– Nege úıine asyǵady bul kisi? –
Dep bireýler keletindeı bilgisi.
Men úıime asyǵatyn sebebim –
Meniń jarym – asyl jardyń úlgisi.
Kún shyqqandaı – kúlse onyń kúlkisi.
Onyń kózi – kóz bitkenniń muńdysy.
Keıde meniń óńmenimnen ótedi
Sekildenip qosaýyzdyń uńǵysy.
Men sııaqty balasynyń tuńǵyshy
Keıde meni keledi onyń urǵysy.
Sonyń ystyq peıiline yntyzar
Men aıalap kele jatqan jyr qusy.
Men jáıli onyń keler bárin bilgisi
Aıyrbastaı almas ony myń kisi.
Anamdaı bop aımalaıdy betimdi
Basqa túgil, onyń jumsaq súlgisi.
Keledi onyń qasymda ylǵı júrgisi,
Jarasady menimen tek turmysy.
Qyzyqpaıdy basqalardyń baǵyna –
Tek menimen keledi ómir súrgisi.
Tek menimen keler ómir súrgisi
Jer betinde bar bolǵan soń bir kisi
Asyǵamyn, asyǵamyn úıime –
Bolmaıyn dep saǵyndyrǵan jyl qusy!
Júrsin Erman.