ASTANA. 5 shilde. Chılıde fýtboldan Amerıka Kýbogy dodasy aıaqtaldy. Úsh aptaǵa sozylǵan baıraqty básekede Chılı quramasy qurlyq chempıony atandy. Ol fınalda Argentınamen kezdesip, oıyn sońyndaǵy penaltı arqyly jeńiske jetti. Bul týraly championat.com habarlady.
Sheshýshi kezdesý asa tartysty boldy. Qos tarap ta jeńis úshin aıanyp qalmady. Degenmen, chılılikterdiń óz elinde ótken dodada top jarýy úshin sońǵy sátke deıin tabandylyq tanytqanyn erekshe aıtyp ótken jón. Ásirese, Aleksıs Sanches, Artýro Vıdal syndy Eýropada jasyndaı jarqyldap júrgen fýtbolshylardyń oıyn órnegi kópshilikti tánti etti.
Matchtyń negizgi jáne qosymsha ýaqytynda esep ashylmady. Nátıjesinde Ońtústik Amerıka qurlyǵynyń chempıony penaltı arqyly anyqtaldy. Argentına sapynan Lıonel Messı ǵana óz múmkindigin múlt jibermedi. Al Gonsalo Igýaın men Ever Baneganyń soqqylary qaqpaǵa darymady. Esesine, Chılı oıynshylary ózderine berilgen múmkindiktiń barlyǵyn tıimdi paıdalandy. Soǵan sáıkes penaltı serııasy boıynsha Chılıdiń paıdasyna 4:1 esebi tirkeldi.
Jalpy,týrnır barysynda Argentınanyń qarsylastaryna qaraǵanda mysy basym bolǵan edi. Alaıda, fınaldaǵy Chılıdiń jeńisine laıyqty baǵasyn berýimiz kerek. Ol úshin oıynnyń statıstıkalyq kórsetkishterine kóz júgirtsek jetip jatyr. Fınalda Chılı quramasy dopqa ıelik etý kórsetkishi boıynsha 57% – 43% nátıjesimen basym boldy. Qaqpaǵa jasalǵan soqqy jóninen de alań ıeleriniń paıdasyna 18 – 8 deregi tirkeldi.
Bul Chılı úshin qurlyq chempıonatyndaǵy besinshi fınal. Osyǵan deıingi tórteýinde qarsylastaryna jol berip kelgen qurama óz elinde ótken dop dodasynda tarıhynda tuńǵysh ret top jardy.
Osy jeńispen birge Chılı 2017 jyly Reseıde ótetin fýtboldan Konfederasııa Kýbogy týrnırine joldama aldy.
Chılıdegi dodada úshinshi oryn Perý quramasyna buıyrǵanyn aıta keteıik. Qola júlde úshin oıynda atalǵan el Paragvaıdy 2:0 esebimen jeńdi.
Elaman Qońyr.
Derek, sýret: championat.com.