Qoǵamdyq keńestiń qaýqarly bolǵany durys

Álemde bolyp jatqan alýan túrli keleńsiz oqıǵalar, úreı týyndatatyn irili-usaqty jaǵ­daılar, daǵdarystar men dúm­pýler tek úreılenip otyrýdy nemese syrttaı estip qana qoıýdy emes, álemdik jaǵdaılarǵa qarsy qam jasap, kez kelgen ahýalǵa aldyn ala daıyn bolý úshin áre­­kettenýge umtyldyrady. Árıne, biz­­­diń elimiz ishki jáne syrtqy qaýip­sizdikti qamtamasyz etip, eko­nomıkalyq áleýetti nyǵaıtý baǵytynda jumystar júrgizýde. Qazaqstandyqtarǵa usynyl­ǵan «100 naqty qadam» baǵdar­la­masy – bizdiń aldymyzda tur­ǵan damyǵan 30 eldiń qataryna qosylý úshin jasalatyn naqty, nyq jáne qaryshty alǵa umtylýdyń alǵysharty. Negizgi salalar qamtylǵan baǵdarlama qoǵamdaǵy kúni búginge deıin oryn alyp kelgen álsiz tus­tar­dy «emdep», bolashaqqa tyń kúsh­pen, etek-jeńin jıǵan tııanaqty­lyqpen qadam basýǵa sep bolmaq. Baǵdarlamanyń ekinshi bó­ligi tutastaı zań ústemdigin qamtamasyz etýge arnalǵan. Bul – óte oryndy. Halyq ádildik pen qorǵan izdep zań oryndaryna barady, al olardyń álsiz bolýy – qoǵamdy dimkás halge túsirip, turǵyndardyń renishin týyndatýy múmkin. Sonymen qatar, teli-tentekterdiń kóbeıe túsýine jol beretini belgili. Sondyqtan, zań salasyn, quqyq qorǵaý oryndaryn ońtaılandyrý, jańǵyrtý – óte ózekti, qajetti másele. Sonyń ishinde, 31-qadam, ıaǵnı etıkalyq normalardy buzýǵa jol beretin polıseılerdiń is-áreketterine shaǵymdanǵan azamattardyń aryzyn qaraý jónindegi qoǵamdyq keńes júıesin qurý arqyly polısııanyń ashyqtyǵyn qam­tamasyz etý máselesi turǵyn­dar­dyń rızashylyǵyn týǵyzatyn tapsyrma dep oılaımyn. Jasyratyny joq, qyzmettik quqyǵyn asyra paıdalanyp, tipti keı jaǵdaılarda zańdy ózderi buzyp, orynsyz jaǵdaılarǵa jol beretin polıseıler atalǵan salanyń abyroıyna nuqsan keltirip jatady. «Bir qumalaq bir qaryn maıdy shiritedi» degendeı, osydan kelip polıseıge degen senim men qurmet aıaqas­ty bolyp, jastardyń qyzy­ǵý­­­­shylyǵyn joǵaltady. Mun­daı jaǵ­daılarda olardyń tıisti oryn­darǵa shaǵymdanýyna týra keledi, polıseıdiń isin, tárti­bin tıisti oryndarmen birge qoǵam­dyq keńesterdiń talqy­laýy, saraptaýy durys-aq. Kez kelgen aryz-shaǵymdy qoǵam­­dyq keńes músheleriniń qaraýy polıseı jumysynyń ashyqty­ǵyn qamtamasyz etedi ári turǵyn­dar­dyń atalmysh qyzmetke, zańǵa degen senimin ornyqtyra túsedi. Sol sebepti, osynshalyqty ja­ýapty, mańyzdy mindetti moınyna alǵan qoǵamdyq keńesterdiń mártebesi men ókilettigi zańdy túrde belgilenýi kerek. Bul keńes qyzmetin arttyryp, onyń jumy­synyń formaldy túrde emes, naqty sıpatqa, salmaqty mańyzǵa ıe ekendigin qoǵamǵa da, quqyq qor­ǵaý organdary men keńes múshe­le­riniń ózderine de uǵyndyra túsedi.

Mánet ShYRAQBAI, «Jaýqazyn» balabaqshasy­nyń dırektory, Túpqaraǵan aýdandyq máslıhatynyń depýtaty.

Mańǵystaý oblysy.