M.Áýezov atyndaǵy Ádebıet jáne óner ınstıtýty ótkizgen qazaq folklorıstıkasy týraly halyqaralyq konferensııa akademık Seıit Qasqabasovtyń mereıtoıyna oraılastyryldy.
«Ǵylym ordasy» kishi májilis zalynyń bir qabyrǵasyn tutas alyp jatqan kitap kórmesi búginde halyq murasynyń shyraqshysy, babalar sóziniń bahadúri atanǵan asa iri folklorıst ǵalymnyń shyǵarmashylyǵyna arnalypty. Qyryq jyldyq eńbektiń qormal qordasyndaı. Akademıktiń barlyq derlik ǵylymı shyǵarmalary, ǵalym haqyndaǵy ómirbaıandyq derekkózderi. Onyń redaksııasymen shyqqan eńbekter. Seıit Asqarulynyń óz zamandastary týraly tolǵaǵan tolymdy týyndylary. Zeınolla Qabdolov, Rymǵalı Nurǵalıev, Aqseleý Seıdimbekov sekildi tulǵalarmen birge túsken jádiger sýretter. Osynyń bári ǵıbratty oılarǵa jeteleıtindeı.
Memlekettik syılyqtyń laýreaty, ataqty ǵalym týraly alǵashqy sózdi Ádebıet jáne óner ınstıtýtynyń dırektory, UǴA korrespondent-múshesi Ýálıhan Qalıjanov aıtty. Seıit Qasqabasovtyń daryndy ǵalymdyǵymen qosa ǵylymdaǵy qarymdy uıymdastyrýshylyǵy, qaıratkerligi, Alash arystaryn aqtaý kezindegi eresen eńbegi men aqjoltaı azamattyǵy elge málim. Folklortaný mektebiniń jańa baǵyttaǵy negizin qalaǵan adam. 100 tomdyq «Babalar sózi» serııasyn shyǵarý álemde balamasy joq erlik is dep baǵalandy. Osy jobaǵa jetekshilik etken Seıit Qasqabasov Elbasy bastaǵan «Mádenı mura» baǵdarlamasynyń tabysty iske asýyna úlken úles qosty. Munyń syrtynda «Qazaq ádebıeti tarıhynyń» 10 tomdyǵy, ádebı jádigerlerdiń 20 tomy, M.Áýezov shyǵarmalarynyń 50 tomdyq jınaǵy qaıratker ǵalym S.Qasqabasovtyń Ádebıet jáne óner ınstıtýtyn basqarǵan kezdegi ulaǵatynan habar bergendeı.
Konferensııada fılologııa ǵylymdarynyń doktory Kenjehan Matyjanov «Babalar sóziniń bahadúri», fılologııa ǵylymdarynyń doktory, professor Baqytjan Ázibaeva «Jańa kózqarasty ǵalym», fılologııa ǵylymdarynyń doktory Nurdáýlet Aqysh «S.Qasqabasov jáne táýelsizdik dáýir ádebıeti», fılologııa ǵylymdarynyń doktory Raıhan Erǵalıeva «Kýltýrologıcheskıe ıssledovanııa akademıka S.Kaskabasova» atty taqyryptarda tartymdy baıandamalar jasady.
Akademık Kópjasar Náribaev mereıtoı ıesine Ulttyq Ǵylym akademııasynyń Qurmet gramotasyn tabys etip, qarapaıymdylyǵyn, parasattylyǵyn tilge tıek etken jyly lebiz arnady. Sondaı-aq, folklortaný ǵylymynyń kóshin bastaýshy ǵulama ǵalymdy ál-Farabı atyndaǵy QazUÝ rektory, akademık Ǵalym Mutanov, Almaty qalasy ákiminiń atynan tilderdi damytý basqarmasynyń basshysy Mamaı Ahet, Qazaqstan Jazýshylar odaǵy basqarma tóraǵasynyń birinshi orynbasary, aqyn Ǵalym Jaılybaı, Memlekettik syılyqtyń laýreaty Sherıazdan Eleýkenov, R.Súleımenov atyndaǵy Shyǵystaný ınstıtýtynyń dırektory Ábsattar Derbisáli, aqyn Shómishbaı Sarıev jáne basqalar quttyqtap, folklor deıtin qııal patshalyǵy pyraǵynyń ıyǵyna shapan jaýyp qurmettedi.
Tústen keıin konferensııa jumysy «Folklortaný men ádebıettanýdyń ózekti máseleleri» hám «Mádenı mura jáne ónertaný» atty jeke seksııalarda jalǵasty.
Qorǵanbek AMANJOL,
«Egemen Qazaqstan».
Almaty.
Sýretti túsirgen
Iýrıı BEKKER.