Májilis Spıkeri Qabıbolla Jaqypov QHR Búkilqytaılyq Halyqtyq-saıası konsýltatıvtik keńesi tóraǵasynyń orynbasary Van Chjenveımen kezdesti. Q.Jaqypov pen Van Chjenveı qos memleket basshylarynyń dostyq qarym-qatynasy arqasynda ekijaqty ózara is-qımyldyń qarqyndy damyp kele jatqanyn sóz etti, dep habarlady Májilistiń baspasóz qyzmeti.
Kezdesý ıeleriniń pikirinshe, Qazaqstan Prezıdentiniń «Nurly Jol» baǵdarlamasy men QHR Tóraǵasynyń «Bir beldeý – bir jol» bastamasy uzaq merzimdi ózara is-qımyldyń jarqyn bolashaǵynyń ortaq kórinisi. Van Chjenveı, sondaı-aq, Jibek jolynyń ekonomıkalyq beldeýin qurý týraly QHR Tóraǵasy bastamasyna bizdiń elimizdiń kórsetken qoldaýyn atap ótti.
Qabıbolla Jaqypov mártebeli meımanǵa Qazaqstan Prezıdentiniń 5 ınstıtýttyq reformasy men ony oryndaýdyń «100 naqty qadam» Ulttyq jospary týraly jáne osy mańyzdy bastamalardy zańnamalyq turǵydan qoldaý týraly baıandap berdi.
Júzdesý kezinde eki eldiń transshekaralyq sý resýrstary salasyndaǵy yntymaqtastyq máseleleri de nazardan tys qalmady. Qabıbolla Jaqypov ázirlenip jatqan sý bólý týraly úkimetaralyq kelisimniń eki eldiń múddesine qyzmet etetinine senim bildirdi. Májilis Tóraǵasy elimizdiń QHA jáne QHR Memlekettik ulttar isi jónindegi komıteti arasynda baılanys ornatýǵa degen qyzyǵýshylyǵyn da atap ótti.
Van Chjenveı Qytaı eliniń yntymaqtastyqty odan ári kúsheıtýge daıyn ekenin jetkizdi.
Sýret: http://munara.kz/