2015 jylǵy 7 sáýir, Astana qalasy
Bas bostandyǵy shekteýli azamattarǵa, sondaı-aq sot úkimi boıynsha jazasyn bas bostandyǵynan aıyrý oryndarynda ótep júrgen, arnaıy mekemelerge ornalastyrylǵan adamdarǵa medısınalyq kómek kórsetý qaǵıdalaryn bekitý týraly
«Halyq densaýlyǵy jáne densaýlyq saqtaý júıesi týraly» Qazaqstan Respýblıkasy Kodeksiniń 88 – babynyń 4-tarmaǵyna sáıkes, buıyramyn:
1. Qosa berilip otyrǵan Bas bostandyǵy shekteýli azamattarǵa, sondaı-aq sot úkimi boıynsha jazasyn bas bostandyǵynan aıyrý oryndarynda ótep júrgen, arnaıy mekemelerge ornalastyrylǵan adamdarǵa medısınalyq kómek kórsetý qaǵıdalary bekitilsin.
2. Qazaqstan Respýblıkasy Ishki ister mınıstrliginiń Qylmystyq-atqarý júıesi komıteti (B.M. Berdalın):
1) osy buıryqty Qazaqstan Respýblıkasy Ádilet mınıstrliginde memlekettik tirkeýdi;
2) osy buıryqty Qazaqstan Respýblıkasy Ádilet mınıstrliginde memlekettik tirkegennen keıin kúntizbelik on kún ishinde ony merzimdi baspa basylymdarynda jáne «Ádilet» aqparattyq-quqyqtyq júıesinde resmı jarııalaýǵa joldaýdy;
3) osy buıryqty Qazaqstan Respýblıkasy Ishki ister mınıstrliginiń ınternet-resýrsynda ornalastyrýdy qamtamasyz etsin.
3. Osy buıryqtyń oryndalýyn baqylaý Qazaqstan Respýblıkasy Ishki ister mınıstriniń orynbasaryna (B.B. Bısenqulov) júktelsin.
4. Osy buıryq alǵashqy resmı jarııalanǵan kúninen bastap kúntizbelik on kún ótken soń qoldanysqa engiziledi.
Qazaqstan Respýblıkasynyń Ishki ister mınıstri Q. Qasymov.
KELISILDI
Qazaqstan Respýblıkasynyń Densaýlyq saqtaý jáne
áleýmettik damý mınıstri ___________ T.Dúısenova
2015 jylǵy 17 sáýir
KELISILDI
Qazaqstan Respýblıkasynyń Ulttyq ekonomıka
mınıstri ___________ E.Dosaev
2015 jylǵy 28 sáýir
Qazaqstan Respýblıkasy Ishki ister mınıstriniń 2015 jylǵy 7 sáýirdegi №314
buıryǵymen bekitilgen
Bas bostandyǵy shekteýli azamattarǵa, sondaı-aq sot úkimi boıynsha jazasyn bas bostandyǵynan aıyrý oryndarynda ótep júrgen, arnaıy mekemelerge ornalastyrylǵan adamdarǵa medısınalyq kómek kórsetý qaǵıdalary
1. Jalpy erejeler
1. Osy Bas bostandyǵy shekteýli azamatarǵa, sondaı-aq sot úkimi boıynsha jazasyn bas bostandyǵynan aıyrý oryndarynda ótep júrgen, arnaıy mekemelerge ornalastyrylǵan adamdarǵa medısınalyq kómek kórsetý qaǵıdalary (budan ári - Qaǵıdalar) «Halyq densaýlyǵy jáne densaýlyq saqtaý júıesi týraly» Qazaqstan Respýblıkasy Kodeksiniń (budan ári - Kodeks) 88-babynyń 4-tarmaǵyna sáıkes ázirlendi jáne bas bostandyǵy shekteýli, sondaı-aq sot úkimi boıynsha bas bostandyǵynan aıyrý oryndarynda jazasyn ótep jatqan, arnaıy mekemelerge ornalastyrylǵan azamattarǵa medısınalyq kómek kórsetý tártibin anyqtaıdy.
2. Bas bostandyǵy shekteýli azamattarǵa medısınalyq kómek kórsetý tártibi
2. Arnaıy mekemelerde: ýaqytsha ustaý ızolıatorlarynda (budan ári - ÝUI), belgili bir turǵylyqty jeri men qujattary joq adamdarǵa arnalǵan qabyldaý-taratý oryndarynda (budan ári - QTO), ákimshilik qamaýǵa alynǵan adamdarǵa arnalǵan arnaıy qabyldaý oryndarynda (budan ári - AQO) medısına qyzmetkerleri olarda ustalatyn adamdarǵa medısınalyq kómekti, arnaıy mekemelerde sanıtarııalyq-epıdemıologııalyq qaǵıdalar men gıgıenalyq normatıvterdiń saqtalýyn qamtamasyz etýdi uıymdastyrady jáne júzege asyrady.
Shuǵyl medısınalyq kómekke, sondaı-aq onkologııalyq, venerologııalyq aýrýlar, AITV-ınfeksııasy, týberkýlez, qant dıabeti men úzdiksiz baqylaý jáne emdeý kórsetiletin basqa da aýrýlar boıynsha ambýlatorlyq nemese stasıonarlyq tekserýge jáne emdeýge muqtaj adamdar Qazaqstan Respýblıkasy densaýlyq saqtaý júıesiniń tıisti medısınalyq uıymdarynda (budan ári - medısınalyq uıymdar) qajetti mamandandyrylǵan medısınalyq kómekpen qamtamasyz etiledi.
Gaýpvahtalarda ustalatyn áskerı qyzmetshilerge medısınalyq kómek «Qazaqstan Respýblıkasy Qarýly Kúshteriniń, basqa da áskerleri men áskerı quramalarynyń jalpy áskerı jarǵylaryn bekitý týraly» 2007 jylǵy 5 shildedegi Qazaqstan Respýblıkasy Prezıdentiniń №364 Jarlyǵymen bekitilgen Qazaqstan Respýblıkasy Qarýly Kúshteriniń, basqa da áskerleri men áskerı quralymdarynyń ishki qyzmetiniń jarǵysynda kózdelgen tártippen kórsetiledi.
3. Medısınalyq kómek kórsetý kezinde arnaıy mekemelerdiń medısına qyzmetkerleri Kodeksti, sondaı-aq osy Qaǵıdalardy basshylyqqa alady.
4. Arnaıy mekemelerdiń emdeý-profılaktıkalyq, sanıtarııalyq-epıdemııaǵa qarsy jáne sanıtarııalyq – profılaktıkalyq jumys máseleleri jónindegi qyzmetin ádistemelik qamtamasyz etýdi ishki ister organdarynyń (budan ári - ishki ister organdary) biryńǵaı júıesin basqaratyn Qazaqstan Respýblıkasy ortalyq atqarýshy organynyń qurylymdyq bólimshesi, ishki ister organdary departamentteriniń medısınalyq qyzmetteri (budan ári - medısınalyq qyzmetter), densaýlyq saqtaý salasyndaǵy ýákiletti organy (budan ári - ýákiletti organ) jáne halyqtyń sanıtarııalyq-epıdemıologııalyq salamattylyǵy salasyndaǵy ýákiletti organynyń vedomstvolary júzege asyrady.
5. Arnaıy mekemelerde ustalatyn adamdarǵa medısınalyq kómek kórsetý maqsatynda medısına qyzmetkeriniń arnaıy jabdyqtalǵan kabıneti (budan ári - medısınalyq kabınet) nemese medısınalyq pýnkt jumys isteıdi.
6. Medısınalyq kabınet medısınalyq qyzmettiń basshysy bekitken tizbege sáıkes medısınalyq maqsattaǵy buıymdarmen jáne medısınalyq tehnıkamen, zalalsyzdandyrý quraldarymen jáne jýý materıaldarymen qamtamasyz etiledi.
7. Arnaıy mekemelerdiń medısına qyzmetkerleriniń qyzmeti arnaıy mekemeniń bastyǵy bekitken, medısınalyq qyzmetpen kelisilgen jumys josparyna sáıkes uıymdastyrylady.
8. Arnaıy mekemelerde ustalatyn adamdardy medısınalyq qamtamasyz etý jónindegi málimetterdi arnaıy mekemeler medısınalyq qyzmetke usynady.
9. Arnaıy mekemeniń basshysy medısınalyq qyzmetpen kelisilgen medısına qyzmetkerleriniń fýnksıonaldyq mindetterin, medısına kabınetiniń jumys kestesin, medısınalyq ızolıatordaǵy naýqastar úshin ishki tártip erejesin ázirleıdi jáne bekitedi.
10. Arnaıy mekemelerdiń medısına qyzmetkerleri:
1) arnaıy mekemelerde ustalatyn adamdarǵa medısınalyq kómek kórsetýdi;
2) arnaıy mekemelerdiń úı-jaılarynda epıdemııaǵy qarsy rejımniń saqtalýyn qamtamasyz etýdi;
3) arnaıy mekemelerde ustalatyn adamdardy medısınalyq-sanıtarlyq qamtamasyz etý máseleleri boıynsha memlekettik densaýlyq saqtaýdy basqarýdyń jergilikti organynyń medısınalyq uıymdarmen ózara is-qımyl jasasýdy júzege asyrady;
11. Arnaıy mekemelerde ustalatyn adamdarǵa medısınalyq kómek kórsetý kezinde medısına qyzmetkerleri:
1) kelip túsken, kúndelikti aralaý júrgizý, medısınalyq kómekke júgingen, arnaıy mekemeden ketken kezde medısınalyq tekserý júrgizý arqyly juqpaly, venerologııalyq, teri, psıhıkalyq, parazıttik jáne basqa da qaýipti aýrýlardy anyqtaýdy;
2) bastapqy medısınalyq-sanıtarııalyq kómek kórsetýdi;
3) stasıonarlyq emge muqtaj naýqastardy aýrýhanaǵa jatqyzýdy;
4) dáriger-mamandar men konsýltanttardyń usynystary men taǵaıyndaýlaryn oryndaýdy;
5) dári-dármektik preparattarǵa, zalalsyzdandyrý quraldary men medısınalyq jabdyqtarǵa qajettilikti esepteýdi, olardy satyp alý týraly tıisti ótinimderdi arnaıy mekemeniń basshylyǵyna belgilengen tártippen usynýdy, olardy saqtaýdyń, berýdiń jáne esepke alýdyń belgilengen tártibin oryndaýdy;
6) arnaıy mekemelerde ustalatyn adamdardy ornalastyrý, tamaqtandyrýdy uıymdastyrý, monsha-kir jýýmen qamtamasyz etý, arnaıy mekemelerde ustalatyn adamdardy sanıtarlyq óńdeý kezinde sanıtarlyq erejeler men gıgıenalyq normatıvterdiń saqtalýyn qamtamasyz etýdi;
7) juqpaly naýqastar anyqtalǵan kezde sanıtarııalyq epıdemııaǵa qarsy jáne sanıtarlyq-profılaktıkalyq is-sharalardy júrgizýdi qamtamasyz etýdi;
8) zalalsyzdandyrý is-sharalarynyń júrgizilýin baqylaýdy qamtamasyz etýdi;
9) sanıtarlyq-aǵartý jumystarynyń júrgizilýin qamtamasyz etýdi;
10) ishki ister organdary departamentteriniń sanıtarııalyq-epıdemıologııalyq qadaǵalaý tobyna jáne halyqtyń sanıtarııalyq-epıdemıologııalyq salamattylyǵy salasyndaǵy ýákiletti organynyń vedomstvolaryna arnaıy mekemelerde ustalatyn adamdardyń arasynda juqpaly naýqastardyń anyqtalǵany týraly shuǵyl habarlamalar jiberýdi;
11) «Densaýlyq saqtaý uıymdarynyń bastapqy medısınalyq qujattama nysandaryn bekitý týraly» Qazaqstan Respýblıkasy Densaýlyq saqtaý mınıstriniń mindetin atqarýshynyń 2010 jylǵy 23 qarashadaǵy № 907 buıryǵymen (Normatıvtik quqyqtyq aktilerdi memlekettik tirkeý tiziliminde № 6697 bolyp tirkelgen) (budan ári - № 907 buıryq) bekitilgen medısına qyzmetkeri kabınetiniń bastapqy medısınalyq qujattamasynyń nysandaryna sáıkes medısınalyq qujattamany júrgizýdi júzege asyrady.
12. Aınalasyndaǵy adamdarǵa qaýip tóndiretin juqpaly aýrýlarmen aýyratynyna kúdik týyndaǵan jáne shuǵyl medısınalyq kómekke muqtaj adamdardy anyqtaý maqsatynda jańa kelgenderdiń barlyǵyna arnaıy mekemege kelgen birinshi táýlik ishinde bastapqy aldyn alý medısınalyq tekserý júrgiziledi. Qabyldaý mekeme boıynsha kezekshi qyzmetkerdiń nemese baqylaýshylar qyzmeti ókiliniń qatysýymen júrgiziledi.
Bul rette teri, venerologııalyq, psıhıkalyq aýrýlardyń belgilerine, pedıkýlezben, qyshymamen aýyratyndyqqa erekshe kóńil bólinedi.
Tekserýdi medısına qyzmetkeri arnaıy jabdyqtalǵan medısınalyq kabınette júrgizedi. Tekserý nátıjeleri osy Qaǵıdalarǵa 1-qosymshaǵa sáıkes nysan boıynsha arnaıy mekemelerde ustalatyn adamdardan bastapqy jaýap alý jáne olarǵa medısınalyq kómek kórsetýdi tirkeý jýrnalynda tirkeledi.
13. Tekserý barysynda mindetti túrde:
1) densaýlyq jaǵdaıyna shaǵymdardy, ómir jáne aýrý tarıhyn jınaý;
2) antropometrııalyq zertteýler (boıy, dene salmaǵy);
3) pýlsti, júrek soǵýynyń jıiligin, arterııalyq qan qysymyn jáne dene temperatýrasyn ólsheý;
4) terisiniń jáne kózge kórinetin shyryshty qabattarynyń jaǵdaıyn sıpattaý;
5) ishki organdaryna obektıvti zertteý júrgiziledi.
14. Medısına qyzmetkeri bolmaǵan jaǵdaıda arnaıy mekeme boıynsha kezekshi shuǵyl medısınalyq kómekke muqtaj adamdardy, sondaı-aq jaraqat belgilerin, pedıkýlezdi, qyshymany anyqtaý úshin denesiniń terisin jáne basynyń shashyn (denesiniń túgin) qarap, jańadan kelip túskenderden densaýlyq jaǵdaıy týraly jaýap alady.
Jańadan kelip túskender ózin nashar sezinýine shaǵymdanǵan nemese aýrý (jaraqat) belgileri bolǵan jaǵdaıda arnaıy mekeme boıynsha kezekshi dereý jedel medısınalyq járdem-brıgadasyn shaqyrady.
Jaýap alý nátıjeleri osy Qaǵıdalarǵa 2-qosymshaǵa sáıkes nysan boıynsha densaýlyq jaǵdaıyna shaǵymdary jáne kórsetilgen medısınalyq kómek týraly arnaıy mekemeniń medısınalyq kabınetinde saqtalatyn medısınalyq kómek kórsetýge júginýshilerdi tirkeý jýrnalyna, al medısına qyzmetkeri bolmaǵan kezeńde - arnaıy mekeme boıynsha kezekshiniń jýrnalyna jazba jazylady.
Sondaı-aq medısına qyzmetkeri negizgi usynystarymen jáne taǵaıyndaýlarymen birge medısına uıymdary dáriger-mamandarynyń konsýltasııalyq kómegin uıymdastyrady;
15. Juqpaly teri, irińdik jáne sańyraýqulaqtyq aýrýlarmen zaqymdalǵan adamdar basqalardan jeke jáne olardan keıin jýynady. Olarmen baılanysta bolǵan adamdardy medısına qyzmetkeri tekseredi jáne qosymsha sanıtarııalyq óńdeýge jiberedi.
Tekserý kezinde pedıkýlez anyqtalǵan adamdar sanıtarııalyq ótkizgishte pedıkýlezge qarsy preparattardy qoldaný arqyly sanıtarııalyq óńdeýden ótkiziledi.
16. Juqpaly aýrýlarmen aýyratyndyǵyna kúdikti adamdar tekserilgennen keıin birden deni saý adamdardan oqshaýlanady jáne olar dıagnozy belgili bolǵansha jeke ustalady. Mekemede juqpaly aýrýlarmen aýyrǵan jáne aýyratyndyǵyna kúdikti adamdardy ýaqytsha oqshaýlaý úshin qol jýǵyshy jáne dárethanasy bar 1-2 tósek orynǵa arnalǵan medısınalyq oqshaýlaǵysh jabdyqtalady. Bir tósek orynnyń aýdany keminde 6 sharshy metr bolady.
Medısına qyzmetkeri anyqtalǵan juqpaly aýrýdyń árbir oqıǵasy týraly arnaıy mekemeniń bastyǵyna jáne birýaqytta medısınalyq kyzmettiń bastyǵyna baıandaıdy.
Juqpaly aýrý (kúdiktiler), taǵamnan ýlaný, egýge erekshe reaksııanyń árbir jaǵdaıy týraly shuǵyl habarlama jasalyp, 12 saǵat ishinde sanıtarııalyq-epıdemıologııalyq qadaǵalaý bólimshelerine jáne halyqtyń sanıtarııalyq-epıdemıologııalyq salamattylyǵy salasyndaǵy ýákiletti organnyń vedomstvolaryna jiberiledi.
17. Arnaıy mekemede asa qaýipti juqpaly aýrýlarmen aýyratyndyǵyna kúdikti naýqastar, sondaı-aq shuǵyl medısınalyq kómekke muqtaj adamdar anyqtalǵan kezde medısına qyzmetkeri (ol bolmaǵan jaǵdaıda - arnaıy mekeme boıynsha kezekshi) jedel medısınalyq járdem brıgadasyn shaqyrady.
Shuǵyl, naýqastyń ómirine qaýip tóngen, jedel medısınalyq járdem brıgadasy uzaq ýaqyt bolmaǵan nemese kelý múmkindigi bolmaǵan jaǵdaılarda arnaıy jeke mekeme boıynsha kezekshi naýqasty dereý jaqyn jerdegi medısına uıymyna jetkizý boıynsha sharalar qabyldaıdy.
18. Eger arnaıy mekeme medısına qyzmetkeriniń nemese jedel medısınalyq járdem brıgadasynyń qorytyndysy boıynsha naýqas stasıonarlyq emdelýge muqtaj bolsa, onda ol medısınalyq uıymǵa jiberiledi.
19. Medısına uıymynyń basshysy arnaıy mekemelerde ustalatyn adamdarǵa qajetti medısınalyq kómek kórsetý úshin medısına uıymynda arnaıy palatalar bóledi jáne tıisti úlgide (ishki ister organdarynyń kómegimen) jabdyqtaıdy.
20. Aýrýhanaǵa jatqyzýǵa kórsetýler bolmaǵan kezde jedel medısınalyq járdem brıgadasynyń dárigeri tekserý nátıjelerin, dıagnozyn, oryndalǵan medısınalyq manıpýlıasııalardy, sondaı-aq arnaıy mekemeniń medısına qyzmetkerine osy naýqasty baqylaý jónindegi usynystaryn kórsete otyryp, tıisti anyqtama jasaıdy. Kórsetilgen anyqtama arnaıy mekemede ustalatyn adamnyń jeke isine tirkeledi. Medısına qyzmetkeri anyqtamada baıandalǵan málimetterdi osy Qaǵıdalarǵa 2-qosymshaǵa sáıkes nysan boıynsha arnaıy mekemeniń medısına qyzmetkeri kabınetine júginýlerdi tirkeý jýrnalyna kóshirip jazady.
21. Naýqastanǵan, alaıda shuǵyl aýrýhanaǵa jatqyzýǵa jatpaıtyn adamdar arnaıy mekemede bolý kezeńinde medısına qyzmetkerleriniń kúshterimen qajetti ambýlatorlyq medısınalyq kómekpen qamtamasyz etiledi.
22. Arnaıy mekemede medısına qyzmetkerleri bolmaǵan jaǵdaıda arnaıy mekemede ustalatyn adamdarǵa dárigerge deıingi alǵashqy kómek kórsetý jónindegi is-sharalardy osy mekemeniń qyzmetkerleri júzege asyrady.
Arnaıy mekeme boıynsha kezekshide dárigerge deıingi alǵashqy kómek kórsetýge arnalǵan qobdısha bolady.
23. Arnaıy mekemede ustalatyn adamdardyń arasynan aýyrǵandardy anyqtaý maqsatynda medısına qyzmetkeri kezekshi qyzmetkerdiń erip júrýimen kún saıyn kameralardy aralaıdy.
24. Medısına qyzmetkeri ÝUI-dan, onyń ishinde tranzıtpen ketetinderdiń barlyǵyn aıdaýyldaýǵa jaramdylyǵyn anyqtaý úshin mindetti medısınalyq tekserýden ótkizedi. Tekserý nátıjeleri bastapqy jaýap alý júrgizý jáne medısınalyq kómek kórsetý jumysyn tirkeý jýrnalyna, medısınalyq tekserý kartasyna jazylyp, jeke isine tigiledi. Medısınalyq tekserý kartasy osy Qaǵıdalarǵa 3-qosymshaǵa sáıkes nysan boıynsha ÝUI-da bolǵan kezeńdegi aýrýy, júrgizilgen medısınalyq tekserý jáne kórsetilgen medısınalyq kómek nátıjeleri týraly málimetterdi qamtıdy.
25. Medısına qyzmetkeriniń qorytyndysy boıynsha: aýrýy jiti satydaǵy naýqastar, juqpaly aýrýlarmen aýyratyndar, pedıkýlez, qyshyma juqtyryp alǵan, belgilengen emdeý kýrsynan ótpegender, sondaı-aq tasymaldaýǵa kelmeıtin naýqastar aıdaýyldaýǵa jatpaıdy.
26. Qylmys jasaǵany úshin kúdikti jáne aıyptalýshy júrý baǵytynda syrqattanǵan jaǵdaıda aıdaýyl syrqattanǵan adamdy jaqyn jerdegi memlekettik densaýlyq saqtaýdy basqarýdyń jergilikti organynyń medısınalyq uıymyna jetkizedi jáne tıisti ishki ister organynyń kúzetine tapsyrady.
27. Medısına uıymy medısına qyzmetkerleriniń jáne shuǵyl medısınalyq kómek brıgadalarynyń qaýipsizdigin saqtaý maqsatynda arnaıy mekemelerdiń ákimshiligi olardyń naýqastarǵa barýyn arnaıy mekeme boıynsha kezekshiniń, al ol bolmaǵan jaǵdaıda - ishki ister organy boıynsha kezekshiniń (kezekshi kómekshisiniń) medısınalyq kómekke muqtaj adamdy kamerada nemese basqa bir bos úı-jaıǵa oqshaýlap, medısına qyzmetkerleriniń naýqasqa kelýi kezinde erip júrýin uıymdastyrady.
28. Medısına qyzmetkerleri taǵaıyndaıtyn dári-dármekter medısınalyq kabınette saqtalady jáne olardy naýqastar medısına qyzmetkeriniń nemese kezekshi qyzmetkerdiń qatysýmen qabyldaıdy.
29. Ustalatyn adam aýyr naýqastanǵan nemese qaıtys bolǵan jaǵdaıda arnaıy mekemeniń ákimshiligi bul týraly dereý týystaryna jáne qadaǵalaýshy prokýrorǵa habarlaıdy.
30. Arnaıy mekemeniń medısına qyzmetkerin medısınalyq-sanıtarııalyq qamtamasyz etýmen baılanysty emes jumystardy oryndaýǵa tartýǵa jol berilmeıdi.
3. Arnaıy jáne túzeý mekemelerine ornalastyrylǵan, sot úkimi boıynsha bas bostandyǵynan aıyrý oryndarynda jazasyn ótep jatqan adamdarǵa medısınalyq kómek kórsetý tártibi
31. Túzeý mekemelerinde (budan ári - TM), arnaıy mekemelerde (tergeý ızolıatorlarynda (budan ári - TI) ustalatyn adamdarǵa, onyń ishinde shetel jáne azamattyǵy joq adamdarǵa medısınalyq kómek Qazaqstan Respýblıkasynyń azamattaryna tegin medısınalyq kómek kórsetýdiń kepildendirilgen kóleminde kózdelgen kólemde jáne medısınalyq kómek túrleri boıynsha alynǵan lısenzııaǵa sáıkes kórsetiledi.
Tegin medısınalyq kómektiń kepildendirilgen kólemin kórsetý úshin dárilik zattarmen qamtamasyz etý emdeý-profılaktıkalyq mekemesiniń bastyǵy bekitken jáne aýmaqtyq qylmystyq – atqarý júıesi organynyń medısınalyq qyzmetimen kelisilgen dári-dármektik formýlıarǵa sáıkes júzege asyrylady.
Dári-dármektik formýlıar kezeńdik qaıta qaraýǵa jáne jylyna keminde 1 ret jańartýǵa jatady.
Shuǵyl, stasıonarlyq jáne stasıonardy almastyrýshy kómek kórsetý úshin tegin medısınalyq kómektiń kepildendirilgen kólemi sheńberinde túsken dárilik zattar mekeme ataýyn, onyń mekenjaıyn jáne «Tegin» belgisin kórsetý arqyly mekemeniń arnaıy mórtańbasymen belgilenedi.
32. Qazaqstan Respýblıkasy Qylmystyq-atqarý kodeksiniń 115-babynyń 4–tarmaǵyna sáıkes sottalǵandar qalaýy boıynsha usynylatyn emdeý-profılaktıkalyq jáne basqa qosymsha qyzmetti tóleıdi.
Sottalǵandarǵa kepildendirilgen tegin medısınalyq kólem sheńberinen tys qosymsha medısınalyq qyzmet QAJ emdeý-profılaktıkalyq mekemeleri nemese memlekettik densaýlyq saqtaýdy basqarýdyń jergilikti organdarynyń medısınalyq uıymdary jaǵdaıynda sottalǵandardyń qarjysy esebinen kórsetiledi.
33. Sottalǵandardy medısınalyq qamtamasyz etýdi emdeý-profılaktıkalyq mekemeleri (budan ári - EPM): aýrýhanalar, mamandandyrylǵan aýrýhanalar (psıhıatrııalyq, týberkýlezge qarsy), medısınalyq bólimder (medısınalyq pýnktter) júzege asyrady. Ana men balany qorǵaýmen baılanysty jumysty júzege asyrý úshin Balalar úıi uıymdastyrylady.
Maskúnemdikpen, nashaqorlyqpen jáne ýytqumarlyqpen aýyratyn sottalǵandardy májbúrlep emdeýdi TM-niń medısınalyq bólimi júzege asyrady.
34. Qaýipsizdigi barynsha tómen mekemelerde jazasyn óteýge bas bostandyǵynan aıyrylǵan adamdarǵa Qazaqstan Respýblıkasynyń basqa azamattarymen teń jaǵdaıda, jazasyn ótep júrgen jerine jaqyn ornalasqan memlekettik densaýlyq saqtaýdy basqarýdyń jergilikti organynyń medısınalyq uıymdarynda mamandandyrylǵan medısınalyq kómek kórsetiledi.
Arnaıy stasıonarlyq kómek kórsetýdi qajet etetin jaǵdaılarda TM, TI-da ustalatyn naýqastar memlekettik densaýlyq saqtaýdy basqarýdyń jergilikti organynyń medısınalyq uıymdaryna jiberiledi, ol úshin jınamaly kúzet quraldarymen jabdyqtalǵan oqshaýlanǵan palatalar bólinedi.
35. Kodekstiń 180-babynyń 9-tarmaǵyna sáıkes TM-da jáne arnaıy mekemelerde medısınalyq tehnologııalarǵa, farmakologııalyq jáne dárilik zattarǵa klınıkalyq zertteýler júrgizilmeıdi.
4. Alǵashqy medısınalyq-sanıtarııalyq jáne konsýltatıvtik-dıagnostıkalyq kómek
36. TI-ge kelgennen keıin barlyq kelip túsýshilerge (onyń ishinde tranzıtpen kelgenderge) medısınalyq kómekke muqtaj, aınalasyndaǵylar men naýqastar úshin epıdemııalyq qaýip tóndiretin adamdardy anyqtaý maqsatynda, alǵashqy medısınalyq tekserý júrgiziledi.
Bul rette teri, venerologııalyq, juqpaly jáne basqa da aýrýlardyń syrtqy belgilerine, pedıkýlezben zaqymdalýyna erekshe nazar aýdarylady. Bul jumys mindetti túrde jańadan kelgenderdi jalpy úı-jaılarǵa jibergenge deıin júrgiziledi.
Tekserýdi mekeme bóliminiń dárigeri nemese feldsheri arnaıy jabdyqtalǵan medısınalyq jınaqtyq kabınetinde júrgizedi. Bólme tonometrmen, fonendoskoppen, termometrmen, boı ólshegishpen, tarazymen, reflektormen, aýyz qýysyn qaraıtyn qalaqshamen qamtamasyz etiledi.
TI-da árbir ustalýshyǵa ambýlatorlyq naýqastyń medısınalyq kartasy toltyrylady.
37. TI-dan ketetin barlyq adamdarǵa (onyń ishinde tranzıttikterge) (dárigerlik nemese feldsherlik) medısınalyq tekserý júrgiziledi. Tasymaldaýǵa aýrýdyń jiti satysyndaǵy naýqastar, qyshymamen, bekitilgen emdeý kýrsyn ótpegen, pedıkýlezben aýyratyn, venerologııalyq jáne juqpaly naýqastar (týberkýlezden basqa) jiberilmeıdi.
Tekserý aıaqtalǵan soń árbir ketýshige ambýlatorlyq pasıenttiń medısınalyq kartasyna densaýlyq jaǵdaıy, ony júrý múmkindigi týraly belgisi bar qorytyndy beriledi.
Tekserýdi júrgizgen medısına qyzmetkeri qorytyndynyń sońyna óziniń aty-jónin kórsete otyryp, qolyn qoıady.
38. Juqpaly aýrýlarmen nemese olarǵa kúdiktengen adamdar tez arada tekserýden ótkennen keıin deni saý adamdardan oqshaýlanady. Osy adamdardy alǵashqy sanıtarlyq óńdeý kıimderi men jeke zattaryn mindetti túrde zalalsyzdandyrý arqyly sońynda júzege asyrylady, sodan keıin olar arnaıy bólingen kameralarǵa jiberiledi, ol jerde dıagnostıkalyq maqsatta tıisti tekserý, qajet bolǵan jaǵdaıda emdeý júrgiziledi.
39. Medısınalyq bólimderdiń shtattarynda dáriger-mamandar bar bolǵan jaǵdaıda, medısınalyq bólim basshysynyń sheshimi boıynsha olar barlyq kelgenderge tekserý júrgizýge tartylady.
40. TM-ge kelgen sottalǵandar 15 táýlikke deıingi merzimge karantındik bólimshege ornalastyrylady. Barlyq kelgen adamdar osy Qaǵıdalarǵa 4-qosymshaǵa sáıkes etapty qabyldaý jýrnalynda tirkeledi.
TM-ge kelgen birinshi eki aptada sottalǵandar bar aýrýlaryn anyqtaýǵa, denesiniń jaı-kúıin baǵalaý, eńbekke jaramdylyq qabiletin joǵaltý deńgeıin anyqtaý maqsatynda dárigerlik tekseristen ótedi. Karantınde bolǵan barlyq sottalǵandar mindetti túrde flıýorografııalyq tekserýden, qanyn RW jáne AITV zertteýden ótedi.
41. Karantın merzimi kezinde sottalǵandar oqshaýlanǵan bólmelerde ustalady. Olardyń ishinde juqpaly aýrýlarmen aýyratyn naýqas bolsa, karantın merzimi sońǵy juqpaly aýrýdy oqshaýlaǵan sátten bastap esepteledi.
42. Naýqasqa medısınalyq tekserýdi júrgizý kezinde dáriger shaǵymdaryn anyqtaıdy, aýrý men ómirdiń anamnezin, buryn bolǵan aýrýlardy, jaraqattardy, otalardy zerdeleıdi, dene zaqymdaryn anyqtaý maqsatynda tekserýdiń jalpy qabyldanǵan ádisterin, onyń ishinde aýskýltasııany, perkýssııany, palpasııany paıdalana otyryp, jan-jaqty obektıvti tekseredi, kórsetýler bar bolǵan jaǵdaıda, zertteýdiń qosymsha ádisterin taǵaıyndaıdy.
43. Sottalǵandardyń densaýlyq jaǵdaıyn odan ári medısınalyq baqylaý osy Qaǵıdalarǵa 5, 6, 7-qosymshalarǵa sáıkes nysan boıynsha profılaktıkalyq medısınalyq tekseris barysynda, medısınalyq bólimge ambýlatorlyq qaralý, sozylmaly aýrýlary bar adamdardy dıspanserlik qadaǵalaý kezinde júzege asyrylady.
44. TM-de ustalatyn adamdardy tártiptik ızolıatorǵa, jeke kameraǵa ornalastyrmas buryn ony joǵaryda atalǵan úı-jaılarda ustaý múmkindigin anyqtaý maqsatynda medısınalyq tekserý júrgiziledi. Ony densaýlyq jaǵdaıy boıynsha qamaýǵa alý múmkindiginiń bar-joǵy týraly dárigerdiń (feldsherdiń) jazbasha qorytyndysy osy Qaǵıdalarǵa 8-qosymshaǵa sáıkes nysan boıynsha resimdeledi. TM-de ustalatyn adamdardy tekserýdi júrgizý múmkin bolmaǵan jaǵdaıda, sondaı-aq eger onda qaýipti aýrýdyń, ýlanýdyń, jaraqattanýdyń kórinetin belgileri bolmasa, ol qamaýǵa alynǵan sátten bastap bir táýlik ishinde mindetti túrde medısınalyq tekserý júrgize otyryp tártiptik ızolıatorǵa, jeke kameraǵa ornalastyrylady.
45. TM-nen shyqqan kezde (aýysý, bosatylý, emdeýge jiberý, jazasyn óteýdiń negizgi ornyna ketý jáne ózgeler) sottalǵandar mindetti medısınalyq tekserýden ótedi.
46. Medısınalyq bólimderde sottalǵandardy ambýlatorlyq qabyldaýǵa arnalǵan ýaqyt TM, TI kún tártibimen belgilenedi.
47. Medısınalyq bólimde ambýlatorlyq qabyldaý ambýlatorlyq naýqastardy qabyldaý kestesine sáıkes TM, TI buıryǵymen belgilengen ýaqytta ótkiziledi. TM-de árbir jasaq, aýysym nemese birneshe jasaq úshin ambýlatorlyq qabyldaý ýaqyty bólinedi. TI men tolyq jáne tótenshe qaýipsiz TM-de ambýlatorlyq qabyldaý feldsher júrgizgen aldyn ala jazylý boıynsha rejımdik korpýstardaǵy arnaıy jabdyqtalǵan úı-jaılarda dárigerler (feldsherler) (erekshe jaǵdaılarda - korpýs boıynsha baqylaýshy) júrgizedi.
TI-de, tótenshe jáne tolyq qaýipsiz TM-de naýqastar dárigerge (feldsherge) qabyldaýyna nemese em-shara júrgizýge kamera boıynsha jeke nemese 3-5 adamnan turatyn toppen shyǵarylady.
48. TM-niń árbir jasaǵynda osy Qaǵıdalarǵa 9-qosymshaǵa sáıkes nysan boıynsha dárigerge qabyldaýǵa jazylý jýrnaly bolady, ony jasaq bastyǵy júrgizedi. TI-da jýrnaldy korpýs feldsheri júrgizedi. Ambýlatorlyq qabyldaýǵa deıin aldyn ala jazylý jýrnaly medısına bólimine beriledi. Qabyldaǵan soń jýrnal kórsetilgen adamdarǵa qaıtarylady.
Jýrnalǵa jazbaı qabyldaý tek shuǵyl jaǵdaılarda ǵana júrgiziledi.
49. TI-de, tótenshe jáne tolyq qaýipsiz TM-de feldsher korpýs boıynsha baqylaýshymen birlesip, TI, TM ustalatyn adamadardy serýendeýge nemese sanıtarlyq óńdeýge shyǵarǵan ýaqytta kameralardy aralaý arqyly olardyń sanıtarlyq jaı-kúıin kún saıyn tekseredi.
Shuǵyl medısınalyq kómek kórsetý úshin kómekke muqtaj adam korpýstyq ambýlatorııaǵa shyǵarylady. Feldsher oǵan belgilengen kólemde tıisti taǵaıyndaýlar jasaıdy nemese naýqastardy dárigerdiń qabyldaýyna jazady.
50. Tártiptik ızolıatorda, sondaı-aq TI, tótenshe jáne tolyq qaýipsiz TM-niń jeke kameralarynda ustalatyn adamdarǵa medısınalyq kómekti medısına qyzmetkerleri osy úı-jaılardyń sanıtarlyq jaı-kúıin kúndelikti tekserý kezinde sol jerde kórsetedi, olardyń nátıjeleri osy Qaǵıdalarǵa 10-qosymshaǵa sáıkes medısınalyq kómek jýrnalyna tirkeledi. Kórsetilgen úı-jaılarda ustalatyn adamdardyń densaýlyq jaǵdaıy nasharlaǵany baıqalsa, medısına qyzmetkeri osyndaı naýqastardy jedel túrde medısınalyq bólimge aýystyrý boıynsha sharalar qabyldaıdy.
51. Medısınalyq qyzmetker ambýlatorlyq qabyldaýǵa deıin osy Qaǵıdalarǵa 9-qosymshaǵa sáıkes nysan boıynsha dárigerge aldyn ala jazylý jýrnalyna jazylǵan ambýlatorlyq pasıenttiń medısınalyq kartasyn irikteıdi. Naýqastardyń shaǵymdaryn anyqtaý úshin qysqasha jaýap alady, anamnestıkalyq derekterdi jınaýdy, antropometrıkalyq ólsheýlerdi (boıy, denesiniń salmaǵy) júrgizedi jáne olardy dárigerge jiberý kezegin aıqyndaıdy.
Irikteýdi ótkizgen kezde medısına qyzmetkeri dene qyzýynyń joǵarylaǵan, jalpy álsizdigi jáne sary aýrýmen, ish aımaǵyndaǵy ótkir aýrýlarmen aýyrǵan naýqasqa erekshe nazar aýdarady.
52. Dáriger naýqasty tekserip bolǵannan soń № 907 buıryqpen bekitilgen 025/e nysany boıynsha ambýlatorlyq pasıenttiń medısınalyq kartasyna qysqasha jáne túsinikti etip naýqastyń shaǵymdaryn, qabyldaý kúnin, dıagnozyn, obektıvtik qaraý derekterin, taǵaıyndaýlar jazady, jumystan bosatý qajettiligi týraly qorytyndy jasap, aty-jónin kórsete otyryp, qol qoıady.
53. Aýrýdyń dıagnozyn anyqtaý men saralaýdy jáne emdeý taktıkasyn ázirleýdiń qıyn jaǵdaılarynda naýqastar komıssııalyq túrde tekseriledi nemese dáriger-mamandardyń konsýltasııalaryna jiberiledi.
Konsýltasııa úshin EPM dáriger mamandary, sondaı-aq medısınalyq uıymdardyń dáriger mamandary jumyldyrylady.
54. Ambýlatorııalyq qabyldaýǵa aldyn ala jazylý jýrnalyna dáriger nemese feldsher dıagnozdy, jumystan nemese narıadtardan bosatý týraly qorytyndyny jazady nemese dárigerge qaıta kelý kúnin jazady
55. Jumystan jáne jasaqtan tolyq nemese ishinara bosatý týraly qorytyndyny dáriger beredi, al dáriger bolmaǵan jaǵdaıda feldsher úsh táýlikten aspaıtyn merzimge beredi. Bosatýdy uzartýdy dárigerlik-konsýltatıvtik komıssııa (budan ári - DKK) júzege asyrady. DKK qorytyndysy osy Qaǵıdalarǵa 11-qosymshaǵa sáıkes nysan boıynsha DKK-ni ótkizý jýrnalynda tirkeledi.
Ambýlatorııalyq bosatylǵan adamdardyń tizimin medısınalyq bólim TM basshysynyń kezekshi kómekshisine tapsyrady.
56. Ambýlatorlyq pasıenttiń medısınalyq kartasynda medısına qyzmetkerleriniń barlyq medısınalyq tekserýleri men taǵaıyndaýlary, is-áreketteri týraly olardyń ótý ornyna qaramastan (tártiptik ızolıator, jeke kamerada), jazbalar jazylady.
57. Ambýlatorlyq pasıenttiń medısınalyq kartasy, jumystan bosatý týraly anyqtamalar, taǵaıyndaýlar paraǵy, basqa da medısınalyq qujattar naýqastyń qolyna berilmeıdi. Alfavıttik tártippen nemese medısınalyq bólimniń bólimshelerinde, qulyppen jabylatyn bólmelerdegi shkaftarda saqtalady. Úı-jaılar mórlenedi. Naýqastyń medısınalyq ambýlatorlyq kartalarymen birge ambýlatorlyq naýqastardyń tirkeý jýrnaldary da saqtalady.
58. Dári-dármekter naýqastyń qolyna berilmeıdi, dárilik zattardy ishý medısınalyq qyzmetkerdiń qatysýymen júrgiziledi.
Erekshe jaǵdaılardy quramynda esirtki zattary joq, emdeýdi qajet etetin aýrýlar quraýy múmkin (bronhıaldyq astma, qant dıabeti, arterıaldyq qyzýynyń kóterilgen gıpertonıkalyq aýrýlary, júrek aýrýynyń kóterilýi jáne ıshemııalyq aýrý). Naýqasqa osy preparattardy bólý týraly máseleni medısınalyq bólimniń basshysy dárigerdiń taǵaıyndaýymen jeke tártippen sheshedi, TM, TI basshysy bekitetin arnaıy ruqsat resimdeledi jáne kezekshi bólimge tapsyrylady.
59. Ambýlatorlyq naýqastardyń emdeý sharalaryn kún ishinde belgilengen saǵatta medısınalyq bólim júrgizedi.
60. Naýqasty rentgenologııalyq, zerthanalyq jáne basqa zertteýlerge, maman qabyldaýyna, sondaı-aq medısınalyq bólimde oryndala almaıtyn rásimderge jibergen kezde ambýlatorlyq pasıenttiń medısınalyq kartasyn naýqasqa ilesip júretin adamǵa beriledi.
Ambýlatorlyq pasıenttiń medısınalyq kartasynda medısınalyq bólimde júrgizilgen tekseris málimetteri, boljamdaǵan dıagnozy jáne joldanǵan sebepteri kórsetiledi.
61. Sottalǵandarǵa júrgiziletin ambýlatorlyq em dıagnostıkalaý jáne emdeý hattamalaryna sáıkes bolady.
62. Uzaqtyǵy 14-15 kún ambýlatorlyq emdeýge aýrý sıpattamasy boıynsha dıagnostıkalaý men emdeýdiń (dıstrozııa, jaraqattar, abssesster jáne basqalar) kúrdeli ádisterin qajet etpeıtin naýqastar jatady. Hırýrgııalyq naýqastarǵa qatysty dıagnostıkalyq is-sharalardyń kólemi medısınalyq bólim jaǵdaılarynda zerthanalyq, rentgendik jáne zertteýdiń basqa da arnaıy ádisterin qamtamasyz etý múmkindigimen aıqyndalady.
63. TM jáne TI-da ustalatyn sottalǵandar konsýltasııalyq-dıagnostıkalyq kómek alý úshin negizgi jazasyn óteý orny boıynsha memlekettik densaýlyq saqtaýdy basqarýdyń jergilikti organynyń birinshilikti medısınalyq-sanıtarııalyq kómek uıymdaryna (budan ári – BMSK uıymdary) tirkeledi.
Kásibı mamandar bolmaǵan jaǵdaıda jáne shuǵyl kórsetkishter boıynsha BMSK tirkelgen sottalǵandar men tergeý-qamaýdaǵylarǵa medısınalyq kómek tegin medısınalyq kómek kórsetýdiń kepildendirilgen kólemi sheńberinde kórsetiledi.
64. BMSK uıymdaryna ýaqtyly tirkeý jáne tirkeýden shyǵarý úshin sottalǵannyń basqa oblystyń mekemesine aýysýdyń jáne basqa oblystyń mekemesine kelýdiń árbir jaǵdaıy týraly QAJ mekemeleri BMSK uıymdaryna aqparat joldaıdy.
65. Profılaktıkalyq medısınalyq tekserý jylyna bir ret ótkiziledi. Tótenshe nemese tolyq qaýipsiz túzeý mekemelerinde ustalatyn sottalǵandar (kamerada ustalǵan kezde) jáne tárbıe kolonııalarynda kámeletke tolmaǵandar jylyna eki ret tekserilýge jatady.
66. Profılaktıkalyq medısınalyq tekserýdi ótkizý kestesin TM, TI basshysy bekitedi. Kestege sáıkes medısınalyq bólim basshysy BMSK uıymdarynyń mamandaryn jumyldyrý arqyly EPM dárigerleriniń kúshterimen TM-de ustalatyn adamdardyń tekserýin uıymdastyrady.
Tekserýde terapevt, ftızıatr, psıhıatr, stomatolog (tis dárigeri) mindetti túrde qatysady.
67. TM, TI-de ustalatyn adamdardy medısınalyq bólimge kelýin jasaq bastyǵy (korpýs basshysy) qamtamasyz etedi.
68. Medısınalyq tekserýler kezinde: anamnestıkalyq derekterdi jınaý, antropometrıkalyq zertteýler (boıy, denesiniń salmaǵy), sıtologııalyq zertteý úshin áıelderden jaǵyndy alýmen gınekologııalyq tekserý, qyzdarda - tik ishek arqyly saýsaqtyq zertteý (kórsetkish boıynsha), estý qabiletiniń jáne kórý múshesiniń ótkirligin anyqtaý, qan taldaýy (erıtrosıttiń jyldamdyǵyn anyqtaý (budan ári - EJA), gemoglobınniń, leıkosıttiń, qant qanynyń kórsetkishteri, zár taldaýynyń jalpy zertteýleri, elektrokardıografııa (budan ári - EKG) (15 jastan bastap - 3 jylda 1 ret, 30 jastan bastap - jyl saıyn), flıýorografııa (rentgenografııa) ókpe qýysynyń organdary - jylyna 2 ret, áıelderge – sút bezderin palpatorlyq zertteýi, tik ishekti saýsaqpen zertteý, dáriger-terapevttiń, ftızıatrdyń, psıhıatrdyń, stomatologtyń (tis dárigerimen) tekserýi, basqa da mamandyqtardyń (kórsetýler boıynsha) dárigerleriniń tekserýi júrgiziledi.
Profılaktıkalyq tekserý nátıjeleri ambýlatorlyq pasıenttiń medısınalyq kartasyna engiziledi.
69. Medısınalyq qamtamasyz etý:
1) TM, TI-da ustalatyn adamdardyń mekemege túsken kezde, juqpaly, parazıttik jáne basqa da sozylmaly aýrýlardy anyqtaý maqsatynda medısınalyq qaraý;
2) juqpaly jáne parazıttik aýrýlardyń aldyn alý maqsatynda jumysqa jiberý kezinde alǵashqy jáne kezeńdi medısınalyq qaraý;
3) medısınalyq tekserýdi ótkizý: densaýlyq jaǵdaıyna dınamıkalyq qadaǵalaýdy qamtamasyz etý, aýrý belgilerin ýaqtyly anyqtaý úshin, juqpaly jáne parazıttik aýrýlardyń aldyn alý jáne taraýyna jol bermeý maqsatynda mekemeden keter kezde profılaktıkalyq, nysanaly tekserý;
4) osy Qaǵıdalarǵa 5,6, 7-qosymshalarǵa sáıkes nysan boıynsha nozologııalyq aýrýlary bar adamdarǵa dıspanserlik baqylaý júrgizý;
5) múgedekterdi jáne eńbekke jaramdylyǵy shektelgen adamdardy eńbekke durys paıdalaný boıynsha DKK usynystarynyń oryndalýyn, sondaı-aq sozylmaly naýqastardyń arasynda emdeý mekemeleriniń usynystaryna sáıkes is-sharalarynyń júrgizilýine júıelik tekserý júrgizý arqyly júzege asyrylady.
70. Sottalǵandardyń densaýlyǵyn saqtaý, tamaqtaný, sý júrgizý obektilerine medısınalyq bólimderge, bosaný bólimderine, Balalar úıine, aýrýhanalarǵa parazıtarlyq jáne juqpaly aýrýlardy joıý maqsatynda, jumysqa jiberilgen adamdar Qazaqstan Respýblıkasy Ulttyq ekonomıka mınıstriniń mindetin atqarýshysyń 2015 jylǵy 24 aqpandaǵy № 128 buıryǵymen (Normatıvtik quqyqtyq aktilerdi memlekettik tirkeý tiziliminde № 10634 bolyp tirkelgen) bekitilgen mindetti medısınalyq tekserýlerdi júrgizý erejesine sáıkes mindetti túrde mezgildi medısınalyq tekserýden ótedi.
71. TM, TI ákimshiligi mekemeniń basshylyǵy bekitken jospar-kestege sáıkes jumysshylardyń mindetti túrde kezeńdik medısınalyq tekserýden ýaqytyly ótýin qamtamasyz etedi.
Medısınalyq tekserýge jatatyn árbir jumyskerde jeke medısınalyq kitapsha (budan ári - medısınalyq kitapsha) toltyrylady.
Jumyskerlerdiń medısınalyq kitapshalary medısınalyq tekserýden ótkennen keıin TM, TI medısına bóliminde saqtalady.
Joldamany alǵan ýaqyttan bastap 10 jumys kún ishinde medısınalyq tekserýden ótpegen adamdar jumysqa jiberilmeıdi.
Sharýashylyq qyzmet kórsetý jumysyna jiberiletin adamdarmen synaq qabyldaı otyryp, sanıtarııalyq-tehnıkalyq mınımým boıynsha medısınalyq kitapshadaǵy jazbaǵa sáıkes arnaıy sabaqtar júrgiziledi.
Ashanaǵa ýaqytsha jumys isteýge bólingen adamdar (táýliktik jasaq), mindetti túrde dene tekserýinen ótedi jáne qural-jabdyqtar men múkámmaldyń, ashana jáne as úıiniń ydystaryn jýýǵa, tamaqty taratýǵa jáne daıyndaýdan basqa jumystardy oryndaýǵa jiberiledi.
Zııandy óndiriste jumys isteıtin sottalǵandar kezeńdik medısınalyq tekseristerden ótýge jatady.
72. Sıfılıske, ish súzegine serologııalyq zertteý júrgizý úshin qan qol saýsaǵynan alynady, kók tamyrdan qan alýǵa jol berilmeıdi. Gonoreıaǵa teksergen kezde, dáretshyǵaratyn kanaldan (erkekterden kórsetkishke sáıkes) jáne jatyr moınynan, qynaptyń art jaǵynan jáne tik ishekten alynǵan jáne metılen kók nemese brılıantty jasylmen jáne qajet bolǵan jaǵdaıda Grammen boıalǵan 2 jaǵyndy bakterıoskopııalyq ádispen tekseriledi.
5. Tárbıe kolonııalaryndaǵy emdeý-profılaktıkalyq kómek
73. TM-de bolǵan kezeńde barlyq kámeletke tolmaǵandar dıfterııa tasýshy jáne gelmınt tasýshyǵa tekseriledi. Bakterıologııalyq zertteýdiń nátıjeleri oń bolǵan jaǵdaıda bakterııa bólýshilerge qatysty emdeý-profılaktıkalyq, epıdemııaǵa qarsy jáne sanıtarlyq-profılaktıkalyq is-sharalardyń tolyq kesheni júrgiziledi. Gelmınt anyqta