Bıyl Uly Jeńistiń 70 jyldyǵyna oraı Shyǵys Qazaqstanda kóptegen taǵylymdy jobalar júzege asyrylýda. Bul týraly basylymnyń birneshe sandarynda jáne gazet saıtynda jazǵan bolatynbyz.
Oblystyń qalalary men aýdandarynda joǵary deńgeıde uıymdastyrylǵan mereıtoılyq sharalar qaharmandyq kórsetip, qan maıdannan qaıtpaǵan bozdaqtar men el-jerin jaýdan qorǵap qalǵan has batyrlarymyzdy ardaqtaýǵa arnaldy. Aıta keter bolsaq, Kókpekti aýdanynyń Podgornoe aýylynda osy eldi mekende týyp-ósken úsh birdeı Keńes Odaǵynyń Batyryna jáne barsha maıdangerlerge arnalǵan memorıaldyq keshen boı kóterdi. Oblys ortalyǵyndaǵy Ertis pen Úlbi ózenderiniń túıisken tusynda qaıta jańǵyrtylǵan Dańq memorıalynda 7199 óskemendik Uly Otan soǵysynyń ardagerine arnalǵan 7199 shyraq jaǵyldy. Shyǵysqazaqstandyq maıdangerler Astanada ótken áskerı sherýge qatysty. Kóptegen ardagerlerge shıpajaılarǵa joldama berildi. Semeı qalasy men basqa da aýdandarda «Máńgilik polk» aksııasy uıymdastyrylyp, ardagerlerge arnalǵan spektaklder, kıno kórsetilimderi ótti. Osyndaı urpaqqa ulaǵat bolar sharalardyń biri – shyǵysqazaqstandyq ardagerlerge arnalǵan aqparattyq portaldyń ashylýy deýge bolady. Jaqynda A.Pýshkın atyndaǵy oblystyq kitaphanada atalǵan saıttyń saltanatty tusaýkeseri ótti. Endi ǵalamtor arqyly Uly Otan soǵysynyń ardagerleri, tyl eńbekkkerleri men konslager tutqyndary týraly, olardyń otty jyldarda bastan ótkergen qıyndyqtary men erlikke toly ómirleri jónindegi barlyq aqparattar atalǵan saıtqa ornalastyrylatyn bolady. Shyǵys óńirinde ashylǵan veteranvko.kz saıty óskeleń urpaqqa elektrondy formatta jaýynger jerlesteri jóninde mol maǵlumattar usynýymen erekshelenbek. – Bul jobany Uly Jeńistiń 70 jyldyq mereıtoıyna oraılastyryp jasadyq. Saıttyń túrli bólimderinde shyǵysqazaqstandyq ardagerler jóninde barlyq aqparatty taýyp, oqýǵa bolady. Sondaı-aq, beınesıýjetter, erlik dańqy týraly ardagerlerdiń ózi áńgimelegen beıne jáne aýdıomaterıaldar, olardan alynǵan suhbattardy taba alasyzdar. Búgingi tańda bizdiń óńirimizde kózi tiri úsh Keńes Odaǵynyń Batyry turady. Shetelderde turatyndary da bar. Osy batyrlar týraly aqparatty da ornalastyrýǵa jáne suhbat alyp, saıtqa salýǵa tyrysatyn bolamyz. Sonymen birge, saıtqa soǵys jyldarynda jumys istegen óndiristik kásiporyndar men maıdan shebinen alysta, Jeńis úshin ter tókken tyl ardagerleri de qamtylady. Dańq ordeniniń tolyq ıegeri atanǵan batyrlarymyz týraly málimetter de qalys qalmaıdy. Saıt jan-jaqty ári oqyrmandarǵa qyzyqty bolýy úshin soǵys jyldaryndaǵy aýdıomaterıaldarmen, fotosýrettermen udaıy tolyqtyrylyp otyrady, – dedi atalǵan tusaýkeserde oblys ákiminiń orynbasary Jaqsylyq Omar. Sondaı-aq, saıtta jaýynger hattary, muraǵattyq qujattar men maıdangerler esimimen atalatyn kóshe, mekeme ataýlary, soǵys jyldaryndaǵy gazet tigindileri, jańalyqtar men oqıǵalarǵa arnalǵan bólimder bar. Aqparattyq portal oblystyq mádenıet, muraǵattar jáne qujattama basqarmasynyń kómegimen quryldy. Aıta ketken lázim, Uly Otan soǵysynda Shyǵys óńirinen 109 Keńes Odaǵynyń Batyry men 22 Dańq ordeniniń tolyq ıegeri shyqqan.
Dýman ANASh, «Egemen Qazaqstan».
О́SKEMEN.