ASTANA. 11 naýryz Lıngvıstıkalyq komıssııa aldynda memlekettik tilden emtıhan tapsyrǵan Prezıdenttikke úmitker Nursultan Nazarbaev jazba jumysy barysynda eshbir qate jibergen joq. Bul týraly «QazAqparat» habarlady.
Komıssııa tóraǵasy Myrzataı Joldasbekov: «Jazba jumysy Nursultan Nazarbaev ózi tańdaǵan konvert boıynsha «Bizdiń kúshimiz – birlikte» degen taqyrypta boldy. Bul kisi Prezıdent bolǵaly beri memleketimizdiń týyn tuǵyry etip, eldiń yntymaǵyn kóterip kele jatqan adam. Sol yntymaq-birliktiń arqasynda Qazaqstan 23 jyldyń ishinde osyndaı dárejege jetti. Osynyń bárin eki paraq qaǵazǵa óte keń, aýqymdy, syıymdy etip, taqyrypty óte ádemi asha bildi. Qate joq. Kandıdat osyndaı bolý kerek dep oılaımyn», – dedi.
Emtıhannyń ekinshi taqyryby mátin oqý boldy.
«Ekinshi suraq boıynsha Ilııas Esenberlınniń prozasynan mátin berildi. Nursultan Ábishuly ony keremet mánerlep oqyp shyqty. Úshinshi suraq – «Babalar sózi – danalyq kózi» degen erkin taqyryp. Bul kisi ózi eshbir memlekettiń tarhynda joq «Mádenı mura» degen úlken baǵdarlama júrgizgen adam. Onyń qoldaýymen 100 tomdyq «Babalar sózi» degen kitap shyqqan. Elbasy osy kitaptardan óte jaqsy mysaldar keltirip, baıyrǵy babamyzdyń danalyǵynan, solardyń halyqqa beretin tárbıelik máni jóninde keń áńgime jasap berdi. Qosymsha suraqtar boıynsha kandıdat Abaıdyń qara sózderin aıtyp berdi. Qorytyndysynda komıssııa kandıdat Nursultan Nazarbaev qazaq tilin erkin meńgergen degen sheshim qabyldady», - dep túıdi M.Joldasbekov.
Joldybaı Bazar.
Derek, sýret: «QazAqparat».