«Túbi bir túrkimiz» festıvali ótti

Almatydaǵy Qyzdar ýnıversıtetinde juma kúni aıaqtalǵan «II Halyqaralyq túrki álemi zertteýleri» sımpozıýmy aıasynda dúbirletken «Túbi bir túrkimiz» festıvali bolyp ótti.

Osymen segizinshi ret ótkizilip otyrǵan dástúrli festıval Qyzdar ýnıversıteti stýdentteri men oqytýshylarynan quralǵan ult-aspaptar orkestriniń oryn­daýyndaǵy «Shattyq otany» kúıi­men jáne myńdaǵan shaqyrym jer basyp kelgen Túrik eli óner­pazdarynyń konserttik baǵdar­lamasymen ashyldy.

«Tanysaıyq siz ben biz», «Ata saltym – asyl qazynam» atty eki bólimnen turatyn festıvaldiń birinshi bóliminde túrik, qyrǵyz, ózbek, bashqurt, ázerbaıjan syndy túrki halyqtarynyń ulttyq án, bıleri oryndalsa, ekinshi bólimde túrki álemindegi ár jurt­tyń ádet-ǵurpy, salt-dástúri kórsetildi. Qazaq handyǵynyń 550 jyl­dyǵy men Qazaqstan halqy Assam­bleıasynyń 20 jyldyǵyna oraı ótkizilgen festıvaldiń basty qun­dylyqtarynyń biri – túrli ult ókilderin somdaǵan stýdent jastardyń sol halyqtyń tilinde erkin sóıleýi men ulttyq bılerin tamasha kórsete bilgendigi, tamyry ortaq, dińi bir, rýhy asqaq, dili bir tutas jurttyń jańǵyryp jetken jaqsylyqtary men jetistikterin baýyrlas halyqtardyń tili men tarıhyn, mádenıetin bilýge degen asqan qumarlyǵy boldy dese bolady. Qyzdar ýnıversıtetiniń stý­dentteri oqý ornynda aǵyl­shyn tilimen qatar, koreı, qy­taı, fransýz, parsy, arab, túrki til­­derin oqıdy. Bir sózben aıt­qan­da, fılolog qyzdarymyz óz ma­mandyqtarynyń qyr-syrymen qatar, túbi bir túrki jurtynyń barlyq tilderin bilip shyǵady. Eldigimiz ben erligimizdi, keshegi tirligimiz ben búgingi birligimizdi aıdaı álemge áıgilegen, ádemi ádeptiń, ómirsheń ónegeniń úl­gisin kórsetken festıval so­ńyn­da úzdik óner kórsetkender bilim ordasynyń jáne Túrki halyq­tarynyń mádenı qorynyń arnaıy baǵaly syılyqtarymen, maqtaý qaǵazdarymen marapattaldy. Eske sala keteıik, úsh kúnge sozylǵan sımpozıým jumysyna TMD elderi men Túrkııa, AQSh, Qy­taı, Koreıa, Nıderland, Serbııa syndy álemniń 20-ǵa jýyq mem­leketi men Qazaqstannyń bar­lyq aı­maǵynan 500-den astam túrki­taný ǵylymymen aınalysatyn ǵalymdar qatysty.

Aınash ESALI, «Egemen Qazaqstan».

ALMATY.