ASTANA. 7 naýryz. Búgin Reseı federaldy qaýipsizdik qyzmetiniń dırektory Aleksandr Bortnıkov saıasatker Borıs Nemsovtyń ólimine baılanysty eki kúdiktiniń qolǵa túskenin málimdedi. Bul týraly Interfax habarlady.
«Júrgizilgen jumystardyń nátıjesinde búgin atalmysh qylmysty jasaǵan eki kúdikti – Kýbashev Anzor jáne Dýdaev Zaýr degen bireýler qolǵa tústi, bul týraly memleket basshysyna baıandaldy», - dedi ol «Birinshi arnanyń» efırinde.
Bortnıkov kúdiktilerdiń Kavkaz turǵyndary ekenin anyqtap aıtty. «Qazirgi sátte jedel jáne qajetti tergeý sharalary jalǵasyp jatyr», - dedi FSB basshysy.
Ol «eldiń prezıdenti Vladımır Pýtınniń tapsyrýy boıynsha, FSB, ishki ister mınıstrligi men tergeý komıtetine Borıs Nemsovtyń ólimin tekserý jóninde birlesken jedel-tergeý tobyn qurý júktelgenin» atap ótti.
Eske sala keteıik, Borıs Nemsov 27 aqpan kúni Máskeýdegi Úlken Máskeý ózeni kópiri ústinde 23:30 saǵat shamasynda atyp óltirilgen edi. Sol kúni keshke onyń janynda ýkraın modeli Anna Dýrıskaıa bolǵan. Ol tergeý organdaryna túsinikteme bergennen keıin, 3 naýryzda eline qaıtyp ketti. Reseı tergeý organdarynda aıtylǵan áńgimeni syrtqa taratpaý jáne tergeýge kómektesý týraly qolhat bergen.
Reseı tergeý komıteti saıasatkerdi óltirýdiń birneshe versııasyn qarastyryp otyr. Olardyń arasynda saıası saldar da, turmystyq túıtkilder de bar. Qazir osy qylmysty ashýǵa kómektesken adamǵa 3 mln. teńge kóleminde syıaqy belgilengen.
Nemsovtyi óltirilýi Reseı men shetelderdiń saıasatkerleri men qoǵam qaıratkerleri arasynda úlken dúmpý týǵyzdy. 1 naýryz kúni Máskeýde ony eske alýǵa myńdaǵan adam shyqty.
Borıs Nemsov ótken seısenbi kúni Reseı astanasyndaǵy Troekýr zıratyna jerlendi.
Murat Aıtqoja.
Derek, sýret: Interfax.