Qazaqstan Kommýnıstik halyq partııasynan usynylǵan Qazaqstan Respýblıkasy prezıdenttigine kandıdat Turǵyn Syzdyqov Soltústik Qazaqstan oblysy Mamlıýt aýdanynyń aýylsharýashylyq ónimderin óndirýshilerimen kezdesti.
Kezdesý barysynda prezıdenttikke kandıdat QKHP Ortalyq komıtetiniń hatshysy T.Syzdyqov óziniń saılaýaldy tuǵyrnamasynyń basty eki baǵyty – kommýnıstik partııa qyzmetiniń negizgi qaǵıdattary jáne batystyq mádenıet pen batystyq ómir súrý saltynyń keri áseri týraly áńgimelep berdi.
«Batystyq álem júıesi daǵdarysqa ushyrady: jańa qoǵamdyq damý pishinderi izdestirilip jatyr. Qazirgi zamanǵy Batystyń kelbeti ekonomıkadaǵy, qarjy salasyndaǵy transulttyq korporasııalarmen, qoǵamnyń kedeıler jáne baılar bolyp bólinýimen aıqyndalatyn damýdyń postındýstrııalyq kezeńine, jahandaný dáýirine aıaq basýymen sıpattalady. Shekten shyqqan demografııalyq úderister, bosqyndardyń qalyń tolqyny gýmanıtarlyq apatqa ushyratýy múmkin», – dedi prezıdenttikke kandıdat kezdesý kezinde.
Kandıdattyń saılaýaldy tuǵyrnamasynda atap ótilgendeı, «jahandyq kompıýterlendirý men batystyq elektrondy BAQ qoǵamnyń sana-sezimin ýlap, adamdardyń arasyna iritki salý úshin ındıvıdýalızm qaǵıdatyn nasıhattaýda, bul ǵalamshardyń mádenı tutastyǵynyń quldyraýyna alyp kelýi múmkin».
Tek kommýnıster ǵana emes, sondaı-aq, iri saıasatkerler, ekonomıster, ǵalymdar da batystyq qoǵam ádiletsiz degen pikirdi qoldaıdy. Damýshy kommýnıstik ıdeıalardyń kómegimen ǵana adamzatty qutqarýǵa bolady. Ol óz kezeginde halyqtardyń teń quqyqtyǵymen, adam men tabıǵattyń múddesin úılestirýge múmkindik beredi.
Batystyq mádenıet pen batystyq ómir súrý standarttarynyń keri áseri jaıynda sóz qozǵaǵan Turǵyn Ysqaquly kelesi máselelerge toqtalyp ótti: Onyń pikirinshe,«Batystyq mádenıettiń túıtkilderi qazir árkimge aıan. Ol mańyzdy qundylyqtarynan aıyrylyp, baǵytyn joǵaltqandyqtan, múldem abdyrap qaldy.
«Altyn kórse perishte joldan taıady» demekshi, batystyq qoǵamda sheksiz baıý men jeke qajettilikterin qanaǵattandyrý ómirdiń basty mánine aınalyp barady. Batystyq fılmderde nasıhattalatyn beıqam ómir – adam-tutynýshy tárbıelep shyǵarýdy maqsat tutatyn aqıqattan alys eles qana».
Odan bólek, prezıdenttikke kandıdat agrarshylar jumysynyń, sonymen qatar, durys tamaqtanýdyń mańyzdylyǵyn atap ótip, batystyq fast-fýdtyń zııany men sapasyzdyǵyna keńinen toqtaldy. «Mundaı taǵamdy turaqty tutynýdan týyndaıtyn zııan ishimdiktiń nemese shylym shegýdiń saldarynan kem túspeıdi. Alaıda, fast-fýd salynǵan pakettiń syrtynda densaýlyqqa keltiretin zııany týraly eshqandaı eskertý joq. Durys tamaqtaný máselesi árkez ózekti bolyp qala bermek, ol – densaýlyq negizi. Batys elderinde halyqtyń fast-fýdqa degen qyzyǵýshylyǵy semizdikke shaldyqqan adamdardyń sanyn eselep jatyr. Sondyqtan da, batysta júrek-qan tamyrlary aýrýlary adam óliminiń basty sebebine aınalǵan», – dedi T.Syzdyqov.
О́z kezeginde QKHP oblystyq komıtetiniń jetekshisi S.Martemıanov jınalǵan jurtty aımaqtyq saılaýaldy shtabtyń jumys josparymen tanystyrdy. «Bizdiń shtab kandıdatty qoldaý boıynsha úgit jumystaryna kiristi. Senim bildirilgen adamdar belgilenip, nasıhat materıaldaryn taratý jumystary júrgizilip jatyr. Plakattar ilinip, bannerler ornatyldy, kásiporyn jumysshylarymen alǵashqy kezdesýler uıymdastyryldy. Jalpy, jumys isteý úshin barlyq jaǵdaı jasalǵanyn atap ótkim keledi, baspasózben de tyǵyz baılanys ornatylǵan», – dedi S.Martemıanov.
Kezdesýdi qorytyndylaǵan Turǵyn Syzdyqov basqosýǵa kelgenderge alǵysyn bildirip, olardy qyzyqtyrǵan suraqtarǵa jaýap berdi, sonymen qatar, aýylsharýashylyq ónim óndirýshilerine jaǵymdy aýa raıy men sátti egistik naýqanyn tiledi.
О́mir ESQALI,
«Egemen Qazaqstan».
Soltústik Qazaqstan oblysy,
Mamlıýt aýdany.