ASTANA. 2 sáýir. Ulybrıtanııa patshaıymy, 88 jastaǵy Elızaveta II korol otbasyna keletin syılyqtarǵa razy emes. Bul týraly gazeta.ru habarlady.
Patshaıymǵa kelgen sońǵy syılyqtardyń ishinde taraq pen bulaq sýy quıylǵan qutylar bar. Dese de, Elızaveta II ózine deıingi patsha men patshaıymdarǵa berilgen syılyqtar áldeqaıda qundy bolǵanyn aıtady.
Taıaýda taq ıegeri Vındzordaǵy kitaphanaǵa bardy. Ol jerde korol otbasyna tıisti qujattardy nómirleý jobasynyń ashylýyna qatysty. Georg I, Georg II, Georg III, Georg IV jáne Vılgelm IV kezindegi kitaptar men hattardy oqyp, paraqtap kórgen Elızaveta II bul qujattardyń qundylyǵyna nazar aýdardy. Korol otbasyna 1812 jyly Parsy shahy syılaǵan óleńder jınaǵyn qolyna alǵan ol: «Endi sizderge mynadaı syılyqtar eshqashan kelmeıdi», – dedi. Bul kitaptar men hattar osyǵan deıin Patsha saraıynyń jertólesinde saqtalyp kelgenin aıta keteıik. Sondaı-aq, bul kúni Parsy shahy syılaǵan kitapty Patshaıym alǵash ret qolyna ustady.
Nómirleý jobasy kezinde 350 myń betti tirkeýge alý josparlanǵan. Keıin tarıhı qujattar zertteýshilerdiń nazaryna usynylmaq. Jobanyń basty maqsaty – Georg áýleti kezindegi Ulybrıtanııa týraly teris pikir men kózqarasty oń baǵytta ózgertý. Búgingi kúnge deıin korol otbasyna tıesili barlyq málimettiń tek 15 paıyzy ǵana jarııalanǵan eken.
Elaman Qońyr.
Derek: gazeta.ru.
Sýret: twitter.com.