Qostanaı oblysynyń ońtústigindegi Amangeldi aýdanynda kıiktiń qyrylýy toqtamaı tur, qaıta údep bara jatqan syńaıy bar. Mamandardyń málimetinshe, ólgen kıiktiń sany bir kúnniń ishinde eki ese kóbeıip, 20 myńǵa taıady. Kómilip, joıylǵan ólekseniń sany 19 231 dep habarlandy.
Aldyn ala belgili bolǵan málimetterge súıensek, olardyń jappaı qyrylýyna pasterellez aýrýy sebep bolýy múmkin. Biraq bul naqty dálel emes. Kıik óle bastaǵan mamyr aıynyń 11-13 kúnderi kıik jaıylǵan jerdiń topyraǵynan, sýynan, ólekselerdiń bıologııalyq materıalynan synamalar alynyp, respýblıkalyq laboratorııaǵa jiberilgen bolatyn. Onyń saraptaý, zertteý qorytyndysyna birshama ýaqyt kerek bolǵandyqtan, dala sulýynyń naqty neden qyrylý sebebi ázirshe anyqtalmaı otyr. Oblystyq orman sharýashylyǵy jáne janýarlar dúnıesi ınspeksııasy mamandarynyń málimetinshe, «Altyn dala» memlekettik tabıǵı rezervatynyń Amangeldi aýdanyndaǵy bóliginde 80 myńdaı kıik jaıylatyn.
Qazirgi tańda tótenshe jaǵdaıdyń saldaryn joıý jumystary júrgizilýde. Oǵan 515 adam jáne 76 tehnıka jumyldyrylǵan. О́ńirdiń ońtústigindegi Amangeldi aýdanynyń aýmaǵynda arnaıy lagerler qurylyp, 100 adam ornalastyryldy. Túnde túneý úshin aýdan ákimdigi 3 kıiz úı, Aqmola oblysy tótenshe jaǵdaılar departamenti – 3, Qostanaı oblysy tótenshe jaǵdaılar departamenti ashanaǵa arnalǵan – 1, №6697 áskerı bólimi 6 shatyr tikti. Olardyń úsheýi qosalqy maqsatta. Jeke quram aýyz sý, tehnıka jáne janarmaımen qamtamasyz etilgen. Sondaı-aq, aýdan ákimdigi, atalǵan áskerı bólim jáne «Altyn dala» memlekettik tabıǵı rezervatynyń kómegimen 3 tamaqtandyrý pýnkti jumys isteýde.
Oblys ákimi Nuraly Sádýaqasov apparat májilisinde eger kıiktiń qyrylyp jatqany juqpaly aýrýdan bola qalǵan jaǵdaıda, onyń adamdarǵa juqpaýy úshin barlyq aldyn alý jumystary júrgizilip jatqanyn aıtty. Qazir rezervattaǵy oqıǵa bolǵan jerde oblys ákiminiń orynbasary Bazyl Jaqypov jetekshilik etetin, quramynda túrli vedomstvolardyń mamandary bar arnaıy komıssııa da jumys istep jatyr. Sonymen qatar, rezervat ornalasqan Amangeldi, Jangeldın aýdandary basshylary da oqıǵa bolǵan jerde júr, múmkindiginshe barlyq kómekterin kórsetýde.
Názıra JÁRIMBETOVA,
«Egemen Qazaqstan».
Qostanaı oblysy,
Amangeldi aýdany.