Petropavl. 2 cáýir. Tártiptik keńestiń otyrysynda zań talaptaryn buzǵan birneshe sheneýnik jaýapkershilikke tartylyp, ózine de, qaramaǵyndaǵylarǵa da zańsyz syıaqy jazǵan bireýin qyzmetinen bosatýǵa sheshim aldy. Bul týraly memlekettik qyzmet isteri jáne sybaılas jemqorlyqqa qarsy is-qımyl departamentiniń baspasóz qyzmeti habarlady.
Oblys prokýrorynyń kómekshisi Samat Temirbaev Ýálıhanov aýdanynyń О́mirtasov degen turǵynynyń 2014 jyldyń qańtar-mamyr aılary aralyǵynda zeınetaqy tóleý ortalyǵynan 80 myń teńgeni zańsyz alyp kelgenin málimdedi. Tergeý barysy kórsetkendeı, ol 10 kún boıy sebepsiz kelmegendikten, «jumyssyzdar» esebinen shyǵarylǵan. Alaıda, ol jóninde zeınetaqy tóleý ortalyǵyna habarlanbaǵan. Nátıjesinde aýdandyq jumyspen qamtý jáne áleýmettik baǵdarlamalar bólimi basshysynyń orynbasary Gúljan Qadyrova kináli dep tanylǵan. Oǵan qyzmetine tolyq sáıkes kelmeıtini eskertildi.
«Jambyl aýdandyq aýyl sharýashylyǵy bóliminiń basshysy Talǵat Naýryzbaev buryn qyzmettik jalǵan qujattar jasaǵan qylmystyq iske qatysy bar maldárigerlik stansııa dırektorynyń orynbasary Gúlnar Hasenovaǵa basshynyń mindetin júktegen. Ol bolsa, qyzmet babyn asyra paıdalanyp, sybaılas jemqorlyq zańnamalaryn aıaqqa basqan. Atap aıtqanda, Konstıtýsııasy merekesi degen jeleýmen 2014 jyly 10 qyrkúıekte zańsyz buıryq shyǵaryp, ózine 100 myń teńge, bas býhgalter Afanasevaǵa 135 myń teńge, al Qazaqstan halqy birligi kúni qarsańynda býhgalterge 40 myń teńge syıaqy jazǵan. Odan ári eshqandaı buıryqsyz rásimdemesten bas býhgalterdiń mindetin atqardy degen sebepti alǵa tartyp, býhgalterdi 200 myń teńgemen jarylqap tastaǵan»,– dep jazylǵan aýdan prokýrory Shoqan Qultanovtyń habarlamasynda.
Tártiptik keńes músheleri T. Naýryzbaevqa eskertý berý, G. Hasenovany jumystan bosatý týraly uıǵarymdy biraýyzdan qoldady.
О́mir Esqalı.
Derek: memlekettik qyzmet isteri jáne sybaılas jemqorlyqqa qarsy kúres is-qımyl departamentiniń baspasóz qyzmeti.
Sýret: egemen.kz