ASTANA. 21 mamyr. Astanada VIII Astana ekonomıkalyq forýmy aıasynda «Nurly jol – jańa múmkindikter» atty halyqaralyq áıelder forýmy ótti. Oǵan Memlekettik hatshy, Prezıdent janyndaǵy áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy Gúlshara Ábdiqalyqova qatysty. Bul týraly akorda.kz habarlady.
Sondaı-aq, forým jumysyna Parlament Májilisiniń depýtaty M.Qazbekova, Aýǵanstan Parlamentiniń depýtaty Sh.Barakzaı, BUU Damý baǵdarlamasynyń ákimshisi H.Klark, beıbitshilik boıynsha Nobel syılyǵynyń 2011 jylǵy laýreaty T.Karman, sondaı-aq, taıaý jáne alys shet elderdiń saıası, ekonomıkalyq, bıznes-toptary ókilderi qatysty.
Forýmdy ashqan Gúlshara Ábdiqalyqova genderlik teńdikti ilgerletýdegi jáne áıelderdiń iskerlik belsendiligin arttyrýdaǵy elimizdiń jetistikterin atap ótti. Memlekettik hatshy ınstıtýsıonaldyq tásilderdi jetildirýdiń, áıelder kásipkerligin odan ári damytýǵa ınvestısııalar men ınnovasııalar tartýdyń jáne áıelderdi oqytý men olardyń biliktiligin arttyrýdyń zamanaýı ınfraqurylymyn jasaý qajettiligine nazar aýdardy.
Komıssııa tóraıymy qazirgi kezeńde ınfraqurylymdyq damýdyń 2015-2019 jyldarǵa arnalǵan «Nurly jol» memlekettik baǵdarlamasyndaǵy jobalardy iske asyrý isine áıelderdiń kóbirek tartylýyn qamtamasyz etý mańyzdy ekenin aıtty.
Sonymen birge, forýmda álemdik jańa trendter jaǵdaıynda áıelderdiń ekonomıkalyq belsendiligin odan ári arttyrýǵa qatysty syn-qaterler men múmkindikter talqylandy.
Forýmdy Qazaqstannyń isker áıelder qaýymdastyǵy «Nurly jol – bolashaqqa bastar jol» joldaýyn iske asyrý aıasynda uıymdastyrdy. Jumys qorytyndysy boıynsha áıelderdiń ekonomıkalyq múmkindikterin arttyrý, olardyń arasyndaǵy jumyssyzdyq deńgeıin tómendetý, kóshbasshylyq áleýetin arttyrý, sondaı-aq, Qazaqstanda shaǵyn jáne orta bıznesti qoldaý jóninde usynymdar ázirlendi.
Elaman Qońyr.
Derek: akorda.kz.
Sýret: todaynews.kz.