Martynenko da óz lebizin taza qazaq tilinde jetkizip, el birligin uıystyrǵan Elbasyna erekshe iltıpatyn bildirdi. «Men orys halqynyń qarapaıym qyzy, keń-baıtaq qazaq elinde týyp-óstim. Qazaq halqynyń keń peıili men qonaqjaılyǵyn jastaıymnan boıyma sińirip, qazaqtyń bosaǵasyna kelin bolyp tústim. Qazirgi tańda eki ul, bir qyz, eki nemere súıip otyrǵan baqytty otbasymyz. Men quramynda 100-den astam ult ókilderi tatý-tátti turatyn Qazaqstandaı eldiń azamaty ekenimdi maqtan etemin. Men Qazaqstan halqy Assambleıasynyń alǵashqy sessııasynda sóz sóılegen edim. Siz qurǵan Assambleıa – birligimizdiń bas­taýy bolyp keledi. «Beıbitshilik pen kelisimniń Nazarbaev modeli» búkil álemge úlgi. Biz Elbasymyzdyń álemdik tulǵa ekenin maqtan etemiz», – dedi ol. Ánshi Tatıanalardyń úshinshisi kezdesýge arnaıy Máskeýden kelipti. «Asa qurmetti Nursultan Ábishuly! Men 25 jyldan beri Máskeýde turamyn. Kindik qanym tamǵan qasıetti topyraqqa kelgenime baqyttymyn. Álemge tanymal tulǵa – Sizben kezdeskenime sheksiz qýanyshtymyn. Men ár kelgen saıyn Qazaqstannyń adam tanymastaı ózgerip jatqanyn kóremin. Astana ǵajaıyp qalaǵa aınalypty. Men Qazaqstanymdy maqtan etemin. Tizginin Siz sııaqty kóregen basshy ustaǵan Qazaqstannyń jarqyn bolashaǵyna senemin», – dedi Reseıden arnaıy kelgen Tatıana Poltavskaıa. Aıtpaqshy, kezdesýde qazaqtyń kelini, japon qyzy, «Astana Opera» teatrynyń balerınasy Serına Sýnagava da qazaq tilinde sóılegenimen qoımaı, qazaq kelinine tán ınabattylyqpen Elbasyna ıilip sálem saldy. Sóz kezegin Qazaq gýmanıtarlyq-zań ınnovasııalyq ýnıversıtetiniń rektory Shyryn Qurmanbaeva jalǵady. Ol óziniń ǵalym, rektor retinde emes, 5 nemereniń ájesi retinde sóılegeli otyrǵanyn aıtyp, urpaq tárbıesindegi ájeler róline toqtaldy. «Qazir el úshin ájelerimizdiń parasaty asa mańyzdy. Búginde álem moıyndaǵan Elbasyn Tetebaladaı dana áje tárbıelegenin umytpaǵanymyz jón. Ol kisini danalyqtyń akademıgi deı alamyz. «Ájeniń súıgen jeri otqa kúımeıdi, oq ta tımeıdi» deıdi halqymyz. Ulttyń genetıkalyq kody da – ájeniń áldıinde. Ult dástúrin jańa zamanǵa saı jalǵastyrýǵa tıispiz. Jańashyl balabaqshalar, Nazarbaev zııatkerlik mektepteri, Nazarbaev Ýnıversıtet – ulttyq tárbıe men bilimniń aıryqsha serpilisi. Bıyl Nazarbaev Ýnıversıtetti alǵashqy túlekter bitirip, úlken ómirge joldama alady. Sizdi osynaý aıtýly oqıǵamen quttyqtaımyn. Bilim men tárbıedegi bul ınnovasııalar – Sizdiń ıdeıalaryńyzdyń nátıjesi! Qazaqtyń ájeleri Sizdiń barlyq bastamalaryńyzdy qoldaıdy. Biz qashanda Sizdiń senimdi serikterińizbiz», – dep túıindedi sózin Sh.Qurmanbaeva. Kezdesý sońynda Memleket basshysy kópbalaly analar – Mereke Aq­sıe­vany «Altyn alqamen» jáne Aqnur Ju­ma­baevany «Kúmis alqamen» marapattady. Dınara BITIKOVA, «Egemen Qazaqstan». Sýretterdi túsirgender S.BONDARENKO, B.OTARBAEV.