Astana qalasynyń ákimi Ádilbek Jaqsybekov Lıtva Respýblıkasynyń Premer-mınıstri Algırdas Býtkıavıchıýspen kezdesti. Eki jaq saýda-ekonomıkalyq, ǵylymı-tehnıkalyq jáne mádenı baılanystar boıynsha birqatar máselelerdi talqylady.
Elorda ákimi eki eldi baılanystyratyn jáne qarqyndy damyp jatqan túrli salalardaǵy ózara yntymaqtastyqqa toqtalyp ótti. Statıstıkalyq málimetterge sáıkes, ótken jyldyń qorytyndysy boıynsha Qazaqstan men Lıtva arasyndaǵy taýar aınalymy 37%-ǵa artyp, 436,5 mıllıon AQSh dollaryn quraǵan. – Postkeńestik keńistiktegi aǵymdaǵy saıası jaǵdaıǵa baılanysty Qazaqstan Lıtva ónimin Eýrazııalyq ekonomıkalyq odaqqa ótkizýdiń mańyzdy arnasy bola alar edi. Bul turǵydan alǵanda, biz ortaq kásiporyndar ashýǵa múddelimiz, ol úshin qalada «Astana – jańa qala» arnaıy ekonomıkalyq aımaǵy sekildi tıimdi alań qurylǵan. Oǵan qatysýshylar aıtarlyqtaı kedendik jáne salyqtyq jeńildikterge ıe bolady, – dedi qala basshysy. Atap ótý kerek, bir apta buryn memleketterdiń kelisimdik-quqyqtyq qarym-qatynasyna 15 jyl toldy. Osy oraıda, Lıtvanyń úkimet basshysy Astana men Vılnıýs arasyndaǵy qarym-qatynastyń qarqyndy damyp kele jatqanyn atap ótip, ózara yntymaqtastyqtyń odan ári damýyna úmit bildirdi. – Vılnıýspen yntymaqtastyq jáne jalpy lıtvalyq kásipkerlermen baılanys ornatý bizdiń taraptan úlken qyzyǵýshylyq týdyrady. Ásirese, qala sharýashylyǵy, densaýlyq saqtaý, bilim berý salalaryndaǵy «aqyldy» tehnologııalar syndy baǵyttar boıynsha qyzyǵýshylyq bar. Bul saparyńyz Qazaqstan-Lıtva qarym-qatynasyna, sonyń ishinde óńiraralyq deńgeıde qosymsha serpin beretinine senimdimin, – dep qorytty sózin qala basshysy.
«Egemen-aqparat».