«Qazatomónerkásip» ulttyq atom kompanııasy» AQ transformasııalaý baǵdarlamasyn saltanatty túrde bastady. Oǵan «Samuryq-Qazyna» UÁQ» AQ basqarma tóraǵasy О́mirzaq Shókeev pen ál-aýqat qorynyń bıznes tranformasııasy jónindegi bas dırektory Adams Ilkıavıchýs qatysty.
«Samuryq-Qazyna» jetekshisi Memleket basshysynyń tapsyrmasyna oraı elimizdegi birqatar ulttyq kompanııalar birer jyldyń kóleminde transformasııalaý baǵdarlamasyn júzege asyryp jatqanyna toqtalyp, bul baǵyttaǵy jumystardyń alǵashqy nátıjeleri kórine bastaǵanyn aıtty. Sóıtip, endigi transformasııalaý kezegi Qazatomónerkásipke kelgenin jetkizdi. Búgingi kúnniń mańyzdy taqyryby týraly baıandap, transformasııalaý isi bir-eki jyldyń ǵana jumysy emes, uzaq merzimdi qamtıtyn kúrdeli úderis ekenin uqtyrdy. «Bul keshendi shara birneshe jyldy kerek etetin, óte qyzyqty ári tereń úrdis. Bulaı deýimniń sebebi, kompanııa qyzmetkerleri men jumysshylary osy baǵdarlama negizinde kásiporynǵa degen kózqarastaryn birtindep ózgertip, ortaq istiń tıimdi bolýyna bári de qyzmet etýi tıis. Adamdardyń oı-sanasyn jańǵyrtatyn bul shara ulttyq kompanııanyń jyldam ilgerilep, álemdik áriptesterimen ıyq tirestirýine múmkindik týdyrady dep senemiz», dedi О́.Shókeev.
Elimizdiń ulttyq kompanııalary zaman talabyna saı transformasııalanbasa elimizdiń álemdegi ozyq elderdiń kóshine ilesýi qıyn bolatynyn aıtqan basqarma tóraǵasy, «Qazatomónerkásip» kompanııasyn transformasııalaý baǵdarlamasyn daıyndaýǵa kóp kúsh jumsalǵanyn jetkizdi. «Biz «Qazatomónerkásip» kompanııasynda bul úderisti der kezinde jáne durys iske qosý úshin kóp kúsh saldyq. Sóıtip, «Qazatomónerkásip» AQ transformasııalaý baǵdarlamasynyń uzaq merzimdi maqsattary men bastamalaryn anyqtap aldyq, onyń bári dırektorlar keńesi bekitken kompanııanyń jańa strategııasynda kórinis tapqan. Naqty aıtqanda, ol Qazatomónerkásiptiń jańa strategııasynda 2025 jylǵa qaraı kompanııanyń qunyn 3 esege ulǵaıtý sııaqty damýdyń sheshýshi maqsattary anyq belgilengenin, mundaı zor maqsattarǵa 1-2 jylda qol jetkizý múmkin emes ekendigi túsinikti. Transformasııa – uzaq merzimdi úderis. Sondyqtan, onyń nátıjesin biz 2018 jyldan bastap kórýdi josparlap otyrmyz», dedi ol.
«Qazatomónerkásip» AQ transformasııalaý baǵdarlamasynyń arqasynda álemdik naryqta ýran óndirisi boıynsha ǵana emes, sonymen qatar, ýran jetkizýde de kóshbasshy pozısııalarǵa kóshýdi kózdep otyr. Ol jóninde ulttyq atom kompanııasynyń basshysy Asqar Jumaǵalıev aıtty. «О́ndiristi ártaraptandyrý álemniń atom elektr stansalary úshin daıyn ónim satý arqyly kompanııanyń qosymsha tabys tabýyna múmkindikter ashady. Transformasııa aıasynda marketıng qyzmetin nyǵaıtýǵa da jete mán berilýi tıis. Atalmysh blokty kúsheıtýmen qatar xalyqaralyq iri ýran óndirýshi kompanııalar tárizdi biz de ónimderin saýdalaıtyn treıdıng kompanııasyn qurýdy josparlap otyrmyz. Sondaı-aq, ózgerister josparynda barlyq kúshti negizgi qyzmetke jumyldyrý maqsatynda kompanııanyń uıymdyq qurylymyn ózgertý jáne beıindi emes aktıvterdi shyǵarý da qarastyrylǵan. 2019 jylǵa qaraı negizgi qyzmetke qatysy joq qyzmetter kórsetetin 27 beıindi emes kásiporyn, atap aıtqanda, túrli xımııalyq óndiris oryndary men servıstik kompanııalar «Qazatomónerkásip» AQ quramynan shyǵarylady», dedi kompanııa basshysy.
Bularmen birge, A.Jumaǵalıev kompanııada qyzmetkerlerdiń biliktiligin arttyrý baǵdarlamasy kúsheıtiletinin de basa aıtty. Onyń sózine qaraǵanda, mamandardyń biliktiligin kóterý úshin olardy óz elimizben qatar, shetelderde de oqytyp alý maqsaty bar eken. Osyny jetkizgen kompanııa jetekshisi paıdaly qyzmet kórsetkishiniń oryndalýyna qaraı eńbekke aqy tóleýdiń úzdik júıesi engiziletinin, qyzmetkerlerdiń jeke ósýi men kóshbasshylyq sapasyn damytý úshin barlyq jaǵdaı jasalatynyn atap kórsetti.
Nurbaı ELMURATOV,
«Egemen Qazaqstan».