О́SKEMEN. 21 mamyr. Shyǵys óńirinde «Baspasózge jazylýshylar kúni» aksııasynyń saltanatty ashylýy ótti. Bul kúni saǵat 10.00-den bastap gazet-jýrnalǵa jazylǵan ár adam syılyq pen jeńildikke ıe boldy. Endi olar ózderiniń kóńili qalaǵan gazeti men jýrnaldaryn turaqty túrde alyp, oqyp turatyn bolady. Bul týraly egemen.kz tilshisi habarlady.
Shyǵys Qazaqstan aýmaǵynda taralatyn respýblıkalyq, oblystyq jáne qalalyq gazetter óńir turǵyndary arasynda keńinen suranysqa ıe. Muny Aleksandr Pýshkın atyndaǵy oblystyq kitaphanada ótken sharaǵa qatysýshylar qatarynyń moldyǵynan ańǵarýǵa bolady. «Qazposhta» qyzmetkerleri merzimdi baspasózge jazylýshy eski de jańa dostardy túrli syılyqtarmen, jeńildiktermen marapattady. Olardyń ishinde elimizdiń bas basylym – «Egemen Qazaqstan» respýblıkalyq gazetine jazylýshylar da bar.
Aksııa barysynda oblystyq ishki saıasat basqarmasy bastyǵynyń orynbasary Ernur Býrahan: «Merzimdi baspasózdiń álemde, el ishinde, óńirde bolyp jatqan oqıǵalar týraly shynaıy, jan-jaqty aqparatpen qamtýdaǵy róli zor. Qazirgi ýaqytta elektrondy aqparat kózderiniń kóptigine qaramastan, oqylymdy gazet pen jýrnaldyń mańyzy árqashan joǵary. Sondyqtan óńirimizdiń turǵyndary arasynda da gazet-jýrnalǵa degen suranys azaımaıtynyna senemiz», – dedi.
Aıta keteıik, Shyǵys Qazaqstanda 102 merzimdi baspasóz oblys halqyn aqparatpen qamtamasyz etýde. Olardyń árqaısysynyń onlaın nusqalary bar. Merzimdi baspasózge ekinshi jartyjyldyqqa jazylýǵa arnalǵan jeńildikter 20 mamyrdan 23 mamyrǵa deıin barlyq poshta bólimshelerinde jalǵasady.
Dýman Anash.
Derek: egemen.kz.
Sýret: Shyǵys Qazaqstan oblysynyń aqparat ortalyǵy.