Elbasy Premer-Mınıstrdi qabyldady

Elbasy Nursultan Nazarbaev Premer-Mınıstr Kárim Másimovti qabyldady, dep habarlady Prezıdenttiń baspasóz qyzmeti. Kezdesý barysynda K.Másimov Memleket basshysyna eldiń áleý­mettik-ekonomıkalyq damýy jáne negizgi memlekettik baǵdar­lamalardyń júzege asyrylý barysy týraly baıandady. Elbasy búginde respýblıka ekonomıkasy kúrdeli rejimde jumys istep jatqanyna nazar aýdardy. – Energııa tasymaldaýshy ónimder baǵasynyń tómendeýi sebepti el bıýdjetine túsetin ki­ris­ter 40 paıyzǵa qysqardy. Sony­men qatar, ózge eksporttyq taýar­lardyń negizgi túrleriniń, sonyń ishinde qara jáne tústi metal­dardyń, kómirdiń baǵasy tómen­dedi. Bul rette aýyl sharýa­shylyǵy azdaǵan ósimdi qamta­masyz etip otyr, al ónerkásiptik kási­p­oryndar, sonyń ishinde ma­shına jasaý salasyndaǵy kásip­oryndar óndiristi azaıtty, – dedi Qazaqstan Prezıdenti. Memleket basshysy álemdik naryqtaǵy kúrdeli ahýalǵa qatysty tujyrymdar Qytaıda, AQSh-ta ótken, sondaı-aq, Reseı basshylyǵymen bolǵan kelissózderdiń negizinde jasalyp otyrǵanyna nazar aýdardy. – Álemdegi, sonyń ishinde Eýropa men Shyǵys Azııadaǵy ekonomıkanyń ahýalyn eskere otyryp, jaǵdaıdyń jýyq arada jaqsarýyn boljaý múmkin emes. Halqymyz qalyptasqan jaǵdaıdy bilýi tıis, kásiporyndarymyzdyń kirisi azaıyp, tabystyń tómendeýi jáne jumys oryndarynyń qysqarýy yqtımal. 2007-2009 jyldardaǵydan da kúshti, naǵyz daǵdarys dendep keledi. Osyǵan baılanysty Úkimetke taldaý jasaýdy, daǵdarysqa qarsy jumystardyń josparyn ázirleýdi, qajetti sharalardy belgilep, ony halyqqa jetkizýdi tapsyramyn, – dedi Memleket basshysy. Qazaqstan Prezıdenti memleket azamattardyń áleýmettik kóńil-kúıiniń tómendeýine jol bermeıtinin taǵy da qadap aıtty. – «Nurly Jol» baǵdarlamasy eńbekpen qamtý baǵdarlamasyn tolyqtyrýǵa, kásiptik-tehnıkalyq bilim arqyly jańa mamandyq alý múmkindigin keńeıtýge jaǵdaı jasaıdy. Osylaısha jurt qajet bolǵan jaǵdaıda óz kásipornynda jańa mamandyq ala alatyn bolady. Sonymen qatar, bizde halyqtyń áleýmettik álsiz toptaryn qoldaý baǵdarlamasy daıyn bolýy tıis, – dedi Nursultan Nazarbaev. Memleket basshysy óner­kásiptik kásiporyndardyń kórset­kishin arttyrýdyń, salynyp qoı­ǵan nysandardyń qýatyn paıda­lanýdyń mańyzdylyǵyn atap ótti. – Kásiporyndar memleket qarajatpen qamtamasyz etedi dep kútpeýi tıis. Olaı bolmaıdy, Ulttyq qordyń aqshasyn ja­ńa nysandar qurylysyna, son­daı-aq, nashar jumys isteıtin kásip­oryndardy qoldaýǵa, sýbsı­dııalaýǵa paıdalanýǵa tyıym salamyn. Bul jaǵdaıda qandaı óndiris tıimdi, qaısysy tıimsiz jumys isteıtini birden kórinedi. Sondaı-aq, biz barynsha tıimdi menedj­ment tartý úshin jekeshelendirý júr­gizemiz, – dedi Qazaqstan Pre­zıdenti. Kezdesý qorytyndysy boıynsha Memleket basshysy birqatar naq­ty tapsyrma berdi.