ekonomıkasy keri sheginbegen álemdegi sanaýly elder qataryndaǵy Qazaqstan úshin basym baǵyt bolyp qala beretinin Dýbaı tórindegi shara taǵy bir aıǵaqtap berdi
Birikken Arab Ámirlikterinen qýanyshty habar muhıt órleı, teńiz kókteı ótip, qustaı ushyp jetti. Qyzyljar óńirine! Súıinshilegen – oblystyq aýyl sharýashylyǵy basqarmasy basshysynyń orynbasary Altynbek Abdollaev. Atyna zaty saı baýyrymyz dúnıeniń tórt buryshyna jaqsy tanys elimizdiń taǵy bir bıik shyńdy baǵyndyrǵanyn bóliskenshe asyqqan syńaıly. Aldynda oblys ákiminiń birinshi orynbasary Aıdarbek Saparov bastaǵan top Qazaqstan delegasııasynyń quramynda BAÁ-ge saparlap ketkenin estigenbiz. Asyqpaıyq, aptyqpaıyq, oljaly oralǵan soń emen-jarqyn suhbattasarmyz degenbiz. Samal jeldeı terbetip, jan-dúnıemizdi jadyratqan jańalyq qolymyzǵa eriksiz qalam aldyrtty. Olaı bolsa, áńgimeni basynan sabaqtaıyq.
Elbasy N. Nazarbaevtyń Úkimettiń sońǵy keńeıtilgen otyrysynda «tıisti memorandýmdar bekite otyryp, qazaqstandyq qamtý jónindegi forýmdar ótkizý tájirıbesin qaıta jańǵyrtý kerek. Barlyq saýda jelilerinde otandyq taýarlar seksııasy paıda bolý úshin «Qazaqstanda jasalǵan» aksııasyn bastaımyz. Oblys ákimderi muny qadaǵalap otyrýy kerek. Barsha azamattarǵa osy kúrdeli jaǵdaıda patrıot bolyp, qazaqstandyq ónimdi satyp alý jóninde sóz arnaımyz», degeni bárimizdiń esimizde. Baǵaly bastama el aýqymynda qoldaý taýyp, búginde jer-jerlerde qyzý jalǵasyp keledi.
Endi, mine, BAÁ-degi Qazaqstan Respýblıkasynyń elshiligi Prezıdenttiń qazaqstandyq ónimdi nasıhattaý usynysyn júzege asyrý sheńberinde «Qazaqstanda jasalǵan» aksııasyn ótkizýge Dýbaıdy tańdap alýyna tańdana qarasaq ta, tanystyrylym arabtar tarapynan zor qyzyǵýshylyq týdyrǵanyn estip, «Bárekeldi! Qazanymyz ortaımaǵaı, yrysqa tola bergeı!» dedik ishimizden. О́rkenıettiń óreli órine órshelene umtylyp, ózindik órnek izin salǵan arab álemin tańǵaldyrý ońaı emes, árıne. Bolady eken! Qazaqstandyqtardyń bul jeńisi, shyn talaptansa, yntalansa, alǵa úlken maqsat qoısa, mańdaıdan ter shyǵarsa, alynbaıtyn qamaldyń, aspaıtyn asýdyń joqtyǵyna kózimizdi nyq jetkizdi.
BAÁ-degi iri azyq-túlik jelileriniń biri «LuLu» gıpermaketinde tamaq ónerkásibindegi Qazaqstannyń ulttyq jetistikterin kórsetý, otandyq taýar óndirýshiler men ámirlik rıteılerler arasynda ekonomıkalyq, saýda-sattyq áriptestik qarym-qatynasty ornatýdy kózdeý maqsatynda uıymdastyrylǵan sharaǵa qatysqan jetekshi kompanııalar arasynda qyzyljarlyqtar úlesiniń basym bolǵanyn eskersek, ekspozısııanyń iri aýmaǵyn ıelenýi zańdy der edik. Tamaq ónerkásibi salasynda syrtqy naryqqa shyǵyp júrgen «Sultan», «Sút», «Mýkomol», «Drýjba», «Perspektıva» sekildi seriktestikterdiń makaron, ún, bal ónimderine suranys mol bolǵan. Eń bastysy, sapalylyǵymen, básekelestiligimen, baǵanyń qoljetimdiligimen erekshelengen.
– Roýd-shoýdyń saltanatty ashylý rásimin Qazaqstannyń BAÁ-degi Tótenshe jáne ókiletti elshisi Qaırat Lama Shárip, Soltústik Qazaqstan oblysynyń delegasııa jetekshisi Aıdarbek Saparov, Shardjas ámirliginiń Saýda-ónerkásip palatasynyń ókili Djasım Isa Ál Mýtava júrgizdi. Qazaqtyń «shashý» saltyn Dýbaı turǵyndary úlken yntyzarlyqpen tamashalady. Kásipkerlerge Qyzyljardyń uny men makaronynyń qatty unaǵany sonshalyk, qalaı alýǵa bolatynyn qaıta-qaıta surastyryp jatty. Sýpermarketke kelýshiler baǵanyń ádeqalaı tómendigine bastaryn shaıqap, tańqalystaryn jasyrmady,–dedi sóziniń sońynda Altynbek.
Jaqsylyq habardyń izin sýytpastan aýyl sharýashylyǵy basqarmasy basshysynyń birinshi orynbasary Janar Musaǵulovapen habarlasqanymyzda óz oıyn «qazaqstandyq delegasııa men iri gıpermarketter jelisi basshylary arasynda otandyq ónimderdi BAÁ jáne Taıaý Shyǵystyń basqa da elderine ótkizý jóninde kelisim jasalǵanyn estip, qatty qýanyp jatyrmyz. Jergilikti azyq-túlik óndirýshilerdiń ámirliktiń iri rıteılerlerimen tikeleı baılanys ornatýy naryq kókjıegin keńeıte túseri sózsiz. Munyń ózi ustanǵan ekonomıkalyq saıasatymyzdyń durystyǵyn dáleldeıdi», degen sózdermen túıindedi.
BAÁ-degi «LuLu» iri azyq-túlik jelileriniń alǵashqy saýda orny 1996 jyly Ábý-Dabıde ashylǵan. Al, Dýbaıda alǵashqy sýpermarket 2000 jyly paıda bolǵan. Búginde onyń júıeleri Kýveıt, Bahreın, Oman, Katar, Mysyr, Saýd Arabııasy elderinde ornalasyp, uzyn-sany 114-ti quraıdy.
О́mir ESQALI,
«Egemen Qazaqstan».
Soltústik Qazaqstan oblysy.