Batys Qazaqstan oblysyna qarasty Zelenov aýdanynyń Asan aýylynda at sporty túrleri boıynsha jastar arasyndaǵy el chempıonaty márege jetti. Oblystyq balalar men jasóspirimder sport mektebiniń bazasynda kókpar, aýdaryspaq, teńge ilý jáne jamby atýdan jarystar uıymdastyryldy.
Kópshiliktiń qyzyǵýshylyǵyn týdyrǵan kókpardyń fınaldyq básekesinde qyzylordalyqtardan basym túsken ońtústikqazaqstandyqtar jeńis tuǵyryna kóterildi. Alań qojaıyndaryn 5:2 esebimen utqan Jambyl oblysynyń komandasy júldeli úshinshi orynǵa jaıǵasty. Al aýdaryspaqtan óz salmaq dárejelerinde ońtústikqazaqstandyq Elaman Pernebek (50 kg), qyzylordalyq Berdibek Jorabek (60 kg), aqtóbelik Shyńǵyshan Erjanov (70 kg), ońtústikqazaqstandyq Esimhan Rahmatýlla (80 kg), aqtóbelik Saıat Satym (80 kg joǵary) jeńis tuǵyryna kóterildi. Teńge ilýden aqtóbelik Álıhan Báshenbaı úzdik shyqsa, jamby atýdan ońtústikqazaqstandyq Eralhan Aıkóz aldyna jan salǵan joq.
Jarystyń jabylý rásiminde oblys ákimi Nurlan Noǵaev sóz alyp, kóneden úzilmeı kele jatqan ulttyq sport túrlerin odan ári damytýdyń qajettigin atap kórsetip, jarysqa qatysýshy barlyq komandalarǵa alǵysyn bildirdi.
«Egemen-aqparat».