Ulymnyń otanshyl bolyp óskenine qýanamyn

– deıdi kásipqoı bokstyń tórt nusqasy boıynsha álem chempıony Gennadıı Golovkınniń anasy Elızaveta Golovkına Astana qalasynda ótken «Máńgilik El – bolashaǵy birtutas el» atty jalpyulttyq patrıottar forýmy aıasynda uıymdastyrylǵan «Jyl patrıo­ty» baıqaýynda álemge áıgili bylǵary qolǵap sheberi Gennadıı Golovkınniń anasy Elızaveta Golovkına «Ana júregi» atalymy boıynsha jeńimpaz atandy. «At – bıeden, alyp – anadan» degen. Golovkındeı altyn saqa uldy qazaǵyma syılaǵan anaǵa qandaı qurmet kórsetse de artyqtyq etpeıdi! Shynyn aıtqanda, balasyna jumsalǵan árbir soqqy anasynyń júregine qadalǵan qanjar ǵoı. Sonyń bárin kóterip júrgen ana júreginiń myqtylyǵyn aıtsańyzshy! Júregine meıirim ǵana tunbaı, erlik te uıa salǵan anany «Ana júregi» syılyǵynyń adas­paı tapqanyna biz de qýandyq. – Elızaveta Sergeevna, «Jyl patrı­oty» konkýrsynda jeńiske jetke­nińizben shyn júrekten quttyq­taımyz! Júldeni alyp turyp, qandaı sezimdi bastan keshtińiz? – Eń aldymen meni tóbelerine kóterip, syı-qurmetke bólegen asa qaıyrymdy jáne iltıpatty jandarǵa analyq alǵy­symdy aıtqym keledi. Bul, sóz joq, meniń qymbatty ulym – Gennadııge kórsetilgen qurmet. Júldeni alyp turyp men Gennadııdeı bútin bir eldiń maqtanyna aınalǵan uldy tárbıelep ósirgenime qýandym, ári ózimdi baqytty sezindim! – Sizdiń júldege ıe bolǵa­nyńyzdy Gennadıı estidi me? – Biz telefon arqyly jıi habarlasyp turamyz. Sondyqtan da, bir-birimizdiń qandaı jańalyqtarymyz bar – bárin de sol zamatta bilip otyramyz. Balam meni quttyqtap, óziniń men úshin óte qýanyshty ekenin jetkizdi. Maǵan Genamnyń «Ana, biz birligi jarasqan elde turamyz. Qudaıǵa shúkir deýimiz kerek», – degen sózderi unady. Ol shynynda óziniń elin, Elbasyn óte qatty qurmetteıdi. Sodan keıin ulym qazannyń 17-si kúni bolatyn kezekti jekpe-jekke tyńǵylyqty daıyndalyp jatqanyn aıtty. «Sizdiń jeńisińizge men de jeńispen jaýap beremin. Teledıdardyń aldynda qattyraq aıqaılasańyz, daýysyńyzdy estip, kúsh-qýat alýym múmkin», – dep qaljyńdap ta qoıdy (Suhbat 17 qazannyń qarsańynda alynǵan bolatyn – red.). – Jalpy, Gennadıı jas kezinde qandaı bala boldy? Boksty tańdaýyna qara­ǵanda, tentektigi bir basyna jeter­lik bolǵan shyǵar? – Ras, jurttyń bári Gennadııdi jas kezinde buzyq bolǵan shyǵar dep oılaıdy. Shynyn aıtsam, men onyń aýladaǵy balalarmen shekisip, ne bolmasa tóbeleskenin kórmeppin. Ol óte baýyrmal, kópshil bala bolyp ósti. Aýladaǵy, kóshedegi kez kelgen balamen til tabysyp, dos­tasyp ketetin. Áıteýir, únemi jaırańdap, kóńildi júretin. Gennadıı 11 jasynda boksqa bardy. Negizi, Gena egizdiń syńary – Maksım ekeýiniń kindigi bir. Gennadııdiń baqy­tyna oraı oǵan jaqsy bapkerler kezdesti. Alǵashqy bapkeri Vıktor Dmıtrıev, odan keıin Ǵalym Kenjebaev onyń bo­ıyna izgiliktiń, izettiliktiń dánin sińire bildi. Sport adamdy jaqsy baǵytta tárbıeleıdi ǵoı. Bokspen úzbeı aınalysyp júrgenderinde Gena men Maksımniń ózdiginen baryp bireýge urynǵandaryn estigen emespin. – Bir kezderi kórshi eldiń sport kommentatorlary Gennadıı Golovkındi ózderine ıemdenip, bizdiń namysymyzǵa shı júgirtip qoıdy. Sizdiń bul jónindegi pikirińizdi bilsek dep edik... – Gennadııge qatysty mundaı daq­pyrtty estidim. Buǵan men kúle qaraı­myn. Jaqsyny árkim ózine tartyp júredi ǵoı. Jalpy, mundaı qańqý sózderge Genna­dıı­diń ózi jaqsylap turyp jaýap ber­di dep oılaımyn. «Ákem – orys, she­shem – koreı, al men ózim qazaqpyn», degen joq pa?! Gena shynynda da óz Otanyn jan-tánimen súıedi. Ol muny qurǵaq sózben emes, isimen dáleldep júr. Balamnyń otan­shyl bolyp óskenine men de qýanyshtymyn. – Elızaveta Sergeevna, ózińiz jó­ninde, otbasyńyz týraly bir-eki aýyz aıta ketseńiz... – Meniń jubaıym Gennadıı Ivanovıch byltyrǵy jyldyń aqpan aıynda dúnıe saldy. Ol kisi kómir ónerkásibiniń qurmetti qyzmetkeri bolǵan. Sportty jaqsy kóretin. Qysta shańǵy teýip, kúndelikti jattyǵýlaryn jasap, óziniń densaýlyǵyna yqtııatty qaraýshy edi. Men ózim de jas kezimde jeńil atletıkamen aınalystym, azdaǵan júıriktigim bar bolatyn. Keıin otbasyn quryp, balaly-shaǵaly bolǵannan keıin qol úzýge týra keldi. Uzaq jyldar hımııalyq zerthanada assıstent bolyp qyzmet ettim. Biz Maıqudyqta jer úıde turyp keldik. Jubaıym qaıtys bolǵan soń balalarymnyń uıǵarymymen qaladaǵy jaıly páterge kóshtim. Endigi qalǵan ǵumyrymda elimniń amandyǵyn, balalarym men nemerelerimniń tileýin tilep otyrmaqpyn. – Áńgimeńizge kóp rahmet. Júre­gi­ńizge júk túspesin. Qaırat ÁBILDINOV, «Egemen Qazaqstan». QARAǴANDY.