Búgin dańqty boksshymyz Gennadıı Golovkın óziniń kásipqoı rıngtegi 34-jekpe-jegin ótkizip, barsha qazaqstandyqtardyń kezekti jeksenbisin jeńispen bastap berdi. Atap aıtsaq, sańlaq sportshymyz kanadalyq Davıd Lemeni 8-raýndta tehnıkalyq nokaýtpen jeńip, orta salmaqta WBA (Super), IBO jáne WBC (Interim) nusqalary boıynsha chempıondyq ataǵyn qorǵap qana qoımaı, qarsylasyna tıesili bolǵan IBF tujyrymy boıynsha da chempıondyq beldikti ıemdendi. Bul jekpe-jek týraly tolyǵyraq myna silteme arqyly bile alasyzdar. Osy rette, biz boksshynyń balalyq shaǵy men jasóspirim kezi týraly baıandaýdy jón sanadyq.
Gennadıı Golovkın Qaraǵandynyń Maıqudyq aýdanynda týyp-ósti. Bolashaq chempıonnyń balalyq shaǵynda bul aýdan qylmystyń oshaǵy sanalatyn. Sol aýdanda birge ósken qurdastary onyń sondaı qıyn ahýalǵa qaramastan, óte salqynqandy, qarapaıym bolǵanyn aıtady. «Tipti sol kezdegi áleýmettik jaǵdaıǵa baılanysty bir kezderi osylaı álem nazaryn ózine aýdaratyn dańqty boksshy bolýdy armandaýdyń ózi múmkin emesteı kórinetin», – deıdi Genamen qatar synypta oqyp, bir shaǵyn aýdanda turǵan qurdasy Asqar Abdrahmetov.
Ol jóninde Asqar: «Bala kúnimde Genamen jaqyn dos boldym deı almaımyn. Degenmen, bir ortada jıi basqosatyn edik. Sondaı-aq, ekeýmizdiń boks úıirmesine qatar jazylǵanymyz esimde. Qaı jasta ekenimiz naqty esimde qalmapty, áıteýir sport seksııasyna birge keldik. Jattyǵý zalymyz Maıqudyqtaǵy birinshi «fazankada» ornalasqan. Tobymyzda birneshe bala boldyq. Jattyǵýdyń alǵashqy kúni-aq, Gena óziniń talant ıesi ekenin kórsete bildi. Olaı deıtinim, úıirmege kelgen kúni jattyqtyrýshy bárimizdi kezekpen rıngke shyǵaryp, shama-sharqymyzdy tekserip kórdi. Sol kezde jetekshimiz Golovkınniń qabileti men sheberligine tánti bolyp, onyń famılııasyn erekshe ataǵany esimde», – deıdi.
Gennadıı men Asqardyń balalyq jáne jasóspirim kezi Maıqudyqtyń 14-shaǵyn aýdanynda ótti. Ol kezde atalǵan aýdandaǵy jaǵdaıdyń qandaı bolǵanyn joǵaryda nazarǵa aldyq. Sodan da bolar, Golovkın bir sózinde bala kúninde ádildigin dáleldeý úshin jıi judyryq jumsaýǵa týra kelgenin aıtqan edi. О́zi bul jaǵdaıdy sol kezdegi qalypty ómir salty dep atady. Odan basqa da qyzyqty jaıttardy Asqar bylaı eske alady:
«Bala kúnimizde qazirgideı oıyn-saýyq ortalyqtary bolǵan joq. Biz úshin sol kezdegi eń qyzyqty saýyq túrleriniń biri tóbelesip oınaý edi. Sol úshin qalyń kıinip alatynbyz. Eski kúpáıkiler men tulyptardy kıip, bir-birimizge judyryq siltep, úırengen ádis-tásilderimizdi qoldanamyz. Munyń bári oıyn bolǵandyqtan, eshkim jaraqat almaıdy. Árıne, aýdanymyzda nashaqorlar men ishimdikke salynǵandar boldy. Alaıda, sportqa ańsary aýǵan bizder úshin onyń bári esh qyzyqsyz boldy. Keıde sóıtip oınap júrip shyndap tóbelesip qalamyz. Bul endi kez kelgen balalyq shaqtyń jazylmaǵan zańdylyǵy ǵoı» – degen Asqar, jalpylaı alǵanda, Maıqudyqtyń sonshalyqty adam shoshyrlyqtaı emestigin, onyń da sol kezdegi kóp aýdandardyń biri bolǵanyn tilge tıek etti.
Sonymen qatar, ol aty shyqqan aýdan týraly: «Maıqudyq – ádettegi aýdandardyń biri. Keremet mektebimiz bolatyn. Áıteýir biz turǵan 14-shaǵyn aýdanda barlyǵy jaqsy boldy. Ras, keıbir kórshi shaǵyn aýdandarda jantúrshigerlik jaıttar tirkelip jatty. Mysaly, aýyldyq jerlerden kelgenderdi pyshaqtap ketipti degenderdi estıtinbiz. Múmkin bizdi ondaı teris áreketterden sport qutqaryp qalǵan shyǵar. Sportty serik etkenimiz úshin jolymyz boldy dep sanaımyn. Sebebi, bizdiń balalyq shaǵymyz kóshede ótti. Shyny kerek, ol kezde úıde otyryp oınaý deıtin túsinik bolmady. Ýaqytymyzdyń kóbi dalada, balalardyń ortasynda ótetin. Bizdiń aýdanda ózimizden úlken balalar qatal boldy. Eger olar temeki shekkenimizdi kórse, sazaıymyzdy beretin. Sondyqtan kósheniń jazylmaǵan tártibine baǵynatynbyz. Men úshin sol tártiptiń biri sport bolǵandaı. О́ıtkeni, sol ortaǵa sińisý úshin úıirmege jazylǵandar az bolǵan joq», – dedi.
Gennadıı Golovkın Maıqudyqtaǵy eń úlken bilim ordasy – №65 mektepte oqydy. Búginde bul mektepte 1435 oqýshy qazaq jáne orys tilderinde bilim alýda. Boksshynyń mektep qabyrǵasyndaǵy sátteri týraly Asqar Abdrahmetov bylaı deıdi: «Mektebimiz óte úlken boldy. Ol jerde tártip óte qatal edi. Bilim alý úshin barlyq jaǵdaı jasalǵan jáne kez kelgen shara júıeli uıymdastyrylatyn. Birde kórshi aýdandaǵy mektep jabylyp, ol jaqtaǵy oqýshylardyń barlyǵyn bizge aýystyrdy. Sol kezde jańadan kelgen oqýshylarmen az-kem kıkiljińder bolǵany ras. Biraq ol qaqtyǵystar tez basylyp qaldy. Al Genaǵa keletin bolsaq, ol ekeýmiz qatar synypta oqydyq. Onyń synyp jetekshisi – Anna Borısovna Soı deıtin muǵalim. Ony biz ABS deıtinbiz. Anna Borısovna ózindik ereksheligi bar ustaz. Ol Genany árdaıym «bokser» dep shaqyratyn. Mektebimizge qatysty taǵy bir eskere ketetin jaıt, besinshini bitirgen soń ár synyp bilgili bir baǵytty tańdaıdy. Máselen, bizdiń synyp kommersııalyq baǵytta bilim alatyn bolsa, Genalar bıomedısınalyq salany tańdady. Soǵan sáıkes, tańdaǵan baǵyt boıynsha, tereńdetilgen baǵdarlama qoldanylady. Áıtse de, jasyratyny joq, ol kezde bul tańdaýdyń mańyzyn tolyq túsinbedik. Bar bolǵany kúndelikti sabaǵymyzǵa baryp, ádettegideı oqyp júrdik. Gena sportty serik etken kóp oqýshylar sııaqty ortasha oqydy. Esesine ol ózin sportta bıikterden kórsetip júrdi. Mysaly, Golovkın bokstan bólek, fýtbol men basketboldy óte sheber oınaıdy. Sóıtip júrip mektep bitirdik. Bárimiz sońǵy emtıhannan súrinbeı óttik. Eshqandaı bura tartý nemese baǵany kótermeleý bolǵan emes. Oǵan sol kezdegi júıe – emtıhandy aýyzsha jáne jazbasha tapsyrýdyń da áseri bolǵan shyǵar».
№65 mektep Maıqudyqtyń avtostansasynda ornalasqan. Stansa aýyl ortalyǵynan aıtarlyqtaı alys. Qaraǵandy avtobýstarynyń basym bóligi úshin bul stansa sońǵy aıaldama bolyp sanalady. Osydan-aq, mekteptiń tym shalǵaı ornalasqanyn bile berińiz. Al Gennadııdiń úıi mektepten taıaq tastam jerde boldy. Oqý ordasynda kireberis jaqta ornalasqan sport zaly kózińe birden túsedi.
«Árıne, Gennadıı Golovkınniń bizdiń mektepte oqyǵanyn bári biledi. Biz onymen maqtanamyz. Onyń qurmetine ashylǵan taqta da bar. Alaıda, ol mektep bitirgeli birtalaı ýaqyt ótti. Qazir Genaǵa sabaq birgen muǵalimderdiń barlyǵy zeınetkerlikke shyǵyp ketken. Synyp jetekshisi Anna Borısovna qalada turady, ol da qurmet demalysynda», – deıdi ustazdarynyń biri. Búginde mektepte Gennadııge sabaq bergen jalǵyz muǵalim qalǵan eken. Ol – ınformatıka pániniń muǵalimi Galına Petrovna.
«Men ol kezde jumysqa endi ǵana ornalasyp jatqan edim. Gennadıı Golovkın joǵarǵy synypta oqyp júrdi. Jarystarǵa qatysam dep, sabaqtan jıi qalady. Áıteýir jarystary bitpeıtin. Onyń eń erekshe qasıeti – eshqashan dórekilik kórsetpeıdi jáne úlkendi syılaı biledi. Qatarlastary da ony sol úshin qatty qurmetteýshi edi», – dep eske aldy muǵalimi.
«Sport alańynda Golovkın ózin sýdaǵy balyqtaı sezinedi. Ol kez kelgen jarysta barlyq ádisti qazirgideı óte sheber oryndaıtyn. Fýtbol oınaǵan kezde shabýyl shebinde júrip, óte kóp gol soqty. Mektepte keshkisin jattyǵý bolatyn. Árıne, Gena sportshy retinde fýtboldy jaqsy oınady. Ol árdaıym jeńgisi keletin. Keıde biz oılaǵandaı bolmasa, sabyrsyzdanyp ketedi. Bárimizdiń joǵary deńgeıde oınap, barymyzdy salǵanymyzdy qalaıdy. О́ıtkeni ózi sondaı. Áli esimde, birde mektepte basketboldan jarys ótti. Ekeýmiz bir komandada oınadyq. Men úshin ol birinshi oıyn edi. Sondyqtan qatty tolqydym. Onyń ústine, búkil mektep bizge qarap otyr. Sonyń saldarynan bolar, doppen eki qadam jasap qoıdym. Árıne, tóreshi birden ysqyryq shaldy. Sol sátte Genanyń maǵan aıqaılap bergeni bar. Sodan keıin ǵana óz-ózime kelip, táýir oıyn kórsete bastadym», – degen Asqar Abdrahmetov boksshymen bir komandada oınaǵan sátterin kúlip eske aldy.
Bala kezinde Gennadııdiń dene bitimi sonshalyqty shymyr boldy deýge kelmeıtin. Qajyr-qaırat pen tolassyz jattyǵýdyń arqasynda búgingideı «nokaýt patshasyna» aınaldy. Bul jóninde qurdasy: «Kerisinshe syńary Maksım balalyq shaǵynda boıy uzyn ári irileý boldy. Onyń dene bitimi myǵym, al Gena aryq ári boıy da qysqalaý edi. Biraq toǵyzynshy synyptan keıin ol tez ósip ketti. Maksım de sporttan alys emes. Ol fýtboldy jaqsy oınaıtyn. Aıryqsha atap ótetin jaıt, olar bala bolyp eshqashan bir-birimen tóbelesken emes. Tipti rıngtegi sparrıngten de bastaryn alyp qashatyn», – dedi.
«Gena sánqoı jigit. Bala kezimizde Maıqudyqta «Gornıak» deıtin bazar boldy. Sport kıimderin – shalbar, krossovkıdi sol jerden satyp alatynbyz. Mektepke oqýlyqtarymyzdy dorbaǵa salyp aparatynbyz. Birde Genanyń mektepke djınsy kombınezon kıip kelgeni esimde. Ol kez djınsy endi ǵana sánge aınala bastaǵan sát. Árıne, bárimiz oǵan qyzyǵa da qyzǵana qaradyq. Ol sol kezdiń ózinde-aq trendke aınalyp úlgerdi», – degen Asqar soǵan qaramastan, Gennadııdiń qarapaıymdylyǵy erekshe sezilip turatynyn nazarǵa aldy. «Tipti talaı sporttyq jetistikterge qol jetsizse de ol qazirgi minezinen tanǵan emes», – deıdi.
Áńgime barysynda Asqar sportshynyń taǵy bir qyryn ashyp berdi. «Gena gıtarada óte jaqsy oınaıdy. Bul aıtarlyqtaı tańsyq ta emes shyǵar. Sebebi, sol ýaqytta bizde bul aspapta oınaý jaqsy úrdiske aınaldy. Ár úıdiń aýlasynda top bolyp jınalyp alyp, gıtaramen án salatynbyz. Bári birkelki oınaıdy. Birli-ekili akkord ekiniń biriniń qolynan keletin. Sol kezder bizdiń saǵynyshpen eske alatyn altyn ýaqyttarymyz eken ǵoı. Aıtpaqshy, Genanyń nemis ovcharkasy da boldy. Onyń qarapaıymdylyǵy týraly kóp aıtýǵa bolady. Sonyń biri qansha jerden myqty bolsa da ol eshqashan birinshi bolyp kıkiljiń bastaǵan emes».
Sondaı-aq, Asqar búginde kópshiliktiń nazaryn eriksiz aýdaratyn Gennadıı Golovkınniń otanshyldyǵy týraly: «Genanyń Qazaqstanǵa degen osynshalyq patrıotızmi men mahabbaty jóninde jıi aıtylady. Onyń kindik qany Qaraǵandyda tamdy. Ol osy topyraqta tárbıelendi, ata-anasy da osy jerde týyp-ósti. Elge degen mahabbatynyń máńgilik bolýynyń sebebi sol. Men boksty tek Genanyń jekpe-jekteri úshin kóremin. Jerlesińniń jeńisin kórýdiń ózi keremet kóńil-kúı syılaıdy. Men oǵan tek jeńis tileımin! Aldaǵy ýaqytta ony budan da atyshýly jekpe-jekter men joǵary syıaqylar kútip turǵanyna senimim mol. Ol buǵan burynnan laıyq!», – dedi.
Qazir Maıqudyq múlde ózgergen. Bul aýdannyń jastaryn burynǵydaı qylmystyq oqıǵalardyń ortasynan emes, ter sińgen jattyǵý zaldarynan jıi kezdestiresiń. Barlyǵynyń úlgi tutatyny – ataqty jerlesteri. Bári de Genanyń jolymen júrýdi qalaıdy. Sebebi, Gennadıı Golovkın olarǵa kenshiler qalasy – Qaraǵandynyń shetindegi shaǵyn aýdannan álem astanasy – Nıý-Iorkke jetýdiń úlgisin kórsetip berdi.
Elaman Qońyr.
Sýret: vk.com, vesti.kz.