Elbasy jarııa etken bes ınstıtýttyq reformany júzege asyrýǵa baılanysty Jańǵyrtý jónindegi ulttyq komıssııa qurylyp, zańnyń ústemdik qurýy turǵysynda jumys bastalǵany málim. Osyǵan oraı keshe Ortalyq kommýnıkasııalar qyzmetinde Parlament Májilisiniń depýtattary, «Nur Otan» partııasy fraksııasynyń músheleri Ramazan Sárpekov pen Zaǵıpa Balıeva «Sot júıesin jetildirý jáne quqyq qorǵaý organdarynyń qyzmetine qoǵam senimin arttyrý týraly» baspasóz máslıhatyn ótkizdi.
Aldymen sóz alǵan R.Sárpekov bes ınstıtýttyq reformany iske asyrýǵa baǵyttalǵan qyzý jumystar júrgizilip jatqanyna toqtaldy. Depýtat bul rette osy aýqymdy tapsyrmaǵa sáıkes jumysshy toptary qurylǵan, al olardyń jumystarynyń nátıjesi Prezıdent janynan qurylǵan Jańǵyrtý jónindegi ulttyq komıssııada qaralaryn da alǵa tartty. Komıssııanyń negizgi maqsaty – osy bes baǵyttaǵy reformany júrgizý qarqynyn baqylaý, memlekettik organdardyń qyzmetin bıznes-sektor men azamattyq qoǵamdy úılestirý arqyly júrgizý. Memlekettiń aldynda turǵan bul reformalyq máselelerdiń mańyzdylyǵyna baılanysty qurylǵan jumysshy toptaryna Parlament depýtattary da tartylǵandyǵyn aıta ketken jón.
«Búgingi sizdermen kezdesýdegi bizdiń mindetimiz osy reformanyń bir baǵyty – eldegi sot tóreliginiń bedelin kóterý, sýdıalyqqa úmitkerlerge qatysty talaptardy jetildirý, sottar sheshimderiniń ádilettiligin joǵarylatý máselelerine jáne qoǵamnyń ishki ister organdarynyń qyzmetine senimin arttyrý men azamattarǵa, qoǵamǵa jáne memleketke qarsy jasalǵan zańsyz áreketterge qarsy quqyq qorǵaý organdarynyń qabiletin kúsheıtý taqyrybyna baılanysty máselelerge jan-jaqty málimet berý», – dedi Ramazan Qumarbekuly. Sóıtti de depýtat osy reformaǵa jaýapty memlekettik organdarda uıymdastyrý máselesine jáne múddeli organdardan túsken usynystardy talqylaýǵa arnalǵan alǵashqy otyrystar ótkizilgendigin ortaǵa saldy.
Depýtattyń aıtýynsha, negizgi usynystar Elbasynyń tapsyrmalaryna baılanysty zańnyń ústemdigi men menshik quqyǵyn qorǵaýǵa, sýdıalar korpýsyn jemqorlyqtan alastaýǵa jáne biliktilik talaptaryn kúsheıtýge, sonymen qatar quqyq qorǵaý organdarynyń jumysyn jurtshylyq úshin ashyq túrde ótkizýge, onyń mártebesin joǵarylatyp, azamattar aldyndaǵy jaýapkershiligin arttyrýǵa, jergilikti mýnısıpaldy polısııany qurý máselelerine arnalǵan. Atap aıtqanda, polısııa qyzmetkerleriniń kásibıligin arttyrý, olardyń azamattar aldyndaǵy eseptiligin qamtamasyz etý jáne polısııa qyzmetine kandıdattardy testileýde arnaıy júıeni paıdalanýdyń keshendi sharalary qaralatyn bolady. Polısııa qyzmetiniń ashyqtyǵyn qamtamasyz etý maqsatynda qoǵamdyq keńester qurý da kózdelgen.
Memlekettik tildi mindetti túrde bilý qajettigin aıtqan Z.Balıeva osy oraıda normalardy oryndy qoldaný jónindegi biliktilik emtıhanyn qaıta qaraý kerektigin de alǵa tartty. Tıimdi quqyqtyq retteý maqsatynda «Sot júıesi týraly» jáne «Sýdıalardyń mártebesi týraly» Konstıtýsııalyq zańdardy qabyldaý kózdelip otyrǵandyǵy belgili boldy. Depýtat sóz reti kelgende oblystyq sot sýdıalyǵyna kandıdattyń aýdandyq sotta kem degende úsh jyldyq jumys ótili bolýy týraly talaby qoıylyp otyrǵandyǵyn da aıta ketti. Sýdıalyqqa kandıdattardy taǵaıyndaý úshin de olardyń sottarda mindetti túrde bir jyl tájirıbeden ótýi qajettigi de kózdelip otyrǵandyǵy erekshe ataldy. Sot tóreligi ınstıtýtyn jańǵyrtý maqsatynda ony Joǵarǵy Sot janynan jumys isteıtindeı etý kerektigi atap kórsetildi.
Sondaı-aq, sottardyń ashyqtyǵyn qadaǵalaý maqsatynda qoǵamdyq baqylaý ınstıtýtyn engizý jaıy da alǵa tartyldy. Z.Balıeva bul oraıda sýdıalardyń minsiz bedelge ıe bolýy tıistigin basa aıtty. Sot júıesinde merıtokratııa prınsıpin engizý úshin biliktilik talaptaryn qaıta qaraý kerek, dedi ol.
Asqar TURAPBAIULY,
«Egemen Qazaqstan».