ASTANA. 26 tamyz. Pákstan premer-mınıstri Navaz Sharıftiń Qazaqstanǵa resmı sapary aıasynda keńeıtilgen quramda kelissózder ótti. Bul týraly akorda.kz habarlady.
Qazaqstan Prezıdenti óz sózinde N.Sharıftiń sapary ekijaqty qarym-qatynasty jandandyrýǵa tyń serpin beretinine senim bildirdi.
«Qazaqstandyqtar elimizdiń táýelsizdigin alǵashqylardyń biri bolyp Pákstannyń tanyǵanyn eshqashan umytpaıdy. Halyqaralyq kún tártibine qatysty ustanymdarymyzdyń uqsastyǵy, san ǵasyrlyq dostyq jáne mádenı baılanystar bizdi jaqyn ári baýyrlas elderge aınaldyrady. Búgingi ahýal jaǵdaıynda qarym-qatynastarymyzdyń jańa kezeńin bastaý úshin barlyq múmkindikti paıdalanatyn ýaqyt jetti. Sizdiń saparyńyz dál osy maqsatqa saı keletinine senimdimin», – dedi Memleket basshysy.
Pákstan Premer-mınıstri bizdiń elge degen aıryqsha kóńili men Nursultan Nazarbaevpen aradaǵy jyly qarym-qatynasy týraly aıtty.
«Men Qazaqstandy ózimniń ekinshi mekenim sanaımyn, sondyqtan Sizdiń elge kóp jyldan keıingi saparym aıryqsha áserge bóledi. Osy múmkindikti paıdalana otyryp, Sizdi ózińizge qolaıly ýaqytta Pákstanǵa kelýge shaqyramyn. Bul – meniń Astanaǵa birinshi kelýim. Bul qala Sizdiń kóregendigińizdiń sımvoly dep sanaımyn. Sizdiń basshylyǵyńyzben Qazaqstan zor áleýmettik-ekonomıkalyq jetistikterge jetti», – dedi N.Sharıf.
Ol sondaı-aq Pákstannyń Qazaqstanmen jáne Ortalyq Azııa elderimen yntymaqtastyq aıasyn keńeıtkisi keletinin atap kórsetti.
«Biz energetıka, saýda jáne ekonomıka, kólik salalaryn qosa qamtıtyn kóptegen salalarda qarym-qatynasty damytqymyz keledi. Osyǵan baılanysty Qazaqstandy Qytaı-Pákstan kólik júıesiniń jumysyna atsalysýǵa shaqyramyz. Bul Sizdiń el jáne osy óńirdegi basqa da memleketter úshin Parsy shyǵanaǵyna shyǵýǵa jol ashady», – dedi Pákstan premeri.
Sonymen qatar N.Sharıf Nursultan Nazarbaevty, sondaı-aq búkil Qazaqstan halqyn Qazaq handyǵynyń 550 jyldyǵymen jáne el Konstıtýsııasynyń 20 jyldyǵymen quttyqtady.
Aıdar О́risbaev.
Derek, sýret: akorda.kz.