AQTО́BE. 25 mamyr. Aqtóbedegi «Qazhrom» transulttyq kompanııasynyń» fılıaly – Aqtóbe ferroqorytpa zaýytynyń jas mamandary Uly Otan soǵysynyń ardageri Ivan Shevchenkonyń otbasyna baryp, úı sharýasyna qol ushyn berdi. Sondaı-aq, qart jaýyngerdiń erlikke toly áńgimelerin tyńdap, ómirlik ónege alyp qaıtty. Bul týraly zaýyttyń baspasóz qyzmetine silteme jasaǵan egemen.kz tilshisi habarlady.
Jas mamandar keńesiniń tóraǵasy Jasulan Jumaı bastaǵan kásiporyn jastary ardagerler keńesimen tyǵyz qarym-qatynas ornatqan. Olar qarııalardyń ótinish-tilekterin árdaıym eskerip, úı sharýasyna qolǵabystaryn tıgizip otyrady.
«Men soǵystan aman-esen oralyp, 31 jyl Aqtóbe ferroqorytpa zaýytynyń №1 balqytý sehynda slesar-jóndeýshilerdiń brıgadıri bolyp eńbek ettim. Qarttaryn eshqashan umytpaıtyn osyndaı kompanııada eńbek etkenimdi árdaıym maqtan etip otyramyn. Jyldyń qaı mezgili bolsyn ózderiniń kómekterin aıamaıtyn, qarttaryn qazynasyndaı syılap, árdaıym qasymyzdan tabylatyn zaýyttyqtarǵa alǵysym sheksiz. Qıyndyǵy men qyzyǵy qatar júretin metallýrgterge bizdiń salyp ketken sara jolymyzda aıanbaı eńbek etip, elimizdiń ekonomıkasyna qara metallýrgııa salasy boıynsha óz úlesterin qosyp, tek bıikterden kórine bersin dep batamdy beremin», – dedi soǵys ardageri Ivan Shevchenko.
Satybaldy Sáýirbaı.
Derek, sýret: egemen.kz.